Madaniyat 22.08.2015 👁 2,839

QUTLUGʻ KUN OSTONASIDA

Aslini olganda tiriklikning har bir kuni ulugʻ inoyat, qutlugʻdir. Ammo shunday kunlar boʻladiki, maʼno-mazmuni mohiyatan asrlarga tatiydi.

Xalqimizning asriy orzulari ijobat boʻlib, mustaqil-likka erishilgan kun ana shunday moʻʼtabar kunlarning biridir. Shu boisdan ham xalqimiz 1-sentyabr – Istiqlol bayramini eng ulugʻ, eng aziz bayram sifatida nishonlaydi.

Ayni kunlarda ajdodlarimiz faqatgina orzu qilib yashagan bebaho neʼmat – mustaqillikning qadrini yosh avlodga teran yetkazish, mustaqillikni mustahkamlash, sobiq ittifoq tarkibida qoloq va xomashyo bazasi boʻlib kelgan yurtimizni dunyo havas bilan qarovchi rivojlangan mamlakatga aylantirishgacha boʻlgan 24-yil oraligʻidagi ogʻir, mashaqqatli va sharafli yoʻlni haqqoniy koʻrsatib berish barobarida yurtdoshlarimiz qalbida bugungi dorilomon kunlarimizdan faxrlanish hissini tarbiyalash maqsadida bayramni munosib nishonlashga qizgʻin hozirlik koʻrilayotir.

Biz tuman Madaniyat va sport ishlari boʻlimi boshligʻi Shuhrat Yusupovdan bu borada amalga oshirilayotgan ishlar haqida soʻradik: - Respublikamiz mustaqilligining 24 yilligini munosib nishonlashga tayyorgarlik koʻrish va yuqori saviyada oʻtkazish maqsadida maxsus dasturlar rejasini ishlab chiqdik va amalga oshirmoqdamiz. Xususan, joriy yilning 21-iyulidan 1-sentyabrigacha tumanimizning barcha ovul va mahallalarida, mehnat jamoalarida "Betakrorimsan, yagonasan, ona Vatanim - Oʻzbekistonim” degan ezgu gʻoyani oʻzida mujassam etgan madaniy-maʼrifiy va targʻibot-tashviqot tadbirlarini oʻtkazish dasturlari ishlab chiqildi va amalga oshirilmoqda.

Mazkur tadbirlarimiz istiqlolimizning biz uchun oʻzligimiz, insoniy haq-huquq va qadr-qimmatimizni tiklash, ota- meros urf-odatlarimiz, anʼanalarimiz, qadriyatlarimiz va dunyo tamadduniga ulkan hissa qoʻshgan ulugʻ ajdodlarimiz yaratgan bilimlarga, jamiki maʼnaviy boyliklarga egalik qilish, qayta rivojlantirish imkonini berganligini yaqqol talqin qilib bermoqda. Ona Vatanda hur va ozod umr kechirish baxtini tarannum etuvchi kuy-qoʻshiqlar barchaga birdek zavq bagʻishlamoqda.

Shuningdek, korxona, tashkilotlar, taʼlim muassasalarida, Madaniyat va aholi dam olish markazlarida bayramoldi oʻtkazilayotgan madaniy-maʼrifiy tadbirlarda mamlakatimizning iqtisodiyoti eng tez rivojlanayotgan davlatlar orasida 5-oʻrinni egallagani, Birlashgan Millatlar tashkiloti koʻmagida aniqlangan "Butunjahon baxt indeksi”da Vatanimiz 158 ta mamlakat oʻrtasida 44-pogʻonani, MDH mamlakatlari orasida 1-oʻrinni egallagani, bu yuksalishlarning tub zamiri yurtimizda hukm surayotgan tinchlik, osoyishtalik ekanligi keng tushuntirilmoqda va shu buyuk neʼmatni koʻz qorachigʻidek asrashga daʼvat etilmoqda. Asosiy eʼtiborimiz 28-avgust kuni 3-sonli BOʻSM oʻyingohida Respublikamiz davlat mustaqilligining 24-yillik tantanasiga bagʻishlab oʻtkaziladigan "Betakrorimsan, yagonasan, ona Vatanim – Oʻzbe-kistonim!” deb nomlangan teatrlashtirilgan bayram tomoshasi tayyorgarligiga qaratilgan.

Bayram tomoshasida kelajagimiz - yosh avlod kamoloti yoʻlidagi saʼy-harakatlarimiz samarasi boʻlmish bolajonlar, oʻsmir-yoshlar chiqishlariga, intellektual salohiyatini namoyish etishlariga keng oʻrin berilgan.

Ayniqsa, ajdodlarimizning hayotidan teran joy egallagan milliy urf-odatlarimiz, anʼanalarimiz va qadriyatlarimizni ifoda etuvchi koʻplab sahna koʻrinishlari tayyorlanmoqda.

Bizning xalqimiz – sanʼatsevar, sanʼatkor xalq. Ular yaxshi kuy-qoʻshiq eshitib zavqlanishni ham, kuy-qoʻshiqlarni maromiga yetkazib ijro etishni ham uddalashadi. Demoqchimanki, tumanimizning turli hududlarida faoliyat yuritayotgan Madaniyat va aholi dam olish markazlaridagi badiiy toʻgaraklar aʼzolari ham tumanimiz sanʼatkorlari bilan bir safda bayram tomoshasida oʻzlarining qobiliyatini namoyish etishadi. Ona Vatani-mizni, ozodlikni, obodlikni va baxtiyor zamonamizni ulugʻlovchi sahna koʻrinishlari, kuy-qoʻshiqlar tumanimiz aholisiga manzur boʻlishiga ishonamiz.

Maʼlumki, xalqimizning mil-liy oʻyinlari ham maʼnaviy boyligimiz sirasiga kiradi va har biri oʻziga xos tarbiya vositasi hisoblanadi. Shu boisdan bayram dasturini tuzishda milliy oʻyinlarimizgakeng oʻrin berildi.

Shuningdek butun dunyo ilm-fani rivojiga munosib hissa qoʻshgan alloma bobolarimiz siymosining sanʼatkorlarimiz tomonidan gavdalantirilib, ilmning qadr-qimmati boqiy ekanligi koʻrsatib berilishi ham tomoshabinlarda yaxshi taassurotlarqoldirishiga ishonamiz. Maqsadimiz - ularning merosini oʻrganishga keng yoʻl ochgan mustaqillikni ulugʻlash, qadr-qimmatini tarannum etish.