52-СОНЛИ МАКТАБДА "ТАРАҚҚИЁТ КЎЗГУСИ" ГАЗЕТАСИ ТАҲРИРИЯТИ ТОМОНИДАН “МАЪНАВИЯТ КУНИ” ДОИРАСИДА СУҲБАТ ЎТКАЗИЛДИ

Мамлакатимизда ёшларни ҳар жиҳатдан баркамол қилиб тарбиялашдек долзарб вазифани амалга ошириш жараёнида уларни маънавий-руҳий жиҳатдан етук инсонлар қилиб тарбиялашга алоҳида эътибор берилмоқда. Боиси, ота-боболаримиз “билаги зўр бирни, билимли зўр мингни йиқади”, деб бежизга айтмаган.

Ёшларни маънавий камол топтиришда теран илдизлардан сув ичган азалий қадриятларимизнинг, урф-одатларимизнинг ўрни алоҳидадир. Шу билан бир қаторда бу борада ёшларнинг кўнгил кўзини очадиган, ўзлигини англашга чорлайдиган бадиий асарлар ўқишга жалб этиш, маънавият тарғиботчилари билан учрашувлар ташкил этиш ҳам муҳим ўрин тутади.

Бунингдек хайрли вазифа ижросига ҳисса қўшиш мақсадида Амударё туманининг “Тараққиёт кўзгуси” газетаси таҳририяти амалга ошираётган “Билимли ва маънавиятли ёшлар билан – Учинчи Ренессанс сари” грант лойиҳаси доирасида ёшларнинг зиёлилар, шоир ва ёзувчилар, санъаткорлар билан учрашувлари ташкил этилмоқда ва уларга маънавий озиқ улашилмоқда.

Яқинда ана шундай тадбирлардан бири тумандаги 52-сонли мактаб ўқитувчилари, ўқувчилари иштирокида ўтказилди. Дўстона, самимий суҳбатда мазкур мактаб ўқитувчилари, ўқувчиларидан бир гуруҳи, Ўзбекистон Ёзувчилар уюшмаси, Журналистлар ижодий уюшмаси аъзоси, Қорақалпоғистонда хизмат кўрсатган журналист, “Ватан фидойиси” кўкрак нишони соҳибаси, 8та шеърий, насрий асарлар муаллифи, “Тараққиёт кўзгуси” газетаси махсус мухбири Робия Йўлдошева, туманимизда илк бор Ўзбекистон Ёзувчилар уюшмаси аъзоси бўлган, қатор шеърий китоблар муаллифи Зулфия Оллаёрова, “Тараққиёт кўзгуси” газетаси махсус мухбири, Ўзбекистон Журналистлар ижодий уюшмаси аъзоси, иккинчи даражали “Меҳнат фахрийси” кўкрак нишони соҳибаси Ойгул Ражабовалар иштирок этдилар.

Тадбирда дастлаб “Маънавият куни” доирасида юртимизда ҳуқуқий-демократик давлат, фуқаролик жамияти қуриш, ёшларга замонавий илм-фанни чуқур сингдириш, улар кўнглида эл-юртга садоқат ва миллий ғурур туйғуларини юксалтириш, янги Ўзбекистонда амалга оширилаётган ҳаётбахш ислоҳотларни кенг тарғиб этиш мақсадида суҳбат олиб борилди.

Ижодкорларнинг ижод намуналаридан тинглаш учрашувга йиғилганлар учун янада завқли бўлди. Робия Йўлдошева, Зулфия Оллаёрова, Ойгул Ражабова, мазкур мактаб ўқитувчиси, узоқ йиллардан бери мазмунан бой шеърлари билан танилган Гулмирза Бобожоновларнинг шеърларини барча зўр қизиқиш билан тингладилар.

Аллома “Ўқиганим ва билганим сари ўқимаганим ва билмаганим қанчалар кўп эканлигини тушуниб, хижолат тортаман”, деганида нақадар ҳақ эди. Ҳа, биз қанча ўқисак, тингласак, шунча шууримиз ойдинлашади, маънавиятимиз бойийди.

Мазкур суҳбатда ўқилган шеърлар ҳам тингловчилар томонидан қизғин қарши олингани бежиз эмас. Шунингдек, ўқитувчиларни, ўқувчиларни қизиқтирган саволларга ижодкорлар томонидан батафсил жавоблар берилди.

Суҳбат сўнгида мактаб директорининг маънавий-маърифий ишлар бўйича ўринбосари Зарифбой Эшниёзов мактабга учрашув учун ташриф буюрган ижодкорларга самимий миннатдорчилик билдирди ва ижодларига барака тилади.

Давра суҳбати таассуротларга бой бўлди.

Севара ИСМОИЛОВА.