“SALOMATLIK UChUN BADANTARBIYa VA 5000 QADAM PIYoDA YuRISh” MARAFONI OʻTKAZILDI

Salomatlik – insonning eng katta boyligi hisoblanadi. Bugungi zamonaviy taraqqiyot ritmida va doimiy stressli vaziyatlarda ana shu boylikni asrab-avaylash, organizmni sogʻlomlashtirish uchun vaqt ajratish qiyin. Lekin Butunjahon Sogʻlikni saqlash tashkilotining tavsiyasi – sogʻlom turmush tarziga muntazam ravishda amal qilish insonni ham maʼnan, ham aqlan chiniqtirishini hisobga olsak, alohida vaqt ajratmay turib ham inson mustahkam salomatlik sohibi boʻlishi mumkin.

Olimlarning hisob-kitoblariga koʻra, salomatlikni belgilovchi omillar 10-15 foiz ekologiyaga, 10-15 foiz genetikaga, 10-12 foiz tibbiyot tizimi darajasiga va 55-60 foiz sogʻlom turmush tarziga bogʻliq ekan. Vaholanki, sogʻlom turmush tarziga amal qilish oʻziga va atrofidagilarga eʼtiborli boʻlish, kundalik sanitariya-gigiyena qoidalariga amal qilish har bir tibbiy madaniyatli insonning burchidir. Butunjahon Sogʻlikni saqlash tashkiloti bayrami – 7-aprel sanasi bilan bogʻliq tadbirlar butun dunyo xalqlarini ana shu burch masʼuliyatini his etib yashashga daʼvat etib keladi. Chunki Jahon Sogʻlikni saqlash tashkiloti maʼlumotlariga koʻra, birgina ekologik muammolar tufayli har yili yer yuzida 13 mln. kishi vafot etadi.

Yer kurrasining 90 foizdan ziyod aholisi nosogʻlom havodan nafas oladi. Qolaversa, global isish, turli tabiat hodisalari va suv tanqisligi insonlar sogʻligiga salbiy taʼsir qilmoqda. Bundan tashqari, notoʻgʻri ovqatlanish, haddan tashqari shirinlikka ruju qoʻyish, kamharakatlilik va semirish yurak qon-tomir, saraton kasalliklarining kelib chiqishiga sabab boʻlmoqda.

Amudaryo tuman tibbiyot birlashmasining sport-sogʻlomlashtirish maydonchasida 7-aprel – Butunjahon salomatlik kuni bayramiga bagʻishlab oʻtkazilgan “Salomatlik uchun badantarbiya va 5000 qadam piyoda yurish” tadbirida Tibbiyot birlashmasining tajribali shifokorlari tomonidan bu haqda batafsil soʻz yuritildi.

Oʻzbekiston Respublikasi Prezidentining tegishli Farmonlari hamda Qoraqalpogʻiston Respublikasi Sogʻlikni saqlash vazirligining koʻrsatma xatida belgilangan vazifalar ijrosini taʼminlash maqsadida Amudaryo tuman Tibbiyot birlashmasi Salomatlik va strategik rivojlanish boʻlimi sport targʻibotchisi Ibodulla Nurimbetov rahbarligida oʻtkazilgan tadbir avvalida ishtirokchilar badanni chiniqtiruvchi mashqlarni bajardilar.

Shundan soʻng, tibbiyot xodimlari Shifokorlar koʻchasi boʻylab 5000 qadam piyoda yurish marafonida qatnashdilar. Ona tabiat bagʻrida, ertalabki musaffo havodan bahramand boʻlib, piyoda yurish marafonida ishtirok etgan 150 nafardan ziyod tibbiyot xodimlari shu kungi ish faoliyatlarini koʻtarinki kayfiyatda, tetiklik bilan boshladilar. Zero, ertalabki badantarbiya mashqlari nafaqat sogʻlom turmush tarzi, balki ijtimoiy va jismoniy faollikning birdan-bir asosidir.

ROBIYa YOʻLDOShEVA.