“DAVLAT TIBBIY SUGʻURTASI MEXANIZMLARINI JORIY ETIShGA OID ChORA-TADBIRLAR TOʻGʻRISIDA”GI PREZIDENT QARORI TAQDIMOTIGA BAGʻIShLANGAN YIGʻILISh OʻTKAZILDI
Mamlakatimizda aholiga tibbiy yordam koʻrsatishning sifati, samaradorligi va ommabopligini oshirish, birlamchi tibbiy-sanitariya yordami koʻlamini kengaytirish, sohaga bosqichma-bosqich tibbiy sugʻurta xizmatini joriy etish, tibbiy xizmat bozorida zamonaviy raqobat muhitini yaratish va shu asosda aholining kafolatlangan va sifatli tibbiy yordam olish imkoniyatini kengaytirish maqsadida 2024-yil 5-sentyabrda Prezidentimizning “Davlat tibbiy sugʻurtasi mexanizmlarini joriy etishga oid chora-tadbirlar toʻgʻrisida”gi 311-sonli Qarori qabul qilingan edi. Unga koʻra, davlat tibbiy sugʻurtasi doirasida aholiga bepul tibbiy xizmatlar koʻrsatish va dori vositalarini taqdim etish davlat byudjetiga toʻlanadigan soliqlar hisobidan amalga oshirilishi belgilab qoʻyilgan. Bunda aholidan sugʻurta uchun qoʻshimcha toʻlov undirilmaydi.
Amudaryo tuman Tibbiyot Birlashmasi faollar zalida Prezidentimizning mazkur qarori taqdimotiga bagʻishlangan kengaytirilgan yigʻilish boʻlib oʻtdi. Unda Tibbiyot birlashmasi huzuridagi koʻp tarmoqli Markaziy poliklinika, shuningdek, hududlardagi oilaviy poliklinikalar, oilaviy shifokorlik punktlari shifokorlari, umumiy amaliyot shifokorlari, ovul va mahalla fuqarolar yigʻinlari raislari hamda faollari, tibbiyot sohasi mutaxassislari ishtirok etdilar.
Yigʻilishni tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova ochdi va olib bordi. U tadbir ishtirokchilariga mamlakatimizda Davlat tibbiy sugʻurtasini bosqichma-bosqich amaliyotga joriy etish borasidagi Prezident Qarori yuzasidan qisqacha maʼlumot berib oʻtdi.
Shundan soʻng Tibbiyot birlashmasi boshligʻi Fahriddin Abdullayev mazkur Qarorning mazmun-mohiyati, aholiga sifatli va kafolatlangan tibbiy xizmat koʻrsatishda qulayliklar yaratish maqsadida ushbu Qaror bilan 2024-yil 1-oktyabrdan Tashkent shahri va Sirdaryo viloyati Davlat tibbiy sugʻurtasi tizimiga oʻtganligi, Qoraqalpogʻiston Respublikasi, shu jumladan Amudaryo tumanida ham 2025-yil 1-yanvardan boshlab aholiga Davlat tibbiy sugʻurtasi tizimi orqali tibbiy xizmat koʻrsatish yoʻlga qoʻyilishi xususida batafsil toʻxtaldi.
Tuman Tibbiyot birlashmasi boshligʻi oʻz soʻzida davlat tibbiy sugʻurtasi mexanizmlarining afzalligi, aholi uchun qulayliklari, kafolatlangan paketlarga nimalar kiritilgani va dori-darmonlar bilan bepul taʼminlanish huquqiga ega fuqarolar elektron tashxislar orqali dorixonalar tomonidan taʼminlanishi haqida soʻz yuritdi. Bundan tashqari, har bir fuqaroda oʻz sogʻligiga oʻzi masʼulligi hissini shakllantirish, aholining tibbiy savodxonligini oshirish, mahalla bilan tibbiyot xodimlari hamkorligi, shoshilinch va rejali ravishda bepul tibbiy xizmat koʻrsatilishi masalalari boʻyicha yigʻilish ishtirokchilariga misollar orqali zarur tushunchalar berdi.
Shu bilan birga, tuman Tibbiyot Birlashmasi tomonidan Davlat tibbiy sugʻurtasi tizimi orqali aholiga tibbiy xizmat koʻrsatishga jiddiy tayorgarlik ishlari olib borilayotgani, bu boʻyicha ovul va mahalla fuqarolar yigʻinlari bilan oʻzaro hamkorlik muhim ahamiyatga ega ekanligi alohida taʼkidlanib, hamkorlikda amalga oshiriladigan vazifalar yuzasidan zarur tushunchalar berildi.
Yigʻilishda davlat tibbiy sugʻurtasini amaliyotga joriy etish borasida aholi oʻrtasida targʻibot-tashviqot tadbirlarin olib borish, tibbiy sugʻurta xizmatining afzalliklari, aholi uchun qulayliklari xususida tushuntirish ishlarini samarali tashkil etish yuzasidan takliflar ham bildirilib, vazifalar belgilab olindi.
Robiya Yoʻldosheva
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
