Ona Vatan eʼzoziga munosib shoir

Oʻzbekiston Respublikasi Prezidenti  Shavkat Mirziyoyevning Qoraqalpogʻistonga tashrifi xalqimiz hayotida juda katta ijtimoiy-siyosiy voqea boʻldi.

Muhtaram Prezidentimiz rahbarligida oʻtkazilgan video selektor yigʻilishini butun xalqimiz yangi kunga umid va ishonch bilan kuzatdilar.

Haqiqatan ham ushbu yigʻilishda  tilga olingan hayotimizning barcha sohalarini oʻz ichiga olgan istiqbolli rejalar qoraqalpogʻistonliklarning koʻp yillik orzu va umidlarini oʻzida mujassam etganligi tufayli har bir insonning koʻnglidan joy oldi.

Shu yurtda yashayotgan ziyolilardan biri sifatida men davlatimiz rahbarining maʼruzasida maʼnaviy-maʼrifiy sohada tilga olingan rejalarni eshitib, koʻnglimda oʻzgacha bir faxr-iftixor tuygʻularini his qildim. Ayniqsa kitobxonlik, kitob mutolaasi haqida Yurtboshimiz oldimizga qoʻyayotgan  vazifalar koʻnglimni togʻdek koʻtardi.

Prezidentimizning qoraqalpoq adabiyoti namoyondalariga koʻrsatayotgan hurmat-ehtiromi,  shu ulugʻ yurtga boʻlgan alohida gʻamxoʻrligi qalbimizda faxr va iftixor tuygʻularini uygʻotdi.

Qoraqalpogʻiston Respublikasi madhiyasi muallifi,  Oʻzbekiston Qahramoni,   xalq shoiri Ibroyim ogʻa Yusupov xotirasiga yuksak ehtirom  koʻrsatib, uning nomidagi iqtidorli yoshlar maktabi, ijodkorlar bogʻi yaratish yoʻlida muhtaram Prezidentimiz Sh.Mirziyoyev rahbarligida boshlangan ezgu ishlar shoirni yaxshi bilgan, uning koʻp suhbatlarini olgan bizdek zamondoshlariga quvonch va gʻurur bagʻishlaydi.

Ibroyim Yusupov oʻz xalqining ardoqli farzandi, daryodek joʻshqin qalbli ijodkor edi. Uning oʻlmas asarlari har bir yurtdoshimizning qalb toʻridan joy olganiga hech shubha yoʻq.

Ibroyim ogʻa bilan juda koʻp suhbatda boʻlganligim bois, uning Vatanga, vatandoshlariga boʻlgan alohida hurmati, eʼtibori, daryodek joʻshqin qalbi, bolalarga xos begʻuborligi, hazilomuz suhbatlari  xotiramda muhrlanib qolgan. Hozir ham u xuddi biz bilan yonma-yon yashayotgandek nazarimda. Shoirning:

Zar qadrini bilib zargar,

Shunday zamon kelgan kezda.

"Ijaraga oz-moz yer ber”,

Deb yalinar dunyo bizga.

Yoki: 

Qayta qurish qobiliyati,

Yer-onada moʻl boʻladi.

Siz ozgina sabr qiling

Bu el hali zoʻr boʻladi. 

degan satrlari nazarimda  shoirning bugungi kunlarimizni oldindan koʻrib, qilgan bashoratiday.

Muhtaram Prezidentimizning shoir Ibroyim Yusupov nomidagi maktab va ijodkorlar bogʻi yaratish yuzasidan boshlayotgan ezgu ishlari yurtimizdagi har bir ijodkor uchun koʻrsatilayotgan hurmat va ehtirom namunasidir.

Davlatimizni inson omili eng yuksak darajada koʻtarilgan shunday kunlarga yetkazgan Birinchi Prezidentimiz Islom Abdugʻaniyevich Karimovdan  va bugun ona Vatanimiz Oʻzbekistonni uning mehnatkash xalqini yuksalish yoʻliga sobit qadamlik bilan boshlayotgan muhtaram Yurtboshimiz Shavkat Mirziyoyevdan minnatdorchilik hissi qalbimni quvonchga toʻldiradi.

Xonimjon Rajabova,

Qoraqalpogʻistonda xizmat koʻrsatgan madaniyat xodimi.