“Кексалар учун туризм ойлиги” доирасида Хива шаҳрига саёҳат ташкил этилди

Ўзбекистон Республикаси Вазирлар Маҳкамасининг 2020 йил 28 майдаги қарори билан тасдиқланган “Кексаларни давлат томонидан қўллаб-қувватлаш тизимини янада такомиллаштириш бўйича чора-тадбирлар дастури”га мувофиқ мамлакат бўйлаб кекса авлод вакилларини саёҳат қилишга рағбатлантириш мақсадида “Кексалар учун туризм ойлиги”ни ташкил қилиш вазифаси белгиланган. Шундан буён ҳар йили ноябрь ойида кексалар учун туризм ойлиги ўтказиб келинади.

Мазкур ойлик доирасида барча овул ва маҳаллаларда режа асосида кекса отахону-онахонлар учун диёримиздаги диққатга сазовор ва тарихий масканларга саёҳатлар ташкил этилади. Жорий йилда ҳам ушбу анъанага мувофиқ амударёлик нуронийлар мамлакатимиз бўйлаб саёҳатга чиқмоқдалар.

Мамлакатимизда бугунги кунда кекса авлод вакилларини ижтимоий ҳимоя қилиш, уларга эътибор ва ғамхўрликни кучайтириш, уларнинг турмуш шароитини яхшилаш, фаол ва мазмунли ҳаёт кечиришларини таъминлаш, бой ҳаётий тажрибасидан кенг фойдаланишга алоҳида эътибор қаратилмоқда. Нуроний отахон ва онахонларимизга қаратилаётган эътиборни янада кучайтириш мақсадида 1 ноябрдан 30 ноябргача бир ой мобайнида тарихий шаҳарлар ва муқаддас қадамжоларга турли саёҳатлар режалаштирилган.

Ойлик доирасида 15-20 ноябрь кунлари “Нуроний” жамғармаси Қорақалпоғистон Республикаси бўлими ҳамда туман бўлими томонидан 50 нафар меҳнат фахрийларининг Хива шаҳрига саёҳати ташкил этилди.

Хива шаҳридаги тарихий обидалар ҳамда муқаддас қадамжолар қадимий зиёратгоҳлардан бири бўлиб, ҳозирда у ерга ташриф буюрувчи зиёратчилар сони тобора ортиб бормоқда. Зиёратгоҳга келган меҳмонлар учун барча шароитлар яратилган. Узоқ йиллар давомида турли соҳаларда самарали меҳнат фаолиятини юритган, ҳозирда кексалик гаштини сураётган отахон ва онахонлар ушбу тарихий масканларни зиёрат қилишиб, бугунги дориломон кунларга шукроналар айтиб, аждодларимиз руҳига дуолар қилдилар.

Кўрсатилаётган алоҳида эътибор