КЎНГЛИМИЗ АЛЛОҲДА, ҚЎЛИМИЗ ИШДА БЎЛСИН!

Дунёда ҳеч бир бойликка алишгусиз оқшомлари осуда, кундузлари чароғон, файзли юртимизда тинч-хотиржам умр-гузаронлик қилаётган замондошим! Юртимизда қутлуғ эврилишлар билан кечаётган кўкламнинг яна бир куни поёнига етмоқда. Оилангиз тинч, кўнглингиз тинч, хотиржам ором олишга чоғланмоқдасиз. Шошманг, азизим! Қўлингизга бир варақ қоғоз, қалам олинг. Қоғоз ўртасига доира чизинг. Доирани қуёш деб тасаввур қилинг-да, атрофига шуъла-чизиқчалар тортинг. Кейин ҳар бир чизиқчага оилангиз хотиржамлиги боқий, фарзандларингиз оқил, меҳр-оқибатли бўлиши учун, ўзингиз яшаётган шу мўъжаз юрт янада тараққий этиши учун бугун нималар қилганингизни бирма-бир ёзинг.

Агар ҳовлингиз атрофида ҳеч бўлмаса бир нечта туп кўчат ўтқазиб, парваришлаб, камолга келтираётган, гулларингиз қийғос очилиб, атрофга муаттар бўй таратиб, кўрган кўзни яшнатиб туришига эришган бўлсангиз, ўз кўчангиз, маҳаллангизнинг ҳам обод бўлмоғи учун нимадир қилган бўлсангиз, кимгадир йўл-йўриқ бериб, кимгадир ёрдам беролган, иш жойингизда хизмат вазифангизни яхши адо этган бўлсангиз, демак, умрингизнинг бир куни бекор кетмабди. Яратганнинг буюк инъоми – тирикликнинг ўлчовли онларини қадрлай олибсиз. Юртимиз тараққиётига, гуллаб-яшнашига баҳоли қудрат ҳисса қўшибсиз. Бироқ дўстларингиз, сиз билан ёнма-ён яшаётганлар-чи?

Муболаға эмас, ҳар биримизнинг, ҳаммамизнинг эртаги кунга ишонч билан қараб, эзгу ниятлар билан қилган саъй-ҳаракатларимизнинг, изланишларимизнинг самараси, истиқлол берган имкониятлардан унумли фойдаланиш бизни бугунгидай дориломон кунларга элтди. Шу азиз Ватанда инсон бахт-саодати учун дадил интилишларга эшик очди. Биргина туманимиз мисолида олиб қарайдиган бўлсак, жорий йилда ижтимоий-иқтисодий ривожлантириш, қурилиш, хизмат кўрсатишни яхшилаш мақсадларига 26,5 миллиард сўмдан ортиқ маблағ ажратилди. Аҳолини узлуксиз электр энергияси билан таъминлаш мақсадида 12,5 миллиард сўмлик Жумуртов – Манғит заҳира линияси тортилмоқда. 128 миллиард сўмлик Қипчоқ пантон кўприги ўрнига замонавий услубдаги узунлиги 350 метр бўлган темир-бетон кўприк қурилиши учун лойиҳа ҳужжатларини тайёрлашга буюртма берилди. Туманимизнинг табиий газ етиб бормаётган ҳудудлари аҳолисига қулайлик яратиш учун "Шимолгазтаъминот” унитар корхонасининг туман филиалида газ баллон билан таъминлаш маркази хизмати йўлга қўйилаяпти. Тадбиркорларнинг ўз бизнесини ривожлантириши, янгидан иш бошлаш истагида бўлган фуқаролар учун жорий йилда 378 та лойиҳа учун  кредит маблағи ажратилди. Йўлларимиз равон бўлиши учун таъмирлаш ишлари олиб борилмоқда. Буларнинг бари сиз учун, мен учун, ҳаммамиз учун, ҳеч кимдан кам бўлмай яшашимиз учун, фарзандларимизнинг баркамол бўлиб вояга етиши учун! Бироқ буларни чин қалбимиздан ҳис қилиб, қадрига етаяпмизми? Имкониятлар остонасидан дадил одимлаяпмизми? Эртаги кунимизнинг ворислари – фарзандларимиз ўзимиздан ҳам бахтиёр, фаровон яшаши учун интилаяпмизми? Ҳаёт – ўзгараяпти, замон тезкор, шиддатли! Биз ўзгардикми? Ўз-ўзимизга қайта-қайта савол бериб, ижобий жавоб олишга эришмоғимиз лозим. Чунки лоқайд одам эл назаридан қолади.

Ҳаётимизнинг ҳар лаҳзаси яратиш, яшнатиш учун бир имкониятдир. То белимизда қувват, кўзимизда нур бор экан, кўнглимиз Аллоҳда, қўлимиз ишда бўлишга даъват этилганмиз.

Энди келинг, мақола муқаддимасидаги сўзимизга қайтамиз. Ҳа, қуёшни, шуълаларини чиздингиз. Энди шу шуъла-чизиқчаларга қилган ишларингизни ёза бошладингиз. Илоҳо чизиқчалар, чизиқчалар устида қилган ишларингизнинг қайдлари кўпаяверсин! Чунки қуёш қанчалик нурли бўлса, олам шунчалик чароғон бўлгани каби қилган эзгу ишларингиз ҳам умрингизни нурли, сурурли қилади, азизим.

Ойгул РАЖАБОВА,

журналист.