Туман Прокуратураси ташаббуси билан ёшлар учун маданий-маърифий тадбирлар, мусобақалар ташкил қилинди

Маълумки, Президентимиз ташаббуси билан баъзи тоифа ёшлар Прокуратура органлари ходимларига оталиққа бириктирилган эди. Амударё тумани Прокуратураси ходимлари ҳам ўзлари масъул қилиб бириктирилган ёшлар тарбияси, уларнинг бўш вақтларини мазмунли ўтказиш, билим олиб, касб-ҳунар эгаллаб, мамлакат ва жамият тараққиётига ҳисса қўшадиган инсонлар бўлиб вояга етишлари учун зарур амалий ёрдамларни кўрсатиб келмоқда.

Амударё тумани прокурори Азиз Рўзметов ташаббуси билан шу кунларда туманнинг 2-сектори ҳудудида яшовчи, орган ходимларига оталиққа бириктирилган ёшлар иштирокида турли тадбирлар, мусобақалар, маданий-маърифий кечалар ўтказилди.

26 апрель куни эрта тонгдан бир гуруҳ ёшлар туман Прокуратураси ташаббуси билан Хоразм вилоятининг Хива шаҳрига саёҳатга жўнатилди. Ушбу саёҳат дам олиш кунларида ёшларнинг бўш вақтларини мазмунли ўтказиш, қолаверса, ёшлар онгида тарихимизга ҳурмат, ватанпарварлик туйғуларини мустаҳкамлаш ҳамда ички туризмни ривожлантириш мақсадида ташкил қилинди. Туман ҳокимлиги биноси олдидан 60 нафарга яқин ёшлар Хива шаҳрига махсус автобусларда жўнатилди.

Сўнгра яна бир гуруҳ ёшлар туманнинг Қиличбой ҳудудидаги ҳарбий қисмга ташриф буюриб, ҳарбийлар ҳаёти билан яқиндан танишдилар.

Ҳарбий қисмда ёшлар чегарачи ҳарбийлар ҳаёти, уларнинг яшаш шароитлари, ҳарбий техника ва қурол-аслаҳалар, чегара зоналаридаги ажратувчи тўсиқлар ва симларнинг жойлашуви билан яқиндан танишдилар. Айниқса, давлат хавфсизлик хизмати чегара қўшинларининг хизмат давомида фойдаланидаган техникалар, алоқа ускуналари, хизмат итлари ва отлар ёшларда катта тассуротлар қолдирди.

Амударё туманининг Қиличбой овулида жойлашга Давлат хавфсизлик хизмати чегара қўшинларига қарашли ҳарбий қисм раҳбарияти ва бу ерда ўз йигитлик бурчини ўтаётган ҳарбийлар билан учрашув давомида ёшлар Миллий Армия сафида хизмат қилишнинг нақадар шарафли ва масъулиятли бурч эканлигини яна бир бора англаб етдилар. Уларнинг аксарияти келгусида ҳарбий хизмат айнан чегара қисмларида ўташга қарор қилган бўлишса, ажаб эмас.

Қиличбой маданият марказида ҳам мазкур ҳудудда яшовчи Прокуратура органлари ходимларига оталиққа бириктирилган ёшлар ва уларнинг тенгдошлари учун мусиқий-кўнгилочар дастур ташкил қилинди. Ёшларни маданият ва санъатга ошно қилиш, уларнинг ижодий ва интеллектуал салоҳиятини ривожлантириш мақсадида ўтказилган ушбу тадбирда овулнинг иқтидорли ёшлари ўз тенгдошларига қобилиятларини намойиш қилдилар.

Маданият маркази биносида шунингдек, тадбирга ташриф буюрган овул ёшлари учун бўш иш ўринлари ва вакант лавозимлар ярмаркаси ташкил қилинди. Туман прокурори ташаббуси билан ўтказилган меҳнат ярмаркасида 2-сектор ҳудудида яшовчи банд бўлмаган, Прокуратура органлари ходимлари томонидан оталиққа олинган ёшлар иштирок этишди.

Шу куни тушликдан кейин 2-сектор ҳудудида яшовчи, Прокуратура органлари ходимларига оталиққа бириктирилган ёшлар ва уларнинг тенгдошлари учун Амударё тумани Маданият маркази биносида ҳам тадбирлар ташкил қилинди.

Марказ биносига кириш қисмида Амударё тумани Ахборот-кутубхона марказининг китоблар кўргазмаси ҳамда турли мактаблар, мактабдан ташқари таълим муассасаларида ташкил қилинган тўгаракларда ўқувчилар томонидан тайёрланган маҳсулотлар кўргазмаси намойиш қилинди.

