Конституция — тараққиёт мезони, истиқлол пойдевори

Амударё тумани 8 декабрь бош қомусимиз қабул қилинган сана кенг нишонланди. Туман Маданият уйида Ўзбекистон Республикаси Конституцияси қабул қилинганининг 33 йиллигига бағишланган тантанали байрам тадбири бўлиб ўтди. Тадбир нафақат байрамона руҳда, балки мамлакатимизнинг демократик тараққиёт йўлидаги ислоҳотлари, фуқароларнинг ҳуқуқ ва эркинликларини кафолатловчи асосий ҳужжат – Бош қомусимизнинг ўрни ва аҳамияти хусусидаги фикр-мулоҳазаларга бой тарзда ўтди.

Тадбирни туман ҳокимининг биринчи ўринбосари Фахриддин Юсупов очиб берди. У ўз нутқида у 1992 йил 8 декабрь куни қабул қилинган Конституция нафақат ҳуқуқий асос, балки давлатимизнинг мустақил тараққиёт йўлини белгилаб берган тарихий ҳужжат эканини таъкидлади.

Таъкидланганидек, бугун муҳтарам Президентимиз бошчилигида амалга оширилаётган Конституциявий ислоҳотлар мамлакатимиз сиёсий, иқтисодий ва ижтимоий ҳаётида янги даврни бошлаб берди. Бош қомусимизда белгиланган ҳар бир қоида — бугунги ҳаётимизнинг бош мезони

Туман прокурори Баҳрам Машарипов ўз чиқишида Конституциянинг давлат бошқаруви, суд-ҳуқуқ тизими ва жамият ҳаётидаги ўрнига алоҳида тўхталди. “Конституция – бу шунчаки расмий ҳужжат эмас, балки ҳар бир фуқаронинг ҳуқуқларини ҳимоя қилувчи, жамиятда адолат ва барқарорликни таъминловчи бош кафолатдир. Давлат сиёсатида қонун устуворлигини таъминлаш айнан шу ҳужжатда белгиланган тамойилларга асосланади”, — дея таъкидлади туман прокурори. Шунингдек, сўнгги йилларда амалга оширилаётган Конституциявий ислоҳотлар, янгиланган Ўзбекистоннинг демократик тамойилларга таянган ҳолда ривожланаётганини мисоллар билан тушунтириб берди.

Тадбир давомида сўзга чиққанлар Конституциянинг ҳаётий аҳамиятига алоҳида тўхталиб ўтишди. Бош қомусимизда белгилаб қўйилган “Инсон – давлат учун эмас, давлат – инсон учун” тамойили бугунги амалиётда ўз ифодасини топаётгани эътироф этилди.

Байрам тадбири туман Маданият бўлими томонидан тайёрланган байрам концерт дастури билан давом этди. Ватан, тинчлик, дўстлик ва бирдамликни тараннум этган куй-қўшиқлар, саҳна кўринишлари тадбир иштирокчиларига кўтаринки кайфият улашди. Маданият бўлими ижодкорлари, умидли хонандалар ва ёш истеъдодларнинг чиқишлари барчага унутилмас лаҳзаларни тақдим этди.

Конституция – эртанги барқарор ҳаётнинг ҳуқуқий кафолати. 33 йил давомида Бош қомусимиз Ўзбекистоннинг давлат қурилиши, сиёсий тизими, фуқаролик жамиятини мустаҳкамлаш ва инсон ҳуқуқларини ҳимоя қилишнинг бош тамойили бўлиб хизмат қилиб келмоқда.

Бугун Конституциямиз халқ манфаатларига хизмат қилаётган, ислоҳотлар ва янгиланишлар пойдеворини белгилаб бераётган, ҳар бир фуқаронинг муносиб ҳаётини таъминлашга қаратилган ҳуқуқий кафолатлар мажмуасидир.

Байрам тадбири нафақат қувонч, балки фуқароларнинг Конституцияга, қонун устуворлигига, миллий тараққиёт йўлига бўлган ишончини янада мустаҳкамлади.

8 декабрь санаси - Конституция куни – бу умумхалқ байрами, давлатимизнинг мустақил йўлидаги энг муҳим қадамларни эсга солувчи, ҳар биримизни янада масъулиятли бўлишга ундовчи тарихий сана.

Чарос Арслонова, туман ҳокимлигининг Ахборот хизмати раҳбари.