TADBIRKORLIK FAOLIYaTI QONUN HIMOYaSIDA

Amudaryo tuman prokuraturasi tomonidan tumanda tadbirkorlik faoliyatini rivojlantirish, tadbirkorlikni har tomonlama qoʻllab-quvvatlash va ularning huquqiy himoyasini taʼminlashga qaratilgan qonunchilik ijrosi ustidan doimiy prokuror nazoratini taʼminlash borasida muayyan ishlar amalga oshirilmoqda.

Xususan, birgina joriy yilning oʻtgan davri mobaynida tadbirkorlarning huquqiy himoyasini tezkor tashkil etish maqsadida tuman prokuraturasida tashkil etilgan «007» va «515-34-08» raqamli ishonch telefoniga 3 ta tadbirkorlik subʼektlaridan murojaatlar kelib tushdi.

Jumladan, joriy yilning 23-yanvar kuni tumanning «Boʻz yop» ovulida faoliyat koʻrsatayotgan paxtachilik va gʻallachilikka ixtisoslashgan «Aminboy Inomjon» nomli fermer xoʻjaligi rahbari A.Ibragimov tuman prokuraturasining «007» raqamli ishonch telefoniga murojaat qilib, tumandagi «Yulduz» OTHJdan fermer xoʻjaligining 2012-yil hosili uchun yetishtirgan paxtasidan qolgan 14 mln. 350 ming soʻmlik haqini undirib berish va ushbu pul mablagʻini lizing asosida texnika sotib olish uchun Lizing kompaniyasiga oʻtkazib berishda amaliy yordam berishni soʻragan murojaatini koʻrib chiqish natijasida, joriy yilning 28-yanvar kuni fermer xoʻjaligi tegishli pul mablagʻlari  «Yulduz» OTHJdan undirilib, ushbu pul mablagʻi ALK «Oʻzqishloqxoʻjalikmashlizing» kompaniyasiga oʻtkazilishi taʼminlanib, fermer xoʻjaligiga amaliy yordam koʻrsatildi.

Bundan tashqari, tumandagi «Koʻyuk koʻpir» ovulida yashovchi yakka tadbirkor va hozirda tumandagi Maishiy xizmat koʻrsatish kollejining 3 bosqich talabasi Tilovbayeva Navbahor Soatboy qizi qungʻiroq qilib, u oʻz murojaatida «Uy hayvonlariga qarash» faoliyati bilan shugʻullanish uchun, yaʼni chorva mollarini olish maqsadida 1.800 ming soʻm kredit mablagʻlarini soʻrab 2012-yilning sentyabr oyida tumandagi Mikrokredit bank filialiga xujjatlarini topshirganligini, lekin shu kunga qadar murojaatiga javob olmaganligini hamda ushbu faoliyat turi bilan shugʻullanish uchun kredit olib berishda yordam soʻragan murojaati atroflicha oʻrganib chiqilib, natijasiga koʻra kredit olib berilishi taʼminlandi hamda tadbirkor qizimizning murojaatini oʻz vaqtida koʻrib chiqmasdan, sansanorlikka yoʻl qoʻygan bankning javobgar shaxslariga nisbatan intizomiy choralar koʻrildi. 

Shu bilan birga, Amudaryo tuman prokuraturasi tomonidan tumandagi Nazarxon ovuli hududida joylashgan «Berdaq Energoservis» XKga qarashli ustaxonada oʻtkazilgan tekshirish natijasida 2 mln. 400 ming soʻm jarimaga tortilgan dalolatnomaning qonuniyligi oʻrganilib chiqilganda, dalolatnoma asosiy isteʼmolchi Berdaq MMTPga nisbatan rasmiylashtrilishi lozimligi aniqlanib, tuman elektr tarmoqlari korxonasi farmoyishi bekor qilinib, noqonuniy ravishda dalolatnoma tuzgan tuman elektr tarmoqlari filiali hodimlariga nisbatan intizomiy chora koʻrilib, tadbirkorning qonuniy huquqlari tiklanishiga erishildi.  

Shuningdek, tuman prokurorining boshchiligida kichik biznes va xususiy tadbirkorlikni jadal rivojlantirish, ragʻbatlantirish va qoʻllab-quvvatlashga qaratilgan qonunlar, Prezident farmonlari va qarorlari, Hukumat qarorlari ijrosi yuzasidan tumandagi tadbirkorlik subʼektlari va fermer xoʻjaliklari vakillari ishtirokida har oyda 2 marotaba uchrashuvlar tashkil qilingan boʻlib, u yerda tuman prokuraturasi tomonidan bu borada amalga oshirilayotgan ishlar, amaliy yordamlar, Hukumatimiz tomonidan yaratilayotgan qulayliklar, tadbirkorlarimiz faoliyatidagi muammolar hamda ularni qiziqtirayotgan masalalar koʻrib chiqilmoqda.   

Tuman prokuraturasi tomonidan tumanda tadbirkorlik faoliyatini rivojlantirish, tadbirkorlikni har tomonlama qoʻllab-quvvatlash va ularning huquqiy himoyasini taʼminlashga qaratilgan ishlar davom ettirilmoqda.

R.XALMURATOV,

tuman prokurorining katta yordamchisi, 3-darajali huquqshunos.