Konstitutsiya — taraqqiyot mezoni, istiqlol poydevori

Amudaryo tumani 8-dekabr bosh qomusimiz qabul qilingan sana keng nishonlandi. Tuman Madaniyat uyida Oʻzbekiston Respublikasi Konstitutsiyasi qabul qilinganining 33 yilligiga bagʻishlangan tantanali bayram tadbiri boʻlib oʻtdi. Tadbir nafaqat bayramona ruhda, balki mamlakatimizning demokratik taraqqiyot yoʻlidagi islohotlari, fuqarolarning huquq va erkinliklarini kafolatlovchi asosiy hujjat – Bosh qomusimizning oʻrni va ahamiyati xususidagi fikr-mulohazalarga boy tarzda oʻtdi.

Tadbirni tuman hokimining birinchi oʻrinbosari Faxriddin Yusupov ochib berdi. U oʻz nutqida u 1992-yil 8-dekabr kuni qabul qilingan Konstitutsiya nafaqat huquqiy asos, balki davlatimizning mustaqil taraqqiyot yoʻlini belgilab bergan tarixiy hujjat ekanini taʼkidladi.

Taʼkidlanganidek, bugun muhtaram Prezidentimiz boshchiligida amalga oshirilayotgan Konstitutsiyaviy islohotlar mamlakatimiz siyosiy, iqtisodiy va ijtimoiy hayotida yangi davrni boshlab berdi. Bosh qomusimizda belgilangan har bir qoida — bugungi hayotimizning bosh mezoni

Tuman prokurori Bahram Masharipov oʻz chiqishida Konstitutsiyaning davlat boshqaruvi, sud-huquq tizimi va jamiyat hayotidagi oʻrniga alohida toʻxtaldi. “Konstitutsiya – bu shunchaki rasmiy hujjat emas, balki har bir fuqaroning huquqlarini himoya qiluvchi, jamiyatda adolat va barqarorlikni taʼminlovchi bosh kafolatdir. Davlat siyosatida qonun ustuvorligini taʼminlash aynan shu hujjatda belgilangan tamoyillarga asoslanadi”, — deya taʼkidladi tuman prokurori. Shuningdek, soʻnggi yillarda amalga oshirilayotgan Konstitutsiyaviy islohotlar, yangilangan Oʻzbekistonning demokratik tamoyillarga tayangan holda rivojlanayotganini misollar bilan tushuntirib berdi.

Tadbir davomida soʻzga chiqqanlar Konstitutsiyaning hayotiy ahamiyatiga alohida toʻxtalib oʻtishdi. Bosh qomusimizda belgilab qoʻyilgan “Inson – davlat uchun emas, davlat – inson uchun” tamoyili bugungi amaliyotda oʻz ifodasini topayotgani eʼtirof etildi.

Bayram tadbiri tuman Madaniyat boʻlimi tomonidan tayyorlangan bayram kontsert dasturi bilan davom etdi. Vatan, tinchlik, doʻstlik va birdamlikni tarannum etgan kuy-qoʻshiqlar, sahna koʻrinishlari tadbir ishtirokchilariga koʻtarinki kayfiyat ulashdi. Madaniyat boʻlimi ijodkorlari, umidli xonandalar va yosh isteʼdodlarning chiqishlari barchaga unutilmas lahzalarni taqdim etdi.

Konstitutsiya – ertangi barqaror hayotning huquqiy kafolati. 33-yil davomida Bosh qomusimiz Oʻzbekistonning davlat qurilishi, siyosiy tizimi, fuqarolik jamiyatini mustahkamlash va inson huquqlarini himoya qilishning bosh tamoyili boʻlib xizmat qilib kelmoqda.

Bugun Konstitutsiyamiz xalq manfaatlariga xizmat qilayotgan, islohotlar va yangilanishlar poydevorini belgilab berayotgan, har bir fuqaroning munosib hayotini taʼminlashga qaratilgan huquqiy kafolatlar majmuasidir.

Bayram tadbiri nafaqat quvonch, balki fuqarolarning Konstitutsiyaga, qonun ustuvorligiga, milliy taraqqiyot yoʻliga boʻlgan ishonchini yanada mustahkamladi.

8-dekabr sanasi - Konstitutsiya kuni – bu umumxalq bayrami, davlatimizning mustaqil yoʻlidagi eng muhim qadamlarni esga soluvchi, har birimizni yanada masʼuliyatli boʻlishga undovchi tarixiy sana.

Charos Arslonova, tuman hokimligining Axborot xizmati rahbari.