Orolboʻyi mintaqasini rivojlantirish uchun 10 ming dollargacha mikrograntlar ajratiladi
Orol dengizi mintaqasidagi ekologik vaziyatni yaxshilash, iqlim oʻzgarishlarining salbiy oqibatlarini yumshatish hamda mahalliy aholining turmush darajasini yuksaltirish bugungi kunning eng dolzarb vazifalaridan biri sanaladi. Shu boisdan ham mamlakatimizda ushbu yoʻnalishda qator xalqaro tashkilotlar bilan hamkorlikda koʻplab istiqbolli loyihalar hayotga tatbiq etilmoqda. Xususan, Ekologiya va iqlim oʻzgarishi Milliy qoʻmitasi hamda Global ekologik fond koʻmagida amalga oshirilayotgan "Aral Sea Wetlands" loyihasi ana shunday ezgu maqsadlarga xizmat qiluvchi muhim tashabbuslardan biridir.
Mazkur loyiha doirasida Orol dengizi havzasida istiqomat qiluvchi va faoliyat yurituvchi tashabbuskorlarni qoʻllab-quvvatlash maqsadida uskuna va texnika koʻrinishidagi maxsus mikrogrant dasturi uchun arizalar qabul qilish boshlandi. Ajratiladigan grant mablagʻining miqdori 10 ming AQSh dollarigacha etib belgilangan boʻlib, bu tadbirkorlar va fermerlar uchun oʻz gʻoyalarini roʻyobga chiqarishda ulkan imkoniyatdir.
Ushbu nufuzli grant tanlovi haqida aholi va tadbirkorlik subʼektlariga atroflicha maʼlumot berish, ularning loyihadagi faolligini oshirish maqsadida Amudaryo tumani hokimligi binosida yigʻilish tashkil etildi. Tumandagi fermerlar va hokim yordamchilari ishtirokida oʻtgan mazkur muloqot davomida grant loyihasining maqsad va vazifalari, uning talablari hamda taqdim etayotgan imkoniyatlari xususida keng turda maʼlumotlar berildi.
Taʼkidlash joizki, dastur avvalo bioxilma-xillikni asrab-avaylash, yer va suv resurslaridan oqilona foydalanishni boshqarish kabi muhim yoʻnalishlarni oʻzida qamrab oladi. Shuningdek, qayta tiklanuvchi energiya manbalarini joriy etish, mintaqada ekoturizmni rivojlantirish, iqlim oʻzgarishlariga moslashgan innovatsion qishloq xoʻjaligini shakllantirish hamda yashil biznes tashabbuslarini keng qoʻllab-quvvatlash mazkur grant loyihasining asosiy mezonlari etib belgilangan. Bu esa, oʻz navbatida, nafaqat tabiatni asrashga, balki yangi ish oʻrinlari yaratish orqali iqtisodiy barqarorlikni taʼminlashga ham xizmat qiladi.
Loyihaning qamrov doirasi asosan ekologik va iqtisodiy jihatdan yashil innovatsiyalarga koʻproq ehtiyoj sezayotgan hududlarga qaratilgan. Xususan, arizalar Qoraqalpogʻiston Respublikasining Amudaryo va Moʻynoq tumanlarida, shuningdek, Buxoro viloyatining Olot va Qorakoʻl tumanlarida faoliyat yurituvchi fermerlar, xususiy tadbirkorlar, oilaviy biznes vakillari hamda turli yuridik shaxslardan qabul qilinadi. Bu hududlardagi har bir yashil tashabbus butun mintaqa ekologiyasi uchun haroratni moʻʼtadillashtirish va tabiatni tiklashda muhim ahamiyat kasb etadi. Grant tanlovida ishtirok etish istagida boʻlgan talabgorlar uchun arizalarni topshirishning oxirgi muddati 2026-yil 31-iyul etib belgilangan.
Bugungi kunda tabiatni asrash va ekologik toza texnologiyalarni hayotga joriy etish barchamizning oldimizda turgan eng masʼuliyatli vazifalardan biridir. Shu sababli Amudaryo va Moʻynoq tumanlaridagi mirishkor fermerlar va tashabbuskor tadbirkorlarni ana shu masʼuliyatni chuqur his qilgan holda ushbu mikrogrant dasturida faol ishtirok etishga chorlab qolamiz.
Zero, bunday loyihalar nafaqat shaxsiy biznesni rivojlantirish va moddiy-texnik bazani mustahkamlash uchun, balki jonajon diyorimiz tabiatini kelajak avlodlar uchun beshikast yetkazish, Orolboʻyi mintaqasini qayta tiklash va yanada yashnatish yoʻlida xizmat qiladigan eng toʻgʻri va maqsadli qadamdir.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
