“МАҲАЛЛАДА ДУВ-ДУВ ГАП” ТАДБИРИ ЎТКАЗИЛДИ

Якунланган йилнинг 22 декабрида Президент Шавкат Мирзиёев раислигида Республика Маънавият ва маърифат Кенгашининг кенгайтирилган йиғилиши бўлиб ўтди. Маънавият ва маданият фаоллари, адабиёт ва санъат намояндалари, шунингдек вазирлар, ҳокимлар иштирок этган йиғилишда ижитмоий соҳани, хусусан, маънавият ва маърифат, таълимни янги босқичга кўтариш борасида Президентимиз нутқ сўйладилар ва бу борада амалга оширилиши лозим бўлган чора-тадбирларга кенг тўхталдилар, глобаллашув жараёни шиддат билан кечаётган тинчлик-осойишталигимизга таҳдидлар тобора кучаяётган, вазиятда айнан миллат фидойилари - уйғоқ қалбли зиёлилар, шоир ва адиблар, санъат намояндалари, маънавият ва маърифат соҳаси ходимлари жасорат билан майдонга чиқиши зарурлигини таъкидладилар.

Ушбу топшириқлар ижросини таъминлаш мақсадида республикамизнинг барча ҳудудларида “Янги ҳаёт учун, янги Ўзбекистон учун” шиори остида “Маҳаллада дув-дув гап” тарғибот тадбирлари ўтказилмоқда. Тадбирларда янги Ўзбекистонни бунёд этиш йўлида амалга оширилаётган кенг кўламли ислоҳотлар, эришилаётган ютуқлар халқимизга етказилиб, уларнинг кўнглида Ватан тақдирига дахлдорлик ҳиссини юксалитиришга , фаоллигини оширишга эришилмоқда.

Жорий йилнинг 4 январида Амударё тумани Маданият бўлими томошалар залида ушбу йўналишда “Маҳаллада дув-дув гап” деб номланган маънавий-маърифий, маданий тадбир ўтказилди.

Тадбирда Республика Маънавият ва маърифат маркази туман бўлинмаси бошлиғи Ислом Маткаримов, Қорақалпоқ Давлат университети профессори Жубатқан Сағиндиқов, туман ҳокими ўринбосари, оила ва хотин-қизлар бўлими бошлиғи Гўзал Собурова, Ўзбекистон Ёзувчилар уюшмаси аъзоси, таниқли ижодкор, таълим фахрийси Турсунбой Абдуллаев, “Юсуф Эшон бобо” жомъе масжиди имом хатиби Абдураҳмон Матсапаев, тумандаги хаваскор ижодкорлар, фаол нуронийлар, фуқаролар йиғинлари хотин-қизлар фаоллари, ёшлар етакчилари иштирок этдилар.

Тадбирда Гўзал Собурова, Жубатқан Сағиндиқов, Турсунбой Абдуллаев, Абдураҳмон Матсапоевлар маънавият ва маърифатнинг маъно-мазмуни, унинг инсон ва жамият ҳаётидаги ўрни, аҳамияти хусусида, халқимиз маънавиятини юксалтириш, айниқса, ёш авлоднинг қалби ва онгини турли зарарли ғоя ва мафкуралар таъсиридан сақлаш борасида маърузалар қилдилар.

Маърузаларда Президент раҳбарлигида ўтказилган видеоселектор йиғилишида миллий ғояни ривожлантириш, аёлларнинг таълим олиши ва касб-ҳунар эгаллашига эътиборни кучайтириш, маънавият ва маърифат масканлари, маданият марказларини ишга тушириш, театр ва кино санъатини ривожлантириш борасида қатор ташаббуслар илгари сурилгани алоҳида эътироф этилди.

Ҳақиқатан ҳам, Президентимиз таъкидлаганларидек, жаҳон миқёсида тараққиёт суръатлари шиддатли тус олган, ўта зиддиятли жараёнларнинг таъсири мамлакатимизда ҳам сезилаётган бир вақтда маънавиятга, маърифатга юксак эътибор қаратиш ҳар қачонгидан ҳам муҳимдир.

Йиғилганлар маърузалар орасида туман Маданият бўлимига қарашли ижодий жамоалар вакиллари ижросида миллий меросимиз бўлган халқ қўшиқлари ва рақсларини мароқ билан томоша қилдилар.

Тадбир бундай тарзда ташкил этилгани бежиз эмас. Боиси санъаткорлар, ёзувчи, шоирлар, зиёлилар айнан маънавий тарбия тарғиботчилари ҳисобланишади.

“Янги ҳаёт учун, Янги Ўзбекистон учун” ғоясини ифода этган “Маҳаллада дув-дув гап” маънавий-маърифий, маданий тарғибот тадбири барча иштирокчиларда улкан таассуротлар қолдирди.

Ойгул РАЖАБОВА.