KOʻNGLIMIZ ALLOHDA, QOʻLIMIZ IShDA BOʻLSIN!

Dunyoda hech bir boylikka alishgusiz oqshomlari osuda, kunduzlari charogʻon, fayzli yurtimizda tinch-xotirjam umr-guzaronlik qilayotgan zamondoshim! Yurtimizda qutlugʻ evrilishlar bilan kechayotgan koʻklamning yana bir kuni poyoniga yetmoqda. Oilangiz tinch, koʻnglingiz tinch, xotirjam orom olishga chogʻlanmoqdasiz. Shoshmang, azizim! Qoʻlingizga bir varaq qogʻoz, qalam oling. Qogʻoz oʻrtasiga doira chizing. Doirani quyosh deb tasavvur qiling-da, atrofiga shuʼla-chiziqchalar torting. Keyin har bir chiziqchaga oilangiz xotirjamligi boqiy, farzandlaringiz oqil, mehr-oqibatli boʻlishi uchun, oʻzingiz yashayotgan shu moʻʼjaz yurt yanada taraqqiy etishi uchun bugun nimalar qilganingizni birma-bir yozing.

Agar hovlingiz atrofida hech boʻlmasa bir nechta tup koʻchat oʻtqazib, parvarishlab, kamolga keltirayotgan, gullaringiz qiygʻos ochilib, atrofga muattar boʻy taratib, koʻrgan koʻzni yashnatib turishiga erishgan boʻlsangiz, oʻz koʻchangiz, mahallangizning ham obod boʻlmogʻi uchun nimadir qilgan boʻlsangiz, kimgadir yoʻl-yoʻriq berib, kimgadir yordam berolgan, ish joyingizda xizmat vazifangizni yaxshi ado etgan boʻlsangiz, demak, umringizning bir kuni bekor ketmabdi. Yaratganning buyuk inʼomi – tiriklikning oʻlchovli onlarini qadrlay olibsiz. Yurtimiz taraqqiyotiga, gullab-yashnashiga baholi qudrat hissa qoʻshibsiz. Biroq doʻstlaringiz, siz bilan yonma-yon yashayotganlar-chi?

Mubolagʻa emas, har birimizning, hammamizning ertagi kunga ishonch bilan qarab, ezgu niyatlar bilan qilgan saʼy-harakatlarimizning, izlanishlarimizning samarasi, istiqlol bergan imkoniyatlardan unumli foydalanish bizni bugungiday dorilomon kunlarga eltdi. Shu aziz Vatanda inson baxt-saodati uchun dadil intilishlarga eshik ochdi. Birgina tumanimiz misolida olib qaraydigan boʻlsak, joriy yilda ijtimoiy-iqtisodiy rivojlantirish, qurilish, xizmat koʻrsatishni yaxshilash maqsadlariga 26,5 milliard soʻmdan ortiq mablagʻ ajratildi. Aholini uzluksiz elektr energiyasi bilan taʼminlash maqsadida 12,5 milliard soʻmlik Jumurtov – Mangʻit zahira liniyasi tortilmoqda. 128 milliard soʻmlik Qipchoq panton koʻprigi oʻrniga zamonaviy uslubdagi uzunligi 350 metr boʻlgan temir-beton koʻprik qurilishi uchun loyiha hujjatlarini tayyorlashga buyurtma berildi. Tumanimizning tabiiy gaz yetib bormayotgan hududlari aholisiga qulaylik yaratish uchun "Shimolgaztaʼminot” unitar korxonasining tuman filialida gaz ballon bilan taʼminlash markazi xizmati yoʻlga qoʻyilayapti. Tadbirkorlarning oʻz biznesini rivojlantirishi, yangidan ish boshlash istagida boʻlgan fuqarolar uchun joriy yilda 378 ta loyiha uchun  kredit mablagʻi ajratildi. Yoʻllarimiz ravon boʻlishi uchun taʼmirlash ishlari olib borilmoqda. Bularning bari siz uchun, men uchun, hammamiz uchun, hech kimdan kam boʻlmay yashashimiz uchun, farzandlarimizning barkamol boʻlib voyaga yetishi uchun! Biroq bularni chin qalbimizdan his qilib, qadriga yetayapmizmi? Imkoniyatlar ostonasidan dadil odimlayapmizmi? Ertagi kunimizning vorislari – farzandlarimiz oʻzimizdan ham baxtiyor, farovon yashashi uchun intilayapmizmi? Hayot – oʻzgarayapti, zamon tezkor, shiddatli! Biz oʻzgardikmi? Oʻz-oʻzimizga qayta-qayta savol berib, ijobiy javob olishga erishmogʻimiz lozim. Chunki loqayd odam el nazaridan qoladi.

Hayotimizning har lahzasi yaratish, yashnatish uchun bir imkoniyatdir. To belimizda quvvat, koʻzimizda nur bor ekan, koʻnglimiz Allohda, qoʻlimiz ishda boʻlishga daʼvat etilganmiz.

Endi keling, maqola muqaddimasidagi soʻzimizga qaytamiz. Ha, quyoshni, shuʼlalarini chizdingiz. Endi shu shuʼla-chiziqchalarga qilgan ishlaringizni yoza boshladingiz. Iloho chiziqchalar, chiziqchalar ustida qilgan ishlaringizning qaydlari koʻpayaversin! Chunki quyosh qanchalik nurli boʻlsa, olam shunchalik charogʻon boʻlgani kabi qilgan ezgu ishlaringiz ham umringizni nurli, sururli qiladi, azizim.

Oygul RAJABOVA,

jurnalist.