Obod turmush yili yangiliklari

Boks ringi oʻrnatildi

Yaqinda 1-sonli bolalar va oʻsmirlar sport maktabining boks sektsiyasi uchun "Bolalar sportini rivojlantirish jamgʻarmasi” tomonidan 18 million soʻmlik boks ringi keltirilib oʻrnatildi. Bundan tashqari, 1,5 million soʻmlik, boks qoplari, 1 million soʻmlik charm qoʻlqoplari ham berildi. Bunday gʻamxoʻrlikdan yosh sportchilar mamnun boʻlishdi.

Turgʻun savdo shoxobchalari

Mangʻit shahrining Beruniy MFY hududida qaytadan tashkil etilgan 1,8 gektar maydondagi Mangʻit savdo kompleksida bunyod etilishi rejalashtirilgan 184 ta turgʻun savdo shoxobchalari qurilishi uchun tuman hokimligining 2010-yil 20-oktyabrdagi 462-sonli qaroriga muvofiq 184 nafar fuqaroga 7771,5 kvadrat metr yer maydoni ajratilgan edi. Ayni kunda 184 ta turgʻun savdo shoxobchalari qurib, bitkazildi va 52 ta doʻkonda savdo xizmati koʻrsatish yoʻlga qoʻyildi.

Rejalar uddalandi

Mangʻit savdo kompleksi MChJda aholiga namunali savdo xizmati koʻrsatish, yalpi daromad va mahalliy byudjet hisobiga ajratmalar boʻyicha belgilangan 8 oylik rejalar ortigʻi bilan uddalandi. Yalpi daromad 105 foizni, 50 foiz byudjetga ajratmalar esa 59455,2 soʻmni tashkil etdi.

Bankdan kredit olib...

Mangʻit iqtisodiyot kasb-hunar kollejini "Xoʻjalik faoliyati huquqshunosi” yoʻnalishi boʻyicha tugatgan Dilorom Ibragimova parrandachilik minifermasini tashkil etish maqsadida imtiyozli bank krediti olib, oʻz tadbirkorlik faoliyatini boshlagan edi. Ayni kunda Dilorom Ibragimova tovuq goʻshti va tuxum yetishtirib, ichki bozorimizda oʻz mijozlariga ega tadbirkorga aylandi.