ISTIQLOL ILHOMLARI

Jonajon oʻlkam

Tarix sahfasida nomi tabarruk,

Joʻshqin navolarda kuylangan Vatan.

Ilm-u irfonlari shunchalar suyuk,

Dovrugʻi dunyoni titratgan Oʻlkam.

Vatanimning bitta tolmas qanoti-

Qoraqalpoq eli obod, farovon.

Qoratov, Ustyurtning ming sinoatin

Hayratda kuzatib turibdi jahon.

Dalalar xazina – bogʻ-boʻston har yon,

Necha dostonlarga boʻlgulik mavzu.

Alpomish, Barchinlar qayta tugʻilib,

Hurlik kirib keldi Vatanga mangu.

Keling-yey, yurtimga mehmonga keling,

Taxiatosh nuri porloq, charogʻon.

Amu sohillarin bir bora kezing,

Qoʻr toʻkib turibdi Vatan - jonajon!

Tursunboy OʻROZIMBETOV,

Xitoy qishlogʻi.

Oʻynaylik omon-omon

Intilib nurlar tomon,

Kun-kundan yashnar jahon.

Istiqlol bergan davron,

Oʻynaylik omon-omon.

Ilm-u fan, zamin, ochun-

Hammasi yoshlar uchun.

Yigitlar, qizlar durkun,

Oʻynaylik omon-omon.

Zavq olib tinchlik damdan,

Oʻt chaqnab har qadamdan.

Qulf ursin dilda chaman,

Oʻynaylik omon-omon.

Millatlar qatorimda,

Hur-tenglik shiorimda.

Bagʻri keng diyorimda,

Oʻynaylik omon-omon.

Amalda, tilda, soʻzda,

Qish, bahor, yoz-u kuzda.

Vatanni asrab koʻzday,

Oʻynaylik omon-omon.

Tursunboy ABDULLAYeV.

Vatan madhiyasi

Hur Vatanda doʻst, oʻrtoq,

Qoraqalpoq va oʻzbek.

Ahil-inoq yasharlar

Xuddi bir tugʻishgandek.

Gullagan chamandir bu,

Doʻstlarga Vatandir bu.

Yosh-u qari – har kishi,

Yaratuvchilik ishi.

Mard insonning har qachon,

El gʻami – gʻam-tashvishi.

Muruvvatga kondir bu,

Yashnagan boʻstondir bu.

Kim edigu, kim boʻldik,

Erkimiz qoʻlga oldik.

Rejalar tuzib buyuk,

Kelajakka yoʻl soldik.

Zafardan nishondir bu,

Avlodlarga shondir bu.

Qurdik koshona, qasrlar,

Jahon lol qolar asrlar.

Unda bizlarning kelajak –

Yashar navqiron nasllar.

Shijoat, surʼatdir bu,

Bizlarning qudratdir bu.

Ahmad NAFASOV, "Jayxun ilhomlari” NNT raisi.

Ona yurtim

Bepoyon qumlaring, biyday dalalar,

Tarixni eslatgan koʻhna qalʼalar,

"Baday toʻqay”dagi kiyik bolalar,

Barchasi bizniki, aziz Vatanim!  

Boshimda porlagan iqbol quyoshi,

Quvonchdan toʻkilgan koʻzimning yoshi.

Istiqlolimizning yigitlik yoshi,

Barchasi bizniki, aziz Vatanim!

Intilib tobora yuksalish tomon,

Olgʻa bormoqdamiz, borarmiz hamon.

Odil Yurtboshimiz boʻlgay sogʻ-omon,

Barchasi bizniki, aziz Vatanim!

Bu quvonch, bu shodlik barchaga ayon,

Ming yillar boʻlgay-da shundayin ayyom.

Farhod der: bugungi Mustaqil bayram,

Mangu qutlugʻ boʻlsin, aziz Vatanim!

Farhod AVEZOV,

Xitoy qishlogʻi.

VATAN

Ey, mening jannatmakon Oʻzbekistonim,

Toʻrt fasl mujassam aziz boʻstonim.

Moziy va bugunda tilda dostonim -

Buyuk va muqaddassan, mustaqil Vatan!

Buguni va kelajagi buyuksan oʻzing,

Xalqimning yuragida suyuksan oʻzing.

Tomirda qonim-u koʻrarga koʻzim -

Buyuk va muqaddassan, mustaqil Vatan!

Bagʻringga yarashar gullagan bogʻlar,

Xuddi gʻururingdek balanddir togʻlar.

