Seminarda agrar soha boʻyicha kelgusidagi vazifalar belgilab olindi

Amudaryo tumanining Choykoʻl ovuli hududidagi “Xudaybergan Jabborovich” MChJga tegishli gʻalla ekin maydonida agrar soha xodimlari ishtirokida seminar boʻlib oʻtdi. Seminarda Oʻzbekiston Respublikasi Prezidenti maslahatchisi Shuhrat Gʻaniyev, Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev, tuman hokimi oʻrinbosarlari, ovul va mahalla fuqarolar yigʻinlari masʼullari, qishloq xoʻjaligi sohasi mutasaddilari hamda fermerlar ishtirok etdilar.

Seminarda mutaxassislar 2025-yil hosili uchun ekilgan gʻalla maydonlarida agrotexnik tadbirlarni amalga oshirish, mahalliy oʻgʻit chiqarish va dalalarga sepish, sugʻorish ishlarini uyushqoqlik bilan tashkil qilish, ichki ariq va kanallarni tozalash hamda betonlash, dala madaniyatini oshirish, daraxtlarga shakl berish, texnika va agregatlarini taʼmirlash va bahorgi ekish mavsumiga soz holatga keltirish masalalari yuzasidan fikr-mulohazalar bildirdilar.

Seminarda Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev soʻnggi yillarda mamlakatimizda qishloq xoʻjaligi sohasi rivoji yoʻlida amalga oshirilayotgan keng koʻlamli islohotlar xususida toʻxtaldi.

Xususan, Oʻzbekiston Respublikasi Prezidentining “Oʻzbekiston Respublikasi qishloq xoʻjaligini rivojlantirishning 2020–2030-yillarga moʻljallangan strategiyasida belgilangan vazifalar ijrosini samarali tashkil etishga doir qoʻshimcha chora-tadbirlar toʻgʻrisida”gi hamda “Qishloq xoʻjaligi va oziq-ovqat sohasidagi islohotlarni jadallashtirish boʻyicha qoʻshimcha chora-tadbirlar toʻgʻrisida”gi, “Qishloq xoʻjaligini mexanizatsiyalash darajasini yanada oshirish chora-tadbirlari toʻgʻrisida”gi qarorlari soha rivoji yoʻlidagi ishlarni yangi bosqichga olib chiqqanligi qayd etildi.

Shuningdek, mamlakat aholisiga sifatli va kafolatli qishloq xoʻjaligi mahsulotlarini yetkazib berish orqali oziq-ovqat xavfsizligini taʼminlash, issiqxona xoʻjaliklari va muzlatkichli omborxonalarning iqtisodiy jihatdan samarali ishlashi uchun yanada qulay shart-sharoitlar yaratish, mazkur sohada band boʻlgan aholi daromadlarini oshirishni qoʻshimcha ragʻbatlantirish maqsadida imzolangan “Issiqxona xoʻjaliklari faoliyati samaradorligini oshirish yuzasidan qoʻshimcha chora-tadbirlar toʻgʻrisida”gi Prezident Qarori ham muhim dasturulamal boʻlib xizmat qilayotgani taʼkidlandi.

Seminarda 2025-yil hosili uchun qishloq xoʻjaligi yer maydonlaridan samarali foydalanish, dala madaniyatiga rioya qilish hamda dala chetiga koʻchatlar ekish, paxta maydonlarini tomchilatib sugʻorishning afzalliklari va foydali jihatlari birma-bir tushuntirib oʻtildi. Qolaversa, dala maydonlariga konvert shaklida ishlov berish hamda dala chetiga tut koʻchatlari ekish boʻyicha qishloq xoʻjaligi sohasi mutasaddilari va fermer xoʻjaliklari rahbarlariga alohida topshiriqlar berildi. Shu bilan birga qishloq xoʻjaligi texnika va agregatlarini taʼmirlash ishlarini yakunlash boʻyicha ham tuman masʼullariga tegishli vazifalar belgilab berildi.

Charos Arslonova, tuman hokimligining Axborot xizmati rahbari.