ТАДБИРКОРЛИК ФАОЛИЯТИ ҚОНУН ҲИМОЯСИДА

Амударё туман прокуратураси томонидан туманда тадбиркорлик фаолиятини ривожлантириш, тадбиркорликни ҳар томонлама қўллаб-қувватлаш ва уларнинг ҳуқуқий ҳимоясини таъминлашга қаратилган қонунчилик ижроси устидан доимий прокурор назоратини таъминлаш борасида муайян ишлар амалга оширилмоқда.

Хусусан, биргина жорий йилнинг ўтган даври мобайнида тадбиркорларнинг ҳуқуқий ҳимоясини тезкор ташкил этиш мақсадида туман прокуратурасида ташкил этилган «007» ва «515-34-08» рақамли ишонч телефонига 3 та тадбиркорлик субъектларидан мурожаатлар келиб тушди.

Жумладан, жорий йилнинг 23 январь куни туманнинг «Бўз ёп» овулида фаолият кўрсатаётган пахтачилик ва ғаллачиликка ихтисослашган «Аминбой Иномжон» номли фермер хўжалиги раҳбари А.Ибрагимов туман прокуратурасининг «007» рақамли ишонч телефонига мурожаат қилиб, тумандаги «Юлдуз» ОТҲЖдан фермер хўжалигининг 2012 йил ҳосили учун етиштирган пахтасидан қолган 14 млн. 350 минг сўмлик ҳақини ундириб бериш ва ушбу пул маблағини лизинг асосида техника сотиб олиш учун Лизинг компаниясига ўтказиб беришда амалий ёрдам беришни сўраган мурожаатини кўриб чиқиш натижасида, жорий йилнинг 28 январь куни фермер хўжалиги тегишли пул маблағлари  «Юлдуз» ОТҲЖдан ундирилиб, ушбу пул маблағи АЛК «Ўзқишлоқхўжаликмашлизинг» компаниясига ўтказилиши таъминланиб, фермер хўжалигига амалий ёрдам кўрсатилди.

Бундан ташқари, тумандаги «Кўюк кўпир» овулида яшовчи якка тадбиркор ва ҳозирда тумандаги Маиший хизмат кўрсатиш коллежининг 3 босқич талабаси Тиловбаева Навбаҳор Соатбой қизи қунғироқ қилиб, у ўз мурожаатида «Уй ҳайвонларига қараш» фаолияти билан шуғулланиш учун, яъни чорва молларини олиш мақсадида 1.800 минг сўм кредит маблағларини сўраб 2012 йилнинг сентябрь ойида тумандаги Микрокредит банк филиалига хужжатларини топширганлигини, лекин шу кунга қадар мурожаатига жавоб олмаганлигини ҳамда ушбу фаолият тури билан шуғулланиш учун кредит олиб беришда ёрдам сўраган мурожаати атрофлича ўрганиб чиқилиб, натижасига кўра кредит олиб берилиши таъминланди ҳамда тадбиркор қизимизнинг мурожаатини ўз вақтида кўриб чиқмасдан, сансанорликка йўл қўйган банкнинг жавобгар шахсларига нисбатан интизомий чоралар кўрилди. 

Шу билан бирга, Амударё туман прокуратураси томонидан тумандаги Назархон овули ҳудудида жойлашган «Бердақ Энергосервис» ХКга қарашли устахонада ўтказилган текшириш натижасида 2 млн. 400 минг сўм жаримага тортилган далолатноманинг қонунийлиги ўрганилиб чиқилганда, далолатнома асосий истеъмолчи Бердақ ММТПга нисбатан расмийлаштрилиши лозимлиги аниқланиб, туман электр тармоқлари корхонаси фармойиши бекор қилиниб, ноқонуний равишда далолатнома тузган туман электр тармоқлари филиали ҳодимларига нисбатан интизомий чора кўрилиб, тадбиркорнинг қонуний ҳуқуқлари тикланишига эришилди.  

Шунингдек, туман прокурорининг бошчилигида кичик бизнес ва хусусий тадбиркорликни жадал ривожлантириш, рағбатлантириш ва қўллаб-қувватлашга қаратилган қонунлар, Президент фармонлари ва қарорлари, Ҳукумат қарорлари ижроси юзасидан тумандаги тадбиркорлик субъектлари ва фермер хўжаликлари вакиллари иштирокида ҳар ойда 2 маротаба учрашувлар ташкил қилинган бўлиб, у ерда туман прокуратураси томонидан бу борада амалга оширилаётган ишлар, амалий ёрдамлар, Ҳукуматимиз томонидан яратилаётган қулайликлар, тадбиркорларимиз фаолиятидаги муаммолар ҳамда уларни қизиқтираётган масалалар кўриб чиқилмоқда.   

Туман прокуратураси томонидан туманда тадбиркорлик фаолиятини ривожлантириш, тадбиркорликни ҳар томонлама қўллаб-қувватлаш ва уларнинг ҳуқуқий ҳимоясини таъминлашга қаратилган ишлар давом эттирилмоқда.

Р.ХАЛМУРАТОВ,

туман прокурорининг катта ёрдамчиси, 3-даражали ҳуқуқшунос.