Saidbekning dadil qadamlari
Saidbek Qadamboyevning nomi nafaqat tumanimiz, balki Qoraqalpogʻiston miqyosidagi shaxmat sporti shinavandalariga yaxshi tanish. Yoshiga nisbatan ancha bosiq va mulohazali boʻlgan Saidbek Qadamboyev shaxmat taxtasida ilk marta dona surganida endigina toʻrt yoshga qadam qoʻygan edi. Nevarasining alohida qobiliyatga egaligini sezgan buvasi Odilboy Allaberganov asosiy vaqtini Saidbek bilan shugʻullanishga bagʻishladi. Shaxmat sporti boʻyicha tumandagi koʻzga koʻringan trener Zafar Qurbonboyevga shogirdlikka berdi.
Saidbek qisqa vaqt ichida tuman shaxmat sportining yulduziga aylandi. U ilk marta oʻzi tahsil oladigan 56-sonli maktab oʻquvchilari oʻrtasida 1-oʻrinni egallagan boʻlsa, keyinchalik tuman miqyosidagi musobaqalarda oʻz tengdoshlari orasida gʻoliblikni qoʻldan bermaydigan haqiqiy shaxmat yulduziga aylandi.
Oʻtgan oʻquv yilida boʻlib oʻtgan “Umid nihollari” uch bosqichli sport musobaqalarida hududiy, tuman bosqichlarida birinchilikni qoʻldan bermagan Saidbek Qoraqalpogʻiston Respublikasi chempioni boʻldi.
Yangi yilda Saidbekka yana omad kulib boqdi. “Qishki taʼtilni sport bilan oʻtkazamiz!” shiori ostida boʻlib oʻtgan “Umid nihollari” uch bosqichli sport musobaqalarining hududiy va tuman bosiqlarida u yana faxrli 1-oʻrinni egalladi va musobaqaning Qoraqalpogʻiston Respublikasi bosqichiga yoʻllanma oldi.
- Shaxmat – aql gimnastikasi, - deydi Saidbek. – Qancha koʻp shugʻullansangiz, shunchalik koʻp narsani bilib olasiz. Ayniqsa, xotirani mustahkamlashdi shaxmatga teng keladigani yoʻq. Mustahkam xotira esa bitmas-tuganmas bilimga eltuvchi kuchdir. Men shaxmat sportida har kun bir yangi qadam qoʻyib yashashga intilaman.
Saidbek Qadamboyevning orzulari koʻp. U kelajakda dunyo yoshlari bilan bellashish niyatida. Uning ezgu orzulariga tolmas qanot, qadamlariga shijoat tilaymiz.
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
