Ногиронлиги бўлган шахслар учун меҳнат ярмаркаси ташкил қилинди
Ўзбекистонда ногиронлиги бўлган шахсларнинг бандлигини таъминлаш ва уларнинг жамиятдаги иштирокини кенгайтириш мақсадида тизимли ишлар амалга оширилмоқда. Бу борада мустаҳкам ҳуқуқий база яратилган. 2020 йил 15 октябрда қабул қилинган ва 2021 йил 16 январда кучга кирган Ўзбекистон Республикасининг “Ногиронлиги бўлган шахсларнинг ҳуқуқлари тўғрисида”ги Қонуни шулар жумласидандир.
Бундан ташқари, 2021 йил 21 декабрда Президентнинг “Ногиронлиги бўлган шахсларни ҳар томонлама қўллаб-қувватлаш, уларнинг бандлигига кўмаклашиш ҳамда ижтимоий фаоллигини янада оширишга оид қўшимча чора-тадбирлар тўғрисида”ги қарори ҳам қабул қилинган бўлиб, ушбу қарор билан ногиронлиги бўлган шахсларни ишга қабул қилган иш берувчиларга молиявий ёрдам ва солиқ имтиёзлари бериш кўзда тутилган.
Амударё тумани Камбағалликни қисқартириш ва бандлик бўлими томонидан ҳам ногиронлиги бўлган шахсларнинг бандлигини таъминлаш масаласига катта эътибор қаратиб келинади. 14 май куни бўлим биносида ўтказилган меҳнат ярмаркаси ҳам айнан шу тоифа шахсларни ишга жойлаштиришда муҳим восита бўлди.
Туман Камбағалликни қисқартириш ва бандлик бўлими ҳамда “Инсон” ижтимоий хизматлар маркази билан ҳамкорликда ташкил қилинган меҳнат ярмаркасида 39 та корхона ва ташкилотлар ўзларида мавжуд бўлган 339 та бўш иш ўринлари билан иштирок этишди.
Айтиш жоизки, ногиронлиги бўлган шахсларнинг жамиятга мослашуви ва ижтимоий фаоллигини таъминлашда уларнинг иш билан банд бўлиши жуда муҳим аҳамиятга эга. Бандлик ҳар бир инсоннинг ўзини намоён қилиши ва жамият учун керакли эканлигини ҳис қилиши учун ниҳоятда зарурдир. Шу сабабли ҳам мамлакатимизда ногиронлиги бўлган шахсларнинг бандлигини таъминлаш ва уларнинг ижтимоий фаоллигини оширишга қаратилган бир қатор давлат дастурлари амалга оширилмоқда. Бу дастурлар имконияти чекланган юртдошларимизга иш топишда, касб-ҳунарга ўқишда ва тадбиркорлик фаолияти билан шуғулланишда имтиёз ва амалий ёрдамлар беришни кўзда тутади. Иш берувчиларга ҳам ногиронлиги бўлган шахсларни ишга қабул қилганлиги учун субсидиялар ва солиқ имтиёзлари берилиши эса уларнинг ишга киришини янада осонлаштиради.
Амударё туманида ўтказилган меҳнат ярмаркаси орқали 16 нафар ишсиз фуқаролар доимий ишга жойлаштирилди, шундан 2 нафари ногиронлиги бўлган шахслардир. Шунингдек, 4 нафар ногиронлиги бўлган шахслар қайта тайёрлов курсларига ўқишга жалб қилинди.
Бу каби меҳнат ярмаркалари ногиронлиги бўлган шахсларнинг жамиятдаги ўрнини мустаҳкамлаш, уларнинг иқтисодий мустақиллигини ошириш йўлидаги муҳим қадам бўлди.
Амударё тумани Камбағалликни қисқартириш ва бандлик бўлими ташаббуси билан ўтказилаётган меҳнат ярмаркалари нафақат иш изловчилар, балки муассаса, корхоналар ва ташкилотлар учун ҳам фойдали бўлмоқда. Чунки ярмаркалар воситасида иш берувчилар ўз жамоаларига янги ва қобилиятли ходимларни танлаб олиш имкониятига эга бўлишди. Энг муҳими бу каби тадбирлар иш берувчилар ва иш излаётганларни учраштирувчи муҳим платформа вазифасини ўтамоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
