Янги сув тозалаш иншоотининг қурилиши бошланди

Бугунги кунда мамлакатимизда аҳолини тоза ичимлик суви билан таъминлаш энг устувор масалалардан бири сифатида қаралиб, бу борада тизимли ишлар амалга оширилмоқда.

Маълумки, аҳолини ичимлик суви таъминлаш борасида туманимизда ҳам муаммо ва қийинчиликлар кўп ҳолатларда учраб туради. Манғит сув тозалаш иншоотининг янгидан қурилиши сув таъминоти бўйича учрайдиган қатор муаммоларни бартараф қилиши кутилмоқда. Жорий йилнинг 13 февраль санасида туманимиздаги Қипчоқ ОФЙ ҳудудида сув тозалаш иншооти қурилишининг тамал тоши қўйилди.

Тадбирда туман ҳокими Собир Хўжаметов, секторлар раҳбарлари, ҳоким ўринбосарлари, қурувчи пудратчи ташкилот ходимлари, овул ва маҳаллалар оқсоқоллари, оммавий ахборот воситалари вакиллари иштирок этдилар.

Тадбирда туман ҳокими Собир Хўжаметов сўзга чиқиб, давлатимиз раҳбарининг Қорақалпоғистон Республикасининг Амударё, Беруний, Қораўзак, Қўнғирот, Нукус ва Мўйноқ туманларидаги аҳоли ва хўжалик юритувчи субъектларнинг сифатли ичимлик суви таъминотини янада яхшилаш, шунингдек, Осиё тараққиёт банки билан ҳамкорликни кенгайтириш мақсадида “Осиё тараққиёт банки иштирокида «Ўзбекистоннинг ғарбий қисмида ичимлик суви таъминоти тизимларини ривожлантириш» лойиҳасини амалга ошириш чора-тадбирлари тўғрисида” қарори бу борадаги ишларда муҳим дастуруламал бўлаётганини таъкидлади.

Мазкур қарорга асосан Амударё туманида 2024-2025 йилларда “Осиë тараққиëт банки” кредит маблағлари хисобидан жами 38,58 млн доллар маблағ ичимлик сув таъминотини яхшилаш белгиланган.

Тадбирда сўзга чиққан қурувчи пудратчи ташкилот “Оби хаёт инжиниринг" МЧЖ раҳбари Раҳимбой Раҳимовнинг таъкидлашича, лойиҳа доирасида Амударё тумани учун қуввати 40 минг м3/сут бўлган «Манғит» сув тозалаш иншоотини янгидан қуриш режалаштирилган. Шу мақсадда "Оби хаёт инжиниринг" МЧЖ ва "Уй-Жай Қурилис" МЧЖ билан 12,98 млн долларлик шартнома имзоланган. Бугунги кунда шартомага асосан ишчи лойиҳа-смета ҳужжатлари ишлаб чиқилиб, қурилиш монтаж ишларини олиб бориш пудратчи ташкилот томонидан амалга оширилмоқда.

Шунингдек, туман ҳокимининг қурилиш масалалари бўйича ўринбосари Баҳодир Эрназаров томонидан берилган маълумотларга кўра “Осиë тараққиëт банки” томонидан ажратилган 25,6 млн доллар кредит маблағлар ҳисобидан «Амударё туманининг ичимлик сув таъминотини яхшилаш» лойиҳаси доирасида 68,5 км етказиб берувчи магистраль сув тармоқлари ва 289,2 км ички ичимлик сув тармоқлари ва 3 та ичимлик сув иншоотларини қуриш ва реконструкция қилиш ишлари режалаштирилган.

Тадбир иштирокчилари Манғит сувни қайта тозалаш иншоотининг тамал тошини қўйдилар. Ушбу хайрли иш орқали туманимиз аҳолисини узоқ йиллардан бери қийнаб келаётган сув таъминоти борасидаги муаммолар бартараф қилинишини таъкидладилар. Шундан сўнг Юсуф Эшон бобо жомеъ масжиди имом-хатиби Абдураҳмон Матсафаев сўзга чиқиб, бутун туманимиз аҳлини бошланаётган хайрли иш билан табриклади ҳамда қурувчиларнинг ишларига ривож, муваффақият тилади.

Чарос Арслонова, туман ҳокимлигининг Ахборот хизмати раҳбари.