Мустақиллик байрами арафасида шаҳримиз кўчаларида ободонлаштириш ишлари амалга оширилмоқда
Айни кунларда Амударё туманида энг улуғ, энг азиз байрам – мамлакатимиз мустақиллигининг 33 йиллигига тайёргарлик кўриш ва уни муносиб нишонлаш мақсадида изчил саъй-ҳаракатлар олиб борилмоқда. Асрлар оша шаклланиб, авлоддан-авлодга мерос бўлиб келган миллий қадриятларимиздан бири бу – оммавий байрамлар олдидан юртимизнинг ҳар бир овул ва маҳаллаларида ободонлаштириш тадбирларини ташкил этиш ҳисобланади. Шу маънода Манғит шаҳри ва шаҳар атрофидаги маҳаллаларда, кўчаларда атроф-муҳитни ободонлаштириш, озодалигини таъминлаш мақсадида кўплаб ишлар амалга оширилмоқда. Ушбу хайрли ишларга кенг аҳоли вакиллари ҳам бош қўшгани иш унумини янада оширмоқда.
Хусусан, Дурунки маҳалласида ташкил этилган тадбирларда маҳалла аҳли ўз хонадонлари атрофини тозалаш, ариқ ва йўл четидаги ўт-чимларни чопиб, дарахтларнинг қуриган шохларини кесиш каби ишларда фаол иштирок этмоқдалар. Аҳолининг фаол ва самарали меҳнатлари сабабли хонадонлар олдидаги гулзорлар тозаланиб, саришта қилинмоқда, атрофи янада файзли гўшага айлантирилмоқда. Ўзаро ҳамжиҳатлик, иноқлик асосида ташкил этилган хайрли тадбирлар натижасида маҳалла кўчалари озода, шинам ва обод ҳолга келтирилиб, кўркам қиёфа касб этмоқда. Атроф-муҳитнинг янада саришта, файзли бўлганидан нафақат маҳалла аҳлининг, балки меҳмонларнинг ҳам баҳри-дили очилиши табиий.
Халқ депутатлари Амударё туман Кенгаши депутати Ойбек Бегимовга сайловчилар томонидан билдирилган мурожаатларга кўра, Дурунки маҳалласининг Аҳмад Яссавий кўчасида табиий газ ва электр энергияси таъминотидаги камчиликлар бартараф этилди. Депутат Ойбек Бегимов тегишли соҳа ходимларини жалб қилган ҳолда байрам арафасида маҳалла ҳудудида бир қатор хайрли ишларни амалга оширмоқда.
Маълум бўлишича, Аҳмад Яссавий кўчасидаги аҳолини табиий газ билан таъминловчи қувурларга фуқаролар томонидан ностандарт равишда уланишлар оқибатида айрим носозликлар юзага келган. Хусусан, таянч устунлари белгиланган оралиқларга ўрнатилмаганлиги ва етарли даражада таъминланмаганлиги сабабли табиий газ қувурларида осилиб қолиш ҳолати кузатилган. “Амударётумангаз” газ таъминоти бўлими ходимлари томонидан ушбу камчиликлар жойида бартараф этилди.
Бундан ташқари, аҳоли хавфсизлигини таъминлаш, фавқулодда ҳолатларнинг олдини олиш мақсадида туман Электр тармоқлари корхонаси ходимлари томонидан электр устунлари, электр узатувчи симлар ҳолати текширилди. Албатта, хонадонларга, ижтимоий объектларга электр энергиясини узлуксиз етказиш, аҳоли хавфсизлигини таъминлаш соҳа ходимларининг асосий вазифаларидан ҳисобланади.
Ободонлаштириш тадбирлари давомида Дурунки маҳалласидан ўтувчи асосий йўлларда таъмирлаш ишлари ҳам олиб борилди. Хусусан, йўлнинг таъмирталаб қисмига асфальт қопламалари ётқизилди. Аҳоли турмуш даражасини яхшилаш ва халқни рози қилиш мақсадида олиб борилаётган эзгу ташаббуслар натижасида маҳалла ва кўчалар қиёфаси тобора яхшиланиб, фуқаролар ва транспорт воситалари ҳаракати учун янада қулайлик яратилди.
Дарҳақиқат, атроф-муҳитни обод этиш халқимизнинг бетакрор қадриятларидан бири ҳисобланади. Бу каби тадбирлар чор-атрофни янада обод, покиза бўлишида алоҳида аҳамият касб этиши билан бирга, одамларда якдиллик, ўзгаларга кўмак қўлини узатиш, ҳамжиҳатлик, аҳиллик каби фазилатларнинг янада кучайишига хизмат қилади.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
