“Obod turmush yili“ yangiliklari

OILAVIY TADBIRKORLAR SAFI OShMOQDA

Mangʻit shahrining "Doʻstlik” mahallasida yashovchi duradgor-usta Botir Kamolov oilaviy tadbirkorlik bilan shugʻullana boshlaganiga hali koʻp vaqt boʻlgani yoʻq. U yangi imorat quruvchilarning buyurtmalari asosida eshiklar, deraza romlari va boshqa roʻzgʻorbop buyumlar yasashni yoʻlga qoʻydi. Shu bilan birga hunar oʻrganishni xohlagan mahalla yoshlariga duradgorlik sirlarini oʻrgatmoqda.

EʼTIBOR YaXShI BOʻLGACh

Nazarxon OFY hududida aholining ish bilan bandligini taʼminlashga alohida eʼtibor beriladi. OFYning diniy maʼrifat va maʼnaviy-axloqiy tarbiya masalalari boʻyicha maslahatchisi Guljahon Ibragimovaning saʼy-harakatlari bois, ovulda 20 nafardan ziyod kishi kasanachilik faoliyati bilan shugʻullanishi uchun sharoit yaratib berildi. Bundan tashqari, 40 dan ziyod oilada oilaviy tadbirkorlik yoʻlga qoʻyilgan. Xitoy texnologiyasi asosida hududning "Qulamet oʻy” mavzesida bunyod etilgan gʻisht zavodida esa 45 nafar yoshlar doimiy ish bilan taʼminlanishdi.

Pillakorlar ishi qizgʻin

"Toshyop” ovulidagi mavjud 5 ta fermer xoʻjaliklarida ayni kunlarda gʻoʻza parvarishi bilan bir qatorda 84 quti ipak qurti ham ilgʻor tajribalar asosida parvarish qilinayapti. Ipak qurtlari parvarishi mutaxassislar tomonidan muntazam nazorat qilinib, tavsiyalar berib borilayapti. Toshyoplik pillakorlar rejadagi sifatli xom ashyoni yetishtirishlari uchun yetarli ozuqa bazasi mavjud.

BAYRAMGA MUNOSIB SOVGʻA

Tumanimizda "Obod turmush yili”ning yirik qurilishlaridan biri – Qipchoq qishlogʻida qad rostlayotgan zamonaviy qulayliklarga ega boʻlgan musiqa va sanʼat maktabi binosidir. Bu yangi maktab 150 oʻquvchi oʻringa moʻljallangan boʻlib, uni "Amudaryo maxsus qurilish” MChJ quruvchi-bunyodkorlari barpo qilmoqdalar. Bu yangi qurilish obʼektida 2 milliard 462 million soʻmlik qurilish-montaj ishlari amalga oshiriladi. Qurilish-montaj ishlarini tajribali quruvchi-muhandis Rahimboy Tojiboyev boshqarib, muvofiqlashtirib bormoqda.

Yangi musiqa va sanʼat maktabi qurilishi Mustaqilligimizning 22-yilligi bayramiga bitkazilib, bu ulugʻ bayramga munosib sovgʻa tayyorlanadi.

ChORVAChILIK RIVOJI

"Toʻlqin” ovulidagi "Amudaryo sohili” fermer xoʻjaligi chorvachilik va paxtachilikka ixtisoslashgan boʻlib, bu yerda  Polshadan keltirilgan sut  mahsulotlari yetishtirish yoʻnalishidagi 110 bosh yirik shoxli zotdor qora-ola mollar zooveterinariya qoidalariga muvofiq parvarish qilinmoqda. Tajribali veterinar Kenjaboy Abdullayev maxsus keltirilgan zotdor mollar urugʻlari bilan mazkur Polsha zotidagi sigirlarni sunʼiy usulda urugʻlantirib, oʻtgan 2012-yil davomida 80 bosh sogʻlom buzoq olishga erishdi.

