Kuzgi shudgorlash — kelgusi moʻl hosilning poydevori

Amudaryo tumanining Oq oltin ovulida joylashgan “Yakubova Gavhar” fermer xoʻjaligida qishloq xoʻjaligi sohasi uchun muhim sanalgan kuzgi shudgorlash boʻyicha koʻrgazmali amaliy seminar boʻlib oʻtdi. Tadbirda Qoraqalpogʻiston Respublikasi Vazirlar Kengashi Raisi Farhod Ermanov, Joʻqorgʻi Kengesining Agrar, suv xoʻjaligi, tabiatni muhofaza qilish va ekologiya masalalari qoʻmitasi raisi Anvar Jumanazarov, Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev, janubiy tumanlar hokimlari, respublika miqyosidagi mutasaddilar, ilgʻor fermerlar hamda ommaviy axborot vositalari vakillari ishtirok etdilar.

Seminarni Qoraqalpogʻiston Respublikasi Vazirlar Kengashi Raisi Farhod Ermanov ochib berar ekan, joriy yilgi paxta hosilini ortigʻi bilan bajarishda jonbozlik koʻrsatgan barcha mehnatkash dehqon va fermerlarga samimiy minnatdorchilik bildirdi. U oʻz nutqida yer — bu bebaho neʼmat ekanligini, uni oʻz vaqtida shudgorlab, ekib, toʻgʻri parvarish qilinsa, hosildorlik yuqori boʻlishini alohida taʼkidladi. Farhod Ermonov kuzgi shudgorlash jarayonlarini sifatli tashkil etish, yerlarni bahorgi ekinlarga tayyorlash, suv va texnik resurslardan oqilona foydalanish, tuproq unumdorligini oshirish boʻyicha bir qator vazifalarni belgilab berdi.

Tadbir davomida Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev soʻzga chiqib, kuzgi shudgorlash ishlarini agrotexnik talablarga qatʼiy rioya qilgan holda bajarish va oʻz vaqtida yakunlashning ahamiyatiga toʻxtaldi. Shuningdek, suv tejovchi texnologiyalarni keng joriy etish, yerga ishlov berish sifati ustidan qatʼiy nazorat oʻrnatish hamda hosildorlikni oshirish yoʻlida amalga oshirilayotgan ishlar haqida soʻz yuritdi.

Seminar doirasida janubiy tumanlar hokimlari ham oʻz tajriba va fikr-mulohazalarini bildirdilar. Amaliy qismda esa zamonaviy texnikalar yordamida yer haydash jarayoni namoyish etildi. Fermerlar bu orqali yangi usullar, energiya tejamkor texnologiyalar va zamonaviy mexanizatsiya vositalari bilan yaqindan tanishish imkoniga ega boʻldilar.

Tadbirda soʻzga chiqqanlar mamlakatimizda davlatimiz rahbarining tashabbusi bilan qishloq xoʻjaligi rivoji yoʻlida yaratilayotgan keng imkoniyatlar haqida soʻz yuritdilar. Bugungi kunda fermer xoʻjaliklarining texnikalar bilan taʼminlanish holati yuqori darajaga koʻtarilgan, zamonaviy texnikalar asosida ish unumdorligi va mehnat samaradorligi ortib bormoqda. Bu esa oʻz navbatida hosildorlikni oshirish, resurslarni tejash va har bir gektardan olinayotgan foydani koʻpaytirishga xizmat qilmoqda.

Maʼlumot oʻrnida aytish joizki, kuzgi shudgorlash — bu kelgusi yil hosilining asosi sanaladi. Yerga chuqur ishlov berish, oʻsimliklar qoldiqlaridan tozalash, namni saqlash hamda tuproqning unumdor qatlamini yangilash orqali bahorgi ekinlar uchun qulay sharoit yaratiladi. Aynan shudgorlash sifati keyingi mavsumda hosildorlikning 20–30 foiziga taʼsir koʻrsatadi.

Mazkur amaliy seminar nafaqat tajriba almashish, balki fermer va dehqonlarimizni yangi yutuqlarga ruhlantiruvchi muhim maydonga aylandi. Amudaryolik fermerlar esa har doimgidek mehnatsevarlik, sadoqat va fidoyilik bilan yurtimiz agrar salohiyatini yuksaltirish yoʻlida jonbozlik koʻrsatmoqdalar.

Charos Arslonova, tuman hokimligining Axborot xizmati rahbari.