USTOZGA EHTIROM VA HURMAT – ONA VATANGA, KELAJAK AVLODLARGA EHTIROMDIR

Insoniyat paydo boʻlibdiki, hayot deb atalmish ulkan karvonga sarbonlik qilguvchi, odamlarga toʻgʻri yoʻlni koʻrsatib, mehri, ilm-u ziyosi bilan maʼnan yuksaklik sari yetaklovchi zot – ustoz dahosiga hurmat va ehtirom koʻrsatiladi. Ana shu zotning oʻgit va nasihatlariga amal qilish orqali inson orzu-umidlarini amalga oshirishga intiladi. Chunki faqat ustozlargina shaxsning kamoloti yoʻlida hamisha oʻzlarini safarbar qilib yashaydilar.

Amudaryo tumanidagi 23-sonli umumtaʼlim maktabida boʻlib oʻtgan “Ming ehtirom oʻgʻlingizdan, qizingizdan, ustozlar!” deb nomlangan maʼnaviy-maʼrifiy musiqiy tadbirda kelajak avlodlar taʼlim-tarbiyasining jonkuyarlari – butun ongli hayotini oʻsib kelayotgan yosh avlodni barkamol insonlar qilib voyaga yetkazishdek sharafli vazifaga bagʻishlagan fidoyi ustozlarga hurmat va ehtirom koʻrsatildi.

Tadbirni maktab direktorining maʼnaviy-maʼrifiy ishlar boʻyicha oʻrinbosari Dilorom Rahimova ochdi va uchrashuvga taklif qilingan faxriy oʻqituvchilar va maktab pedagogika jamoasini oktyabr oyidagi biri-biridan fayzli va sharafli bayramlar – Oʻqituvchi va murabbiylar kuni hamda 21-oktyabr – ona tili bayramlari bilan chin dildan tabrikladi.

Taʼkidlanganidek, ustozlar dunyodagi eng bebaho boylik va umrboqiy merosni yaratish, uni xalqimizga, yosh avlodga bezavol yetkazish yoʻlida chinakam fidoyilik koʻrsatib kelayotgan mehridaryo ulugʻ insonlardir. Ustozlar yaratadigan ulkan boylik – aql-zakovat va ilm, bebaho, oʻlmas meros esa yaxshi tarbiyadir. Maktab direktorining oʻrinbosari xalqimiz uchun ustozlarga ehtirom va hurmat – ona Vatanga, kelajak avlodlarga buyuk ehtirom namunasi sifatida milliy qadriyatga aylanganini mamnuniyat bilan qayd etdi.

Tadbir davomida maktab direktori Orifjon Yusupov davrada jam boʻlgan faxriy ustozlar va maktab pedagogika jamoasiga oʻzining bayramona tabrigini izhor etib, yosh avlodni vatanparvarlik, milliy-maʼnaviy qadriyatlarga sadoqat ruhida tarbiyalash, ularning ilm sirlarini mukammal egallashlari yoʻlida hamjihatlik bilan amalga oshirayotgan ishlarida muvaffaqiyatlar tiladi.

Shundan soʻng nafaqadagi ustozlar Oʻktam Matsafoyev va Habibaxon Maʼmurovalar mamlakatimizda taʼlim-tarbiya sohasiga qaratilayotgan eʼtibor, soha xodimlari va oʻquvchi-yoshlar uchun yaratilgan shart-sharoitlar xususida soʻz yuritishib, oʻqituvchi-murabbiylar maqomi yuksalib, ularning huquq va manfaatlari qonuniy asoslarda mustahkamlanganini mamnuniyat bilan taʼkidladilar. Ayniqsa, nafaqadagi faxriy oʻqituvchilarning dam olishlari, sihatgohlarda salomatliklarini mustahkamlashlari uchun yaratilgan shart-sharoitlar, imkoniyatlar oʻqituvchi va murabbiylar hayotiga yangicha mazmun baxsh etganini alohida eʼtirof etdilar.

Tadbirda maktab oʻquvchilari tomonidan tayyorlangan musiqiy dastur ham namoyish etildi. “Ming ehtirom oʻgʻlingizdan, qizingizdan, ustozlar!” deb nomlangan maʼnaviy-maʼrifiy va musiqiy dasturdan joy olgan ustozlarning mashaqqatli va sharafli mehnati haqida hikoya qiluvchi sahna koʻrinishlari, ustoz va shogird oʻrtasidagi abadiy mehr-oqibat rishtalari hamda oʻqituvchi va murabbiylarni sharaflovchi kuy-qoʻshiqlar, dilrabo raqslar tadbir ishtirokchilariga zavq-shavq bagʻishladi.

Robiya Yoʻldosheva.