Поччасини пичоқлаган амударёлик фуқаро 7 йилга қамалди

Мамлакатимиз суд-ҳуқуқ соҳасида амалга оширилаётган ислоҳотлар натижасида судлар билан халқ ўртасидаги буюрократик тўсиқларга барҳам берилаётгани бугун ўзининг ижобий самарасини кўрсатмоқда. Кўплаб жиноий, маъмурий ишлар бевосита халқ вакиллари иштирокида, очиқ, холис ва шаффофлик тамойили асосида кўриб чиқилаётгани боис, халқимизнинг суд идораларига ишончи тобора ортиб бормоқда.

Жорий йилнинг 11 декабрь санасида Амударё тумани ихтисослаштирилган мактаби биносида бўлиб ўтган жиноят ишлари бўйича Амударё туман судининг очиқ сайёр суд мажлиси ҳам иштирокчилар томонидан холислик, очиқлик ва ошкоралик асосида ўтказилгани қайд этилди.

Жиноят ишлари бўйича Амударё туман суди раиси Асқар Сафаров раислигида, судья ёрдамчиси Фазилат Юлдашева ва Фазилат Эшмановаларнинг котиблигида, давлат айбловчиси, Амударё туман прокурорининг ёрдамчиси Санжар Абдуллаевлар ва судланувчининг адвокати Ўринбой Ўразметовлар иштирокида ўтган сайёр суд мажлисида Ўзбекистон Республикаси Жиноят Кодексининг 104-моддаси 2-қисми “в” ва “л”, яъни қасддан баданга шикаст етказиш бандлари бўйича айбдор деб топилган шахс Маъмур Самандаров (исм-шарифлар ўзгартирилди)га оид жиноят иши кўриб чиқилди.

Очиқ сайёр суд мажлисида баён қилинишича, судланувчи Маъмур Самандаров ўзининг олдиндан мавжуд бўлган қасди, яъни 2023 йилнинг март ойида Амударё туманининг маҳаллаларидан бирида яшовчи туғишган опаси Гулсара Самандаровани турмуш ўртоғи Илҳом Жумабоев оилавий келишмовчиликлар туфайли уриб, тан-жароҳати етказгани сабабли, поччасидан қасд олиш мақсадида яшаш уйидан ошхона пичоғини олиб унинг уйига борган ва қайнисининг олдига чиқиб келган Илҳом Жумабоевнинг танасининг турли жойларига қўлидаги ошхона пичоғи билан бир неча марта уриб, қасддан тан-жароҳати етказган ва ҳодиса жойидан қочиб, яширинган.

Илҳом Жумабоев туман тиббиёт бирлашмасининг жонлантириш бўлимига олиб борилиб, биринчи тиббий ёрдам кўрсатилган. Тиббиёт бирлашмасининг 2023 йил 20 июнь кунги тиббий маълумотномасида жабрланувчи Илҳом Жумабоевга “кўкрак қафаси, қорин олд девори санчилган жароҳати, ўнг томон чов соҳаси санчилиб-кесилган жароҳати, иккала билаклари кўплаб санчилиб-кесилган жароҳатлари, посттравматик, постгеморрагик шок 2-3-даражаси” ташхиси қўйилган.

Жабрланувчи Илҳом Жумабоевга нисбатан тайинланган судга оид тиббий экспертизанинг 330-сонли хулосасида, унга “ўнг елка, иккала билаклари, кўкрак қафаси ўнг томони, қорин олд девори ва чов сохаларида кўплаб санчилиб-кесилган жароҳатлари, жароҳатдан сўнг қон кетишдан кейинги шокнинг 2-3-даражаси, артериал босимнинг ва пульснинг пасайиши, ўнг билаги қўйиб юборувчи терисининг фалажи ва тан-жароҳатлари санчилиб кесувчи буюм, яъни пичоқ таъсирида етказилган жароҳатлар ташҳиси қўйилган. Барча ҳодиса тафсилотлари бир-бирининг вақтига тўғри келиши ҳамда етказилган жароҳатлар ҳаёт учун хавфли бўлган оғир тан-жароҳатлари гуруҳига кириши кўрсатилган.

Ошкоралик, очиқлик ва шаффофлик асосида бўлиб ўтган очиқ сайёр суд мажлисида гувоҳларнинг кўрсатмалари тингланиб, тиббий экспертиза хулосалари ва судланувчи қаршисига тўпланган далиллар атрофлича муҳокама этилди.

Суд томонидан судланувчи Маъмур Самандаровга жазо тайинлашда унинг айбига тўлиқ иқрор бўлганини, қилмишидан пушаймон бўлгани, ҳали ёш эканлигини жазосини енгиллаштирувчи ҳолатлар деб, жиноятда жазосини оғирлаштирувчи ҳолатлар йўқ, деб ҳисоблаб, 7 йил озодликдан маҳрум қилиш жазоси тайинланди.

Равшан БАҲРОМОВ.