DORI VOSITALARI SAVDOSIDA TARTIB OʻRNATILMOQDA

Oʻzbekiston Respublikasi Bosh prokuraturasi huzuridagi SVOJJDLQK departamentining Qoraqalpogʻiston Respublikasi tuman boʻlimi tomonidan Oʻzbekiston Respublikasi Prezidentining 2016-yil 31-oktyabrdagi "Aholini dori vositalari va tibbiyot buyumlari bilan taʼminlashni yanada yaxshilashga doir chora-tadbirlar toʻgʻrisida”gi PQ-2647-sonli Qarorini ijro qilish borasida amaliy ishlar qilinmoqda.

Yuqoridagi qaror bilan belgilangan ijtimoiy ahamiyatga ega dori vositalari va tibbiy buyumlarning belgilangan narxlardan qimmat baholarda sotilishini tekshirish boʻyicha oʻtkazilgan nazoratli xarid natijalari boʻyicha 4 ta holatda qonunbuzilish aniqlandi.

Jumladan, ayrim dorixonalarda sotuvchilar "Nitroglitserin” 0,5 mg tabletkalarini (4140 soʻmdan sotish belgilangan) 4500 soʻmdan, Omeprazol 20 mg dori vositasini (6210 soʻmdan sotish belgilangan) 11 000 soʻmdan sotganligi va "MR Dimedrol” (2070 soʻmdan sotish belgilangan) dori vositasini 5000 soʻmdan, "Dimedrolin” dorisini (2070 soʻmdan sotish belgilangan) 4000 soʻmdan sotganligi aniqlandi.

Shuningdek, amalga oshirilgan tezkor tadbirlar natijasida joriy yilning yanvar oyida 2 ta holatda, fevral oyida 2 ta holatda hech qanday hujjatsiz dori vositalari soxta tadbirkorlar tomonidan sotilayotgani aniqlanib, jami 142 turdagi salkam 2 mln. soʻmlik dori vositalari ashyoviy dalil tariqasida olindi.

Aniqlangan holatlar boʻyicha qoidabuzarlar oʻzlarining qilmishlariga yarasha jazo oladilar.

F.ORAZBAYeV,

Oʻzbekiston Respublikasi Bosh prokuraturasi huzuridagi SVOJJDLQK Departamentining Qoraqalpogʻiston Respublikasi tuman boʻlimi boshligʻi, adliya maslahatchisi.

(Foto - darakchi.uz)