Oʻzbekiston - yagona Oila

Oppoq tong koʻksiga boshimni qoʻyib,

Subhi sabolarni simirdim toʻyib.

Shunchalar yoqimli, goʻzal, ajoyib,

Samo ham raqs etar qulochin yoyib,

Oromga chulgʻangan Vatanim mening.

Dalalar bagʻrida ajib sinoat,

Har qarich yerda rizq, fayz-u barokat.

Oddiy dehqon emas, dehqon ham albat,

Oʻz mulki-yerida yashar badavlat,

Obod koʻngillarda imkonim mening.

Istiqlolga egiz tugʻilgan Oʻgʻlon,

Ozodlik tugʻini boshida tutgan.

Jahon maydonida bellashgan zamon,

Ilm-u zakovatda barchadan oʻtgan.

Kuch-qudrat timsoli - irfonim mening.

Bir hovuch bugʻdoydan xirmonim toʻldi,

Dasturxonim toʻldi, har yonim toʻldi.

Qarang-a! Shu zamin oʻz mulkim endi,

Bogʻ-rogʻim fayzidan hamyonim toʻldi.

Ham qadru qimmatim, tayanchim mening.

Qiblaga ochilgan eshiklarimiz,

Mehrdan qurilgan koʻshklarimiz.

Goʻdagin ulgʻaytgan beshiklarimiz – 

Vatan, deb yangragan qoʻshiqlarimiz,

Dildagi iftixor, iqbolim mening.

Ajdodlarim ruhi shodon kezadi,

Yuksak maʼnaviyat elni bezadi.

Yuragim quvonchlar hissin sezadi,

Ushbu dam Vatanim chunon  bezandi –

Eng ulugʻ, eng aziz ayyomim mening!

Kel, hey, ahli jahon, toʻyimni koʻring,

Imkonlari ulugʻ oʻyimni koʻring.

Qaddu kamolimni, boʻyimni koʻring,

Barcha millat ahil UYIMni koʻring.

UYIMning toʻrida mehmonim mening!

Bunda tinchlik hokim, birdamlik hokim,

Qoraqalpoq, qozoq, oʻris - jon-tanim.

Ozar-u, tojik, tatar, turkmanim –

Barcha millat uchun ONA Vatanim –

Oʻzbekiston buyuk OILAM mening!

Robiya YOʻLDOShEVA.

(Foto - http://icc.uz)