Istiqlol farzandlari koʻnglingni chogʻlar,

Buyuk va muqaddassan, mustaqil Vatan!

Har yutugʻingga qilarman taʼzim,

Har kuning bayram-u boʻlgay toʻy-bazm.

Shukurlarim koʻpdir, Ollohga rozim,

Buyuk va muqaddassan mustaqil Vatan!

Bahodir JUMAMURODOV,

42-sonli maktab direktori.

Vatan bayrogʻi

Sheʼr yozmoqchi edim Vatan haqida,

Vatanga munosib tanlar edim rang.

Oʻylarim osmonda edi gohida,

Oq-oydin orzular sochardi jarang.

Dilimda muhabbat urgandi sabza,

Sogʻinch va sadoqat gullagani dam,

Ilhom ham quyilib keldi shu lahza, -

Senga sheʼr bitildi, azizim - Vatan!

Moviy osmoning, ham oy-u yulduzing,

Oq sahifam uzra moʻralaganda,

Sabza urdi masʼud bir sezim:

Sheʼr - bayrogʻingning rangida.

Ha, dilimning oppoq sahifasida,

Senga boʻlgan mehrim ranglari yorqin.

Sheʼrlarim-bayrogʻingga boʻlmish qasida,

Shul hisdan ilhom joʻsh urdi, inchunun.

Har bir yurak ekan sening bayrogʻing,

Oʻttiz million yurak urar seni deb.

Betakrorim Vatan, suyangan togʻing –

Xalqing borki, kelajagingdir buyuk!

Oʻzing ham Vatanga bayroq boʻla bil,

Elim deb, yurtim deb porla, hilpira.

Sheʼrlarda Vatanni kuyla sidqidil,

Ey Hayratiy, ijod otin qamchila.

Tojiboy DOʻSANOV.

MUBORAK

Tinch oʻlkasan Oʻzbekiston, obod Vatanim,

Koʻz tegmasin nomingga chamanistonim.

Oʻzbegimning gʻururisan hur makonim,

Onamdayin aziz Oʻzbekistonim.

Dil bogʻini yashnatar gul bahoring,

Butun elga dongʻi ketgan oydin yoʻling.

Osmoni tinch, osuda, obod elim,

Muborak boʻlsin senga, hur Istiqloling!

Hurlik yoʻli bergan chiroylaring bor,

Iftixordan xalq koʻziga nur toʻlsin.

Ozod, erkin Vatanim, goʻzal, betakror,

Taraqqiyot odimlaring muborak boʻlsin!

Inobat OTAJONOVA,

38-sonli maktab oʻqituvchisi.

OʻZBEKISTONIM

Zamin koʻksin silab shamollar esar,

Qushlar chugʻurlashib samoni quchar.

Barglar ham shitirlab goʻyo soʻzlashar,

Gul ekib undiray, bogʻ-u boʻstonim –

Goʻzallikda tengsiz Oʻzbekistonim!

Mevalari gʻarq pishadi bogʻida,

Bulbullar sayraydi har butogʻida.

Ming bitta tilsim bor qir-u togʻida

Har yoni gulga kon chamanistonim –

Betakrorim mening - Oʻzbekistonim!

Buyuk erur aziz ajdodlarimiz,

Temur, Manguberdi avlodlarimiz.

Duyoni lol etmish savodlarimiz,

Tafakkur gulshani, ilm-u irfonim –

Zakovatda tengsiz Oʻzbekistonim!

Sevara SOBIROVA,

19-maktabning 8-sinf oʻquvchisi.

OZOD VATANIM

Ortda qoldi ochlik-u xorlik,

Yashagaymiz barchamiz baxtli.

Mangu boʻlgay tinchlik va hurlik,

Ortda qoldi tobelik, zoʻrlik.

Yurtimiz tinch, elimiz obod,

Har bir xonadonda fayz-u baraka.

Vatanimiz erkin, xalqimiz ozod,

Doimo bayram, toʻy-u maʼraka.

Ozod endi Vatanim suyuk,

Qaram boʻlmas oʻzga ellarga.

Oʻtmishimiz qanchalar buyuk,

Alishmaymiz oʻzga ellarga.

Bugun quvonchlarga toʻlmoqda dil,

Vatanim boʻylab quvonchlar kezar.

Xurlikka toʻldi yigirma toʻrt yil,

Quvonch-u shodlik bayrogʻim bezar.

Iroda YeRDAShEVA, 38-sonli maktab oʻquvchisi.