Yoshlar – yurtimiz ertasi va taraqqiyot drayverlari

Bugun yurtimiz boʻylab oʻzgacha bir shukuh, yuksak gʻayrat va shijoat nafasi kezmoqda. Boisi, mamlakatimiz boʻylab 30-iyun – Yoshlar kuni munosabati bilan “Yoshlar oyligi”ga start berildi.

Har bir millatning taraqqiyoti, davlatning qudrati va jamiyatning porloq kelajagi toʻgʻridan-toʻgʻri uning yosh avlodga boʻlgan eʼtiboriga, yaratayotgan imkoniyatlarga bogʻliqdir. Bugun Oʻzbekiston aholisining katta qismini tashkil etuvchi yoshlar — yurtimizning eng ulkan boyligi va yangilanishlar drayveri hisoblanadi. Muhtaram Prezidentimiz tashabbusi bilan asos solingan Oʻzbekiston yoshlar ittifoqi tashkil topgan kun – 30-iyun sanasi shunchaki taqvimdagi oddiy bir bayram emas. Bu – har bir yigit-qizga koʻrsatilayotgan yuksak davlat eʼtibori va cheksiz imkoniyatlarning amaliy ifodasidir.

Hozirgi kunda davlatimizning olib borayotgan oqilona siyosatning markazida aynan biz – yoshlarning manfaatlari turibdi. Har bir mahallada Yoshlar yetakchisi tizimining samarali yoʻlga qoʻyilgani koʻplab yigit-qizlarning hayotda oʻz yoʻlini topishiga xizmat qilmoqda. Quvonarlisi, bunday imkoniyatlardan bizning oʻgʻil-qizlarimiz ham unumli foydalanmoqda.

Bunga yorqin misol qilib, Amudaryo tumanida oʻtkazilgan futbol boʻyicha Davlat xavfsizlik xizmati (DXX) kubogi bahslarida bizning Namuna mahallamiz yoshlarining faxrli 3-oʻrinni egallaganini alohida gʻurur bilan taʼkidlash mumkin.

1-iyun kuni boʻlib oʻtgan tantanali taqdirlash marosimi mahallamiz va tumanimiz yoshlarining sportga boʻlgan yuksak qiziqishi hamda irodasining amaliy isboti boʻldi.

Xulosa oʻrnida aytganda, biz – bugungi yosh avlod, tarixdagi buyuk ajdodlarimizning munosib davomchilarimiz. Shuning uchun ham yelkamizdagi masʼuliyatni chuqur his qilgan holda, Yangi Oʻzbekiston va Uchinchi Renessans poydevorini barpo etishda faol ishtirok etishimiz shart. Zero, tumanimiz ravnaqi va yurtimiz istiqboli bizning bugungi intilishimiz va qatʼiyatimizga bogʻliq. Biz shunchaki kuzatuvchi emas, balki jonajon Vatanimiz taraqqiyotining faol ijrochisiga va bunyodkoriga aylanishimiz lozim.

Aziz tengdoshlar, kelajak sari dadil qadam tashlashdan, oʻqib-oʻrganishdan va yurtimiz ravnaqi yoʻlida mehnat qilishdan aslo toʻxtamaylik! Kirib kelayotgan Yoshlar kuni barchamizga muborak boʻlsin!

Muhayyo Ortiqboyeva, Berdaq nomidagi Qoraqalpoq davlat universiteti talabasi