ORASTALIK – QIZLAR KOʻRKI

Azal-azaldan oʻzbek xalqi saranjom-sarishtalik, orastalik, tozalikka amal qilishi bilan alohida ajralib turadi.

Har bir oilaning fayz-u tarovati, orastaligi oila aʼzolarining odobi, xulq-atvorini ham belgilab beruvchi mezon hisoblanadi.

Orastalik soʻzining maʼnosi juda keng boʻlib, tabiatan doimo tozalik, pokizalik va goʻzallikka intilib kelayotgan insonlarning istagini ham anglatadi.

Shaxsiy gigiyena qoidalari inson tanasining  har jihatdan toza boʻlishini taqozo etsa, oiladagi umumiy gigiyenaga doir bilimlar hayotiy koʻnikmalarni shakllantira borib, tibbiy madaniyatni, maʼnaviyatni tarbiyalaydi.

Sogʻlom turmush tarzi qoidalariga amal qilish kelajakda oilaviy hayotga tayyor boʻlish va salomatlikni asrab qolishni taʼminlaydi. Inson sogʻlom ekan, u yaxshi yashaydi, orzulariga yetishadi, koʻp imkoniyatlarga ega boʻladi, hayoti goʻzal va farovon kechadi.

Demak, sogʻlom turmush tarziga amal qilgan  odam nafaqat oʻzi va oilasiga, balki jamiyatga ham katta foyda keltiradi.

Tumanimizdagi  har bir maktabda boʻlganidek, bizning  38-sonli maktabimizda ham "Orasta qizlar” toʻgaragi mavjud. Bu toʻgarakka maktabimizning 8-9-sinflari qizlari jalb etilgan. Toʻgaragimizga maktab boshlangʻich xotin-qizlar tashkiloti raisi Saodat opa Gulmonova boshchilik qiladi. Haftaning har juma kuni mashgʻulotlar boʻladi. Unda "Erta turmushning salbiy oqibatlari”, "OITS kasalliklari va undan himoyalanish”, va "Qizlarning reproduktiv salomatligi” kabi bir qator muhim mavzular yuzasidan suhbatlar oʻtkaziladi.

Maktabimiz orasta qizlari tumanimizda oʻtkazilgan "Orasta qizlar” koʻrik-tanlovida faxrli 1-oʻrinni, Respublika bosqichida  2-oʻrinni egalladilar.

Iroda YeRDOShEVA,

38-sonli maktab

oʻquvchisi.

(Foto - http://old.wcu.uz)