URUSh FAXRIYLARIGA EHTIROM

9-may – Xotira va qadrlash kuni munosabati  bilan Mangʻit shahridagi   "Chordara” mahallasida istiqomat qiluvchi urush faxriylaridan Oʻtepbergan bobo Adilov va Xolboy bobo Bekmanovlar xonadonlarida mahalla faollari boʻlishib, ularga milliy chopon-toʻn kiydirildi va turli shirinliklar sovgʻa qilindi. Shuningdek, Prezidentimiz Farmoniga muvofiq ularning har biriga 500 ming soʻmdan sovgʻa puli berildi.

Mana shunday tadbir Navoiy mahallasida ham boʻlib, mahallada istiqomat qiluvchi urush faxriylaridan Sobir bobo Nurullayev va Yoʻldosh bobo Tojimurodovlarga mahalla faollari nomidan qimmatbaho sovgʻalar va har biriga 500 ming soʻmdan pul hadyalari berildi.

BIR OILA FARZANDLARIDAY

Turkmaniston davlati bilan chegara hududda joylashgan Amir Temur nomli ovulda 3312 nafar turli millat vakillari ahil-inoq istiqomat qilishmoqda. Ularning 2545 nafari oʻzbeklar, 63 nafari qozoqlar, 19 nafari qoraqalpoqlar, 683 nafari turkmanlar va rus-tatar millatlariga mansub kishilardan iborat boʻlsa-da bir-birlari bilan doʻst-birodar, quda-anda boʻlib yashayaptilar.

Toʻyi, maʼrakasi, quvonchi bir ovul odamlari 9 ta fermer xoʻjaligi paxta dalalarida koʻzlanganiday hosil undirish maqsadida hamjihatlikda mehnat qilishmoqda va 130 quti ipak qurtlarini tunni-kunga ulab parvarish qilishmoqda.

ijtimoiy muhofaza

Tuman bandlikka koʻmaklashish va aholini ijtimoiy muhofaza qilish Markazi tomonidan Oʻzbekiston Respublikasi Prezidentining 1991-yil 27 maydagi "Oʻzgalar parvarishiga muhtoj yakka-yolgʻizlarni qoʻllab-quvvatlash toʻgʻrisida”gi 2012-sonli Farmoniga va 2011-yil 30-maydagi 1542-sonli qaroriga muvofiq oʻzgalarning parvarishiga muhtoj 143 nafar yakka-yolgʻiz pensioner va nogironlarga xizmat koʻrsatish ishlari amalga oshirilmoqda.

Yakka-yolgʻiz pensionerlar va nogironlardan 18 nafariga 17 nafar ijtimoiy xodim biriktirilgan boʻlib, ular oʻzgalar yordamiga muhtoj kishilarga sidqidildan xizmat qilishmoqda.

Yakka-yolgʻiz pensionerlar va nogironlar ijtimoiy xodimlar yordamidan mamnun boʻlishmoqda.

QIShLOQDAGI AGROFIRMA

"Boʻzyop” OFYning "Olang ovul” mahallasida yashovchi Anvar Tojiboyev "Mikro-kreditbank”ning Mangʻit filialidan 4,5 million soʻmlik imtiyozli kredit olib, parrandachilik fermasi tashkil etishga kirishganida koʻpchilik ferma istiqboliga ishonmagandi. 2011-yilda 5 ming ta tovuq boqish uchun moʻljallangan  qoʻra qurib, "Tojiboyev Oʻrolboy” agrofirmasini davlat roʻyxatidan oʻtkazib, ish boshlagan Anvar Tojiboyev qisqa vaqt ichida parrandachilik yetti xazinaning biri ekanligini amalda isbotladi. Agrofirma oʻz xarajatlarini qoplash bilan birga Anvar Tojiboyevning oila aʼzolari va yana 4 nafar kishi doimiy ish bilan taʼminlandi. Agrofirmada yetishtirilib, ichki bozorimizni toʻldirayotgan parrandachilik mahsulotlari sifatidan xaridorlar mamnun.

www.amunews.uz