ONA ZAMINGA XIYoNAT KELGUSI AVLODLARGA XIYoNATDIR

Joriy yilning 23-avgustida boʻlib oʻtgan Oʻzbekiston Respublikasi Oliy majlisi Senatining oʻn ikkinchi yalpi majlisi materiallari bilan matbuot orqali tanishib, juda taʼsirlandim.

Majlisda aholi sogʻligini muhofaza qilish, ming yillar davomida mintaqamizda shakllangan ekologik muhitning ifloslanishiga yoʻl qoʻymaslik, shu zaminimizni kelgusi avlodlarga gullab-yashnagan oʻlkaga aylantirib meros qilib qoldirish masalalari muhokama etildi. Biroq qoʻshni Tojikiston Respublikasining Tursunzoda shahrida 1975-yilda qurilgan, ishlab chiqarish texnologiyasi eskirib ketgan, tozalash tizimi samarasiz boʻlgan alyuminiy zavodi - "Talko” DUK yon-atrofida yashayotgan aholi va tabiat uchun gʻoyat zararli boʻlgan ifloslantiruvchi moddalarni chiqarib tashlayotgani rad etib boʻlmas dalillar bilan barcha manfaatdor xalqaro ekologik tashkilotlar, BMT tuzilmalari, parlamentlar, hukumatlar, xalqaro jamoatchilik eʼtiboriga havola qilindi. Va atrof-muhit, odamlar sogʻligʻi uchun xavfli boʻlgan korxonaning faoliyat sohasini oʻzgartirish boʻyicha shoshilinch choralar koʻrish lozimligiga eʼtiborqaratildi.

Albatta, inson hayoti aziz. Uning sogʻlom va baxtiyor umr kechirishi esa yashayotgan muhiti ekologiyasiga ham bogʻliq. Shunday ekan, insoniyatning oʻz qoʻli bilan oʻzi yashayotgan zaminni ifloslantirishiga aslo yoʻl qoʻyib boʻlmaydi.

Hozirgi kunda Oʻzbekistonning "Talko" DUK ishlab chiqarish faoliyati tufayli jabr koʻrayotgan minglab aholisining hayoti mazkur masalalarni tezroq hal qilish lozimligini koʻrsatmoqda.

Yalpi majlisda taʼkidlanganiday, vujudga kelgan ahvoldan qutulish yoʻli bor va u albatta topiladi.

Ismoil TOʻRAYeV,

xalq deputatlari tuman Kengashi deputati, tuman Kengashining Agrar, suv xoʻjaligi masalalari va ekologiya boʻyicha doimiy komissiyasi raisi.