Ёшларни китобхонликка жалб қилиш ва мактабдан ташқари тўгараклар орқали тарбиялаш, уларнинг интеллектуал ва маънавий ривожланишида муҳим рол ўйнайди. Китобхонлик ёшларда мустақил фикрлаш, кенг дунёқарашни шакллантириш ва маънавий баркамолликка эришишда асосий омил ҳисобланади. Шунингдек, мактабдан ташқари тўгараклар ёшларнинг ижтимоий кўникмаларини ривожлантириш, уларнинг ижодий салоҳиятини, истеъдодларини намоён қилиш учун зарур шароитларни яратади.

Сўнгра иштирокчи ёшлар маданият марказининг томошалар залига таклиф қилиниб, улар учун ватанпарварлик руҳидаги концерт дастури намойиш қилинди.

Таъкидлаш жоизки, бу каби маданий тадбирлар, айниқса ёшлар учун ташкил этиладиган концертлар, миллий ғурур ва ватанпарварликни мустаҳкамлашда муҳим роль ўйнайди. Бу каби тадбирлар нафақат ёшларнинг бўш вақтларини мазмунли ўтказиш, балки уларни ватанга муҳаббат ва садоқат руҳида тарбиялашга ҳам хизмат қилади. Ёш эстрада юлдузлари ва ҳаваскорлар иштирокида ижро этилган куй-қўшиқлар халқлар ўртасидаги дўстлик ва ҳамжиҳатлик, тинчлик ва тотувлик, юртга садоқат ва муҳаббат туйғулари тараннум этилди.

Инсон камолотида жисмоний тарбия спортнинг ҳам ўрни алоҳида. Айниқса, спорт билан шуғулланган ёшлар нафақат жисмонан соғлом, балки иродали, ўзига ишончи баланд бўлади. Бу эса, ўз навбатида, жамиятнинг турли соҳаларида уларнинг муваффақиятли фаолият юритишларига замин яратади. Шу мақсадда турли мусобақалар, спорт тадбирлар ўтказиб келинмоқда. Прокуратура органлари ходимларига оталиққа бириктирилган ёшлар ва сектор ҳудудидаги уюшмаган ёшлар иштирокида туман болалар ва ўсмирлар спорт мактабида ўтказилган кураш мусобақаси муросасиз беллашувларга бой бўлди.

Бу каби спорт мусобақалари ва тадбирлар ёшларни фаолликка ундаб, уларни ижтимоий фаолликка чақиради. Туман прокуратураси, Ёшлар ишлари агентлиги туман бўлими, болалар ва ўсмирлар спорт мактаби ва бошқа ҳамкор ташкилотлар билан биргаликда ташкил қилинган кураш мусобақаларида бир неча вазн тоифалари бўйича ўғил ва қиз болаларнинг куч ва чаққонликлари синовдан ўтказилди.  

Бу каби спорт тадбирлари ёшларни жиноятчиликдан узоқлаштиришда, уларнинг маънавий камолотида муҳим роль ўйнайди. Бундай тадбирлар ёшларнинг жамиятдаги ўрнини мустаҳкамлашга ва уларнинг келажакдаги муваффақиятларига замин ҳозирлашга ҳам хизмат қилади. Мусобақа сўнгида ғолибларга ташкилотчиларнинг эсдалик совғалари, диплом ва медаллар топширилди.

Прокуратура органлари хизматчиларига оталиққа бириктирилган ёшлар учун Амударё тумани Прокуратураси ташаббуси билан ташкил қилинган тадбирлар тумандаги 21-сонли Болалар мусиқа ва санъат мактабида ҳам давом этди.

Бу ерда ҳам туман Ахборот-кутубхона марказининг китоблар кўргазмаси ҳамда 21-сонли Болалар мусиқа ва санъат мактабида ташкил қилинган тўгаракларнинг фаол аъзолари томонидан тайёрланган қўл меҳнати маҳсулотлари кўргазмаси намойиш қилинди. Тўқувчилик, тикувчилик, рассомлик, дурадгорлик тўгаракларининг аъзолари томонидан тайёрланган санъат асарлари, кашталар, қуроқлар, уй-рўзғор буюмлари иштирокчиларда қизиқиш уйғотди ва ёшларни ҳам касб-ҳунар эгаллашга чорлади.

Сўнгра мактабнинг тантаналар залида концерт дастури ташкил қилинди. Айтиш жоизки, мусиқа инсон руҳиятига кучли таъсир кўрсатади ва бу таъсир турли тадқиқотларда кўп марта исботланган. Мусиқа терапияси, масалан, стрессни камайтириш, кайфиятни яхшилаш ва ҳатто жисмоний оғриқларни енгиллаштириш учун ишлатилади.

Ёшларнинг руҳий ва маънавий ривожланишида мусиқа ва санъатнинг ўрни беқиёсдир. Мусиқа, рассомлик, адабиёт ва бошқа санъатнинг бошқа турлари ёшларга ўзларини ифода этиш ва ижодий фикрлаш учун кенг имкониятлар яратади.

Амударё тумани Прокуратураси ва ҳамкор ташкилотлар иштирокида ташкил қилинган ушбу тадбирлар унда иштирок этган ёшларда улкан таассуротлар қолдирди.