Maʼnaviyat va maʼrifat maktab ostonasida rivojlanadi

Oʻzbekiston Respublikasi Oliy Majlisi huzuridagi Nodavlat notijorat tashkilotlarni va fuqarolik jamiyatining boshqa institutlarini qoʻllab-quvvatlash Jamoat fondi tomonidan moliyalashtirilgan Amudaryo televideniyesi tahririyatining “Yuksak maʼnaviyatli va ahloqli yoshlar − kelajak poydevori” nomli grant loyihasi doirasida hududlardagi maʼnaviy va maʼrifiy ishlar yaxshi yoʻlga qoʻyilgan maktablar faoliyati keng yoritib borilmoqda.

Amudaryo tumanining Tosh yop ovuli hududida joylashgan 76-sonli maktab ham tumandagi namunali maktablardan biri hisoblanadi. Bugungi kunda umumtaʼlim maktabda 621 nafar oʻquvchiga 56 nafar oʻqituvchi taʼlim-tarbiya berib kelmoqda.

Oʻqituvchilarning 4 nafari oliy, 20 nafari birinchi, 19 nafari ikkinchi toifali hamda 13 nafari mutaxassis oʻqituvchilardir.

Davlatimiz rahbari prezidentlik faoliyatining dastlabki kunlaridan boshlab yurtimizda innovatsion va kreativ fikrlaydigan zamonaviy kadrlar tayyorlash, yoshlarni vatanparvarlik ruhida, yuksak maʼnaviyat egalari etib tarbiyalash, shu maqsadda taʼlim tizimini takomillashtirish masalalariga alohida eʼtibor qaratib kelmoqda.

Ayniqsa bunda, maktab taʼlimi tizimini isloh qilish boʻyicha koʻplab samarali ishlar amalga oshirilmoqda-ki, bugungi kunda ular oʻzining ijobiy samarasi va natijasini koʻrsatmoqda.

Haqiqatan ham, jahondagi rivojlangan davlatlar tarixiga nazar tashlaydigan boʻlsak, ularda jamiyat hayotini oʻzgartirishga qaratilgan islohotlar avvalo taʼlim tizimidan, bogʻcha, maktab, tarbiya masalasidan boshlanganini koʻramiz. Chunki, maktabni oʻzgartirmasdan turib, odamni, jamiyatni oʻzgartirib boʻlmaydi. Taʼlim va tarbiyaning asosi, poydevori bu – maktabdir.

76-sonli maktab qurib bitgazilgan paytda 216 oʻquvchi oʻrniga moʻljallab qurilgan edi. Oʻzbekiston Respublikasi Prezidentining 2022-yil 23-24-fevral kunlari Qoraqalpogʻiston Respublikasiga tashrifi davomida bergan topshiriqlari ijrosini taʼminlash maqsadida mazkur maktab binosiga qoʻshimcha yana 360 oʻquvchi oʻrniga ega bino qurib bitkazildi.

Qurilish ishlari 4 mlrd. 555 mln. 532ming soʻm mablagʻ evaziga pudratchi tashkilot “Temir beton” MChJ tomonidan amalga oshiilib, qisqa muddatlarda yakunlandi.

Ulugʻ maʼrifatparvar bobomiz Mahmudxoʻja Behbudiy “Dunyo imoratlari ichida eng ulugʻi maktabdir” degan fikrni bekorga aytmagan. Sababi, mana shu maskanda inson maʼnan rivojlanib, kamolga yetadi. Oʻzini anglaydi.

76-sonli maktabda oʻquvchilarning taʼlim va tarbiya olishi, maʼnaviy-maʼrifiy tadbirlarni tashkil etib faol qatnashishlari uchun barcha sharoitlar yaratilgan. Oʻquvchilarga malakali ustozlar tomonidan berilayotgan bilim va koʻnikmalar orqali ular turli fan olimpiadalari, bilimlar bellashuvlarida yuqori natijalarga erishib kelishmoqda.

Jumladan, maktabning 11-sinf oʻquvchisi Goʻzal Qadamboyeva ona tili fanidan, Charos Erkinboyeva esa rus tili fanidan olimpiadaning viloyat bosqichida muvaffaqiyatli qatnashib keldilar. Maktabda oʻquvchilar maʼnaviyatini yuksaltirishga, ularni yot gʻoyalardan himoya qilishga qaratilgan koʻplab maʼnaviy-maʼrifiy tadbirlar tashkil etib kelinmoqda.

Ushbu tadbirlar nafaqat oʻquvchilarga maʼnaviy hordiq ulashishga balki, muqaddas qadriyatlarimizga nisbatan hurmat ruhining yanada mustahkamlanishiga xizmat qilmoqda.

F.Eshimbetova.