"TARAQQIYoT KOʻZGUSI" GAZETASI TAHRIRIYaTINING GRANT LOYIHASI DOIRASIDA OʻTKAZILGAN INShOLAR TANLOVI GʻOLIBLARI TAQDIRLANDI

Korruptsiya — jamiyat farovonligining eng xavfli dushmani, davlat taraqqiyotiga toʻsiq boʻluvchi illatdir. Shaxsiy manfaatni koʻzlab pora berish yoki olish, boylik ortidan taʼmagirlik qilib, mansab vakolatini suiisteʼmol qilish, oʻzganing yoki davlat va jamoatchilikning mulkini egallash — bularning barchasi korruptsiyaning eng jirkanch koʻrinishlaridir.

Bugungi kunda korruptsiyaga qarshi kurashish davlatimiz siyosatining ustuvor yoʻnalishlaridan biriga aylangan. Jamiyatning barcha boʻgʻinlarida ushbu illatga qarshi murosasizlik kayfiyatini shakllantirishga qaratilgan targʻibot-tashviqot ishlari olib borilmoqda. Ayniqsa, oʻsib kelayotgan yosh avlod ongida adolat va poklik tuygʻusini mustahkamlash maqsadida keng qamrovli tadbirlar tashkil etilmoqda.

“Taraqqiyot koʻzgusi” gazetasi tahririyati tomonidan Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondining moliyaviy koʻmagida amalga oshirilayotgan “Biz korruptsiyaga qarshimiz!” nomli grant loyihasi ham ana shu illatga qarshi kurashishga qaratilgan. Loyiha doirasida huquqshunoslar, jamoat faollari, nuroniylar va yoshlar ishtirokida uchrashuvlar va davra suhbatlari oʻtkazilib, fuqarolar hamda yoshlar ongida korruptsiyaga qarshi murosasizlik tuygʻusini shakllantirish, huquqiy savodxonlikni oshirish borasida ijobiy natijalarga erishilmoqda.

Grant loyihasi ish rejasiga muvofiq, joriy yil avgust oyining birinchi oʻn kunligida Amudaryo tuman Maktabgacha va maktab taʼlimi boʻlimi bilan hamkorlikda “Korruptsiyasiz jamiyat quramiz!” mavzusida insholar tanlovi oʻtkazildi.

Tanlovda tuman umumtaʼlim maktablarining 5–11-sinflarida tahsil oluvchi 50 ga yaqin oʻquvchi ishtirok etdi. Ular oʻz insholarida korruptsiyasiz jamiyat haqidagi fikr va orzu-istaklarini ifoda etdilar.

Tanlovda “Barkamol avlod” bolalar maktabi toʻgaraklarida shugʻullanuvchi oʻquvchilar faol ishtirok etishdi. Tanlov eʼlon qilingach, toʻgarak rahbarlari tomonidan oʻquvchilarga korruptsiyaning jamiyatga zarari va unga qarshi davlat miqyosida amalga oshirilayotgan ishlar haqida tushunchalar berildi. Savol-javoblar orqali ularning bilimlari sinovdan oʻtkazildi. Insho yozish jarayonida ishtirokchilarga oʻz fikrlarini erkin ifoda etish imkoniyati yaratildi, jarayon maktab pedagoglari tomonidan kuzatib borildi.

Maktab bosqichida “Mental arifmetika” va biologiya toʻgaraklari aʼzolari tomonidan yozilgan eng sara insholar tanlab olinib, “Taraqqiyot koʻzgusi” gazetasi tahririyatining hakamlar hayʼatiga taqdim etildi.

2025-yil 7-avgust kuni grant loyihasi koordinatorlari “Barkamol avlod” bolalar maktabida boʻlib, tanlov gʻoliblarini taqdirlash marosimini oʻtkazdilar. Ular maktab jamoasiga yosh avlod ongida korruptsiyaga qarshi murosasizlik tuygʻusini shakllantirish va iqtidorlarni rivojlantirish borasidagi ishlarida muvaffaqiyat tiladilar.

Tanlov natijalariga koʻra “Barkamol avlod” bolalar maktabining “Mental arifmetika” toʻgaragi aʼzosi Javohir Maqsudov “Korruptsiyasiz jamiyat qurish borasidagi ilgʻor fikrlari uchun” nominatsiyasi boʻyicha 1-oʻringa loyiq deb topildi.

“Korruptsiyaga qarshi kurashish boʻyicha eng yaxshi targʻibotchi” yoʻnalishida esa 55-maktabning 5-sinf oʻquvchisi, “Barkamol avlod” toʻgaragi aʼzosi Oydinoy Ismoilova gʻoliblikni qoʻlga kiritdi. Ushbu yoʻnalishda “Mental arifmetika” toʻgaragi aʼzosi, 31-sonli maktab oʻquvchisi Temurbek Oʻrozmatovga esa 2-oʻrin nasib qildi.

“Korruptsiyaga qarshi kurashishda tengdoshlarini ruhlantiruvchi fikrlari uchun” nominatsiyasiga 38-sonli maktab oʻquvchisi, biologiya toʻgaragi aʼzosi Dinora Fayzullayeva va 40-sonli maktabning 7-sinf oʻquvchisi Hilola Shukurullayevalar sazovor boʻldilar.

Gʻoliblarga “Taraqqiyot koʻzgusi” gazetasi tahririyati tomonidan faxriy yorliq va esdalik sovgʻalari topshirildi.

Robiya Yoʻldosheva