12 ЙИЛЛИК МАЖБУРИЙ ТАЪЛИМ - БИЗЛАР УЧУН ЎТА МУҲИМ

Бугунги кунда биз ёшларга берилган имкониятлар, илм олиш учун очилган эшиклар бисёр. Биз фақат улардан унумли фойдаланишимиз керак. Бепул 12 йиллик мажбурий таълим, барча қулайликларга эга ўқув масканлари - барча-барчаси биз ёшлар учун.

Аммо биз ёшлар шу имкониятлардан фойдаланаяпмизми, давлатимиз ғамхўрлигининг қадрига етаяпмизми?

Ҳар куни ўқишга борамиз, бир ўртоғимиз янги кийим кийиб келган бўлса, бориб сўраймиз:

- Қаердан олдинг? Қанчага олдинг? – дея қизиқамиз. Аммо шеър ёд олиб келса; "қаердан ёки қайси китобдан ёд олдинг?”- демаймиз. Уйга бориб:

– Онажон, менга фалон минг сўмлик телефон керак, - деймиз. Нега "менга китоб керак”, – демаймиз. Ўқишга кундан-кун эътиборсиз бўлаяпмиз. Хўш, айб кимда? Ўзларимизда!

Ҳозирги кунда муаммога айланаётган эрта турмуш қуриш масаласи ҳам коллежимиз ўқувчи-ёшларининг давра суҳбатларида, "Ораста қизлар” тўгараги аъзолари иштирокида тез-тез муҳокама қилинмоқда. Бу мавзуларда ҳар ойда 2 маротаба давра суҳбатлари ўтказамиз, суҳбатимизга коллеж қизлар кенгаши раиси ва коллежга бириктирилган шифокор келади. Улар эрта турмушга чиқишнинг тиббий, маънавий, иқтисодий, ижтимоий асоратлари ҳақида тавсия ва тушунчалар беришади.

12 йиллик мажбурий таълим – айниқса биз қизлар учун ўта зарур ва муҳим. Аммо орамизда баъзи қизларимиз бизга яратиб берилган имкониятларни қадрламайди, икки оғиз ширин сўзга учиб, бир умрлик хатога йўл қўйишади. Эртанги куннинг улуғвор орзуларидан воз кечишади, ота-она, Ватан олдидаги бурчларини унутиб қўйишади. Буни тушунганларида эса кеч бўлади. Ахир бу ҳаётда яшашдан мақсад фақат тезроқ турмуш қуриш, фарзандни дунёга келтириш эмас, балки энг аввало ўзинг баркамол, соғлом инсон сифатида шаклланишинг, ҳар томонлама етукликка эришиш, касб-корли, ўзингни ва оилангни иқтисодий, ижтимоий ҳамда маънавий жиҳатдан таъминлашнинг уддасидан чиқа олишинг муҳим. Биз ёшлар буни бир лаҳза бўлсин, унутишга ҳаққимиз йўқ.

Юлдуз ЮСУПОВА, Амударё мелиорация ва сув хўжалиги касб-ҳунар коллежи ўқувчиси.