Қорақалпоғистон Республикаси Вазирлар Кенгаши Раиси ўринбосари Расул Зарикеев иштирокида сайёр қабул бўлиб ўтди

28 март куни Амударё туманининг Уйшин маҳалласи ҳудудидаги маданият марказида Қорақалпоғистон Республикаси Вазирлар Кенгаши Раисининг туризм, маданият, маданий мерос ва оммавий коммуникациялар масалалари бўйича ўринбосари Расул Зарикеев иштирокида сайёр қабули бўлиб ўтди.

Сайёр қабулда туман ҳокимининг инвестиция ва ташқи савдо бўйича ўринбосари Фаҳриддин Юсупов, ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодир Камолов, тумандаги барча корхона-ташкилотлар масъуллари, Қангли, Қумёп, Қипчоқ, Дарё бўйи ҳамда Уйшин овул ва маҳаллалар фуқаролар йиғинлари раислари, ҳоким ёрдамчилари, хотин-қизлар фаоллари, ёшлар етакчилари ҳамда ҳудудлардаги фуқаролар иштирок этдилар.

Қабул жараёнида эски трансформаторларни янгисига алмаштириш, ички йўлларни, кўприкларни таъмирлаш, боқча ва мактаб қурилиши, ер олиш масаласи, моддий ёрдам бериш каби долзарб масалалар бўйича мурожаатлар келиб тушди.

Хусусан, фуқаро Лола Ўтегенова фойдаланиб келаётган 8 сотих ерини ўз номига расмийлаштириб бериш ҳақида, Бекберган Кутлимуратов Уйшин маҳалласи ҳудудида янгидан қишлоқ врачлик пунктини ташкил этишда амалий ёрдам бериш масаласида, Карим Атажанов Уйшин маҳалласи катта йўлидаги учта кўприкни таъмирлашда амалий ёрдам бериш ҳақида мурожаат қилдилар. Шунингдек, фуқаро Фарход Бегмуратов ички йўлларни шағаллаштиришда амалий ёрдам сўраб, Урозбой Айтбоев Уйшин маҳалласи ҳудудида давлат мактабгача таълим ташкиолтини ташкил қилишда, Фарҳод Бекчанов эса ҳудуддаги 75-сонли мактабга қўшимча синфлар ва спорт зали куриб бериш масаласида амалий ёрдам сўраб мурожаат қилдирлар.

Маҳаллада яшовчи Марям Давлетбаева даволаниши учун амалий ёрдам бериш, Мансур Юлдашев уй-жойи яқинидаги катта кучланишли электр симёғочни бошқа жойга кўчириш, Нодир Аметов эски трансформаторни таъмирлаб бериш ёки янгидан ўрнатиб бериш, Худаёр Балтабаев Қанли овулидаги ички кўчалар таъмирталаб аҳволга келиб қолганлиги сабабли кўчаларга тош ётқизиб бериш ҳамда 67-сонли мактабга спорт зали ҳамда Қанжиғали аҳоли пунктига боғча қуриб бериш масаласида, фуқаро Хидирбой Артиков эса Уйшин маданият уйи ёнидаги электр устунларини алмаштириб бериш ҳамда пилла пулини олишда амалий ёрдам сўраб мурожаат қилдилар.

Сайёр қабул жараёнида турли масалалар юзасидан аҳоли вакиллари томонидан масъулларга жами 30 га яқин мурожаатлар йўлланди. Мурожаатлардаги айрим масалалар қабул жараёнининг ўзида ечимини топган бўлса, айрим масалалар бўйича фуқароларга тегишлича тушунтиришлар берилди, қолган масалалар бўйича ўрганиш ҳамда муаммоларни бартараф қилиш бўйича корхона-ташкилотлар масъулларига тегишли топшириқлар берилди.

Таъкидлаш жоизки, давлат органлари ва корхона-ташкилотлари раҳбарларининг аҳоли вакиллари билан юзма-юз суҳбат қуриб, уларнинг муаммоларини ўрганиши ва бартараф этишга амалий ёрдам бериши инсонларнинг ҳаёт тарзининг яхшиланишига, давлат сиёсатига бўлган ишончининг янада ошишига хизмат қилади.

Чарос Арслонова, туман ҳокимлигининг Ахборот хизмати раҳбари.