BANK KREDITLARI – HAR BIR XONADONGA

Mamlakatimizda fuqarolar manfaatlarini ishonchli himoya qilish, turmush farovonligini oshirishga gʻamxoʻrlik kun sayin kuchaytirilmoqda.

Oddiy aholini tadbirkor qilish, odamlarning  daromad manbalarini yaratishlariga koʻmaklashish maqsadida tijorat banklari tomonidan imtiyozli kreditlar joriy etilayotgani fikrimizning tasdigʻidir.

Mamlakatimizda kichik biznes va xususiy tadbirkorlikni yanada rivojlantirish, soha subʼektlari faoliyatini har tomonlama qoʻllab-quvvatlashga alohida eʼtibor qaratilmoqda.

Bank krediti tadbirkorlikni rivojlantirishning asosiy omillaridan biridir. Oʻzbekiston Respublikasi Markaziy banki Xalq bilan muloqot va inson manfaatlari yilida kichik biznesni qoʻllab-quvvatlashni yanada kengaytirish choralarini koʻrmoqda. "Oddiy aholini tadbirkorlikka jalb qilish” shiori ostidagi loyiha shulardan biri.

Muhtaram Prezidentimiz banklar oldiga qoʻyayotgan vazifalarga muvofiq, bank xodimlari har bir oilaga borib, bank xizmatlari va kredit turlari haqida maʼlumot bermoqdalar. Kreditlar eng kam ish haqining 1000 barobari miqdorigacha imtiyozli stavkalarda taklif etilmoqda, kredit olish uchun tadbirkorlik subʼekti sifatida roʻyxatdan oʻtish yoki shaxsiy tomorqada biznes boshlash mumkin.

Tumanimizda faoliyat yuritayotgan aktsiyadorlik tijorat banklari tuman filiallari ham yurtimizda tadbirkorlar safini yanada kengaytirish va ularni har tomonlama qoʻllab-quvvatlash, bankdan imtiyozli mikrokreditlar olish va undan samarali foydalanishlariga koʻmaklashish maqsadida tumanimizning barcha hududlaridagi xonadonlarga birma-bir kirib, targʻibot ishlarini yoʻlga qoʻymoqda. Bank tomonidan taklif etilayotgan mikrokreditlar 3-yilgacha muddatga, yillik 9 foizlik imtiyozli stavkalarda beriladi.

Banklar xodimlari har bir xonadon egasiga kredit turlari, foiz stavkalari, faoliyat boshlash uchun tadbirkorlik sohalari haqida keng tushunchalar berishmoqda.

Bu vazifalarni ado etish uchun tumanimizdagi mavjud xonadonlarning 9100 tasiga "Mikrokreditbank” tuman filiali, 6972 tasiga "Agrobank” tuman filiali 10417 tasiga "Xalq banki” tuman filiali, 10890 tasiga "Sanoat qurilishbank” masʼul qilib belgilandi. Mazkur kreditlarni olish uchun bankka ariza bilan murojaat qilinib, biznes-reja taqdim qilishingiz kerak. Shaxsiy tomorqada biznes boshlamoqchi boʻlganlardan biznes reja talab qilinmaydi, shaxsiy tomorqasi mavjudligini tasdiqlovchi maʼlumotnoma kifoya. Eng kam ish haqining 50 barobarigacha, yaʼni 7,5 million soʻmgacha boʻlgan kreditlar uchinchi shaxs kafilligi asosida, undan koʻp miqdordagi kreditlar esa koʻchmas mulk, yengil yoki yuk tashuvchi avtomobil, asbob-uskunalar va boshqa garov asosida beriladi.

Bankning mijoz oldiga borib oʻz xizmatini taklif etishi yaxshi samara bermoqda. Bu "mijoz – bank uchun emas, bank – mijoz uchun” degan tamoyilning amaliy tasdigʻidir. Shu kungacha tumanimizning bir qator ovul va mahallalarida yashovchi fuqarolar chorvachilik faoliyatini yoʻlga qoʻyishi uchun imtiyozli kredit olib, bu sarmoyaga qoramol, parranda sotib olgan xolda oilasiga daromad manbalarini yaratmoqdalar.

Amalga oshirilayotgan bu chora-tadbirlar mamlakatimiz rahbari muhtaram Sh.Mirziyoyev taʼkidlaganlaridek xalqimiz turmushi sifatini oshirishga, har bir xonadonni, pirovardida davlatimizni boy va qudratli qilishga qaratilganligi bilan juda ahamiyatlidir.

Oygul RAJABOVA.

(Reklama huquqi asosida. Xizmatlar litsenziyaga ega).

(Foto - http://storage.kun.uz)