Mahalla bankirlari ishtirokida yigʻilish oʻtkazildi
Mamlakatimizda aholi turmush farovonligini yuksaltirish va hududlarni ijtimoiy-iqtisodiy jihatdan jadal rivojlantirish davlat siyosatining eng ustuvor yoʻnalishlaridan biri sanaladi. Yaqindagina Oʻzbekiston Respublikasi Prezidenti Shavkat Mirziyoyev boshchiligida oʻtkazilgan kengaytirilgan videoselektor yigʻilishida ham aynan shu masalalarga alohida eʼtibor qaratilib, hududlarda iqtisodiy oʻsishni yanada jadallashtirish, aholi bandligini taʼminlash va ularning turmush darajasi hamda real daromadlarini oshirishga qaratilgan koʻplab dolzarb vazifalar belgilab berilgan edi.
Davlatimiz rahbari tomonidan ilgari surilgan ushbu muhim topshiriqlar va koʻrsatmalarning joylardagi ijrosini taʼminlash maqsadida respublikamizning barcha hududlarida keng koʻlamli amaliy ishlar boshlab yuborildi. Jumladan, Markaziy bankning Qoraqalpogʻiston Respublikasi Bosh boshqarmasi hamda Oʻzbekiston mahallalari uyushmasining Qoraqalpogʻiston Respublikasi boshqarmasi hamkorligida Amudaryo tumani hokimligi binosida mahalla bankirlari ishtirokida yigʻilish tashkil etildi. Yigʻilishda joylardagi “Mahalla yettiligi” vakillari, hududda faoliyat olib borayotgan tijorat banklarining masʼul xodimlari hamda mutaxassislari ishtirok etishdi.
Uchrashuv davomida kun tartibidagi masalalar atroflicha tahlil qilinib, kelajakdagi aniq rejalar belgilab olindi. Xususan, joylardagi barcha mahallalarning oʻziga xos iqtisodiy xususiyati, drayver sohalari va mavjud imkoniyatlaridan kelib chiqqan holda yangi mikroloyihalarni shakllantirish hamda ularni hayotga tatbiq etish masalasiga eʼtibor qaratildi.
Bundan tashqari, aholini, ayniqsa, uyushmagan yoshlar va xotin-qizlarni tadbirkorlik faoliyatiga keng jalb qilish, ularning biznes tashabbuslarini moliyaviy jihatdan qoʻllab-quvvatlash uchun ajratilayotgan imtiyozli kredit mablagʻlaridan maqsadli va samarali foydalanishni tashkil etish masalasi muhokama qilindi. Shu bilan birga, yangi ish oʻrinlarini yaratish va bu jarayonda aholi bilan ishlovchi mahalla bankirlari faoliyatining samaradorligini yanada oshirish boʻyicha ustuvor vazifalar belgilandi.
Tadbirda soʻzga chiqqan mutaxassislar tomonidan qayd etilganidek, bugungi kunda faqatgina umumiy yondashuvlar va eski qoliplar bilan cheklanib qolmasdan, barcha hududlarning oʻziga xos iqtisodiy salohiyatini toʻliq ishga solish talab etilmoqda. Buning uchun esa mahallalardagi barcha xonadonlarga kirib borish, oilalarning ijtimoiy holatini chuqur oʻrganish orqali ular bilan manzilli va yakka tartibda ishlash tizimini yangi bosqichga olib chiqish zarurligi alohida taʼkidlandi. Joylardagi aholi tomonidan bildirilayotgan istiqbolli tashabbuslar va gʻoyalarni davlat tomonidan qoʻllab-quvvatlash orqali ularning doimiy daromad manbaini shakllantirish hamda bandligini taʼminlash bugungi kunning eng asosiy maqsadi qilib olindi.
Ushbu yigʻilishda belgilab olingan keng koʻlamli vazifalarning toʻlaqonli ijro etilishi kelgusida Amudaryo tumani va umuman, Qoraqalpogʻiston Respublikasi hududlarida kichik biznes hamda xususiy tadbirkorlik muhitini jadal rivojlantirishga hissa qoʻshadi. Eng muhimi, bu kabi tizimli va manzilli saʼy-harakatlar natijasida koʻplab yangi ish oʻrinlari yaratilib, yurtdoshlarimizning turmush darajasi va oilalar farovonligini oshirishga erishiladi. Bu esa oʻz navbatida, butun mamlakatimizning umumiy iqtisodiy barqarorligini taʼminlashda eng muhim poydevor vazifasini oʻtashi shubhasizdir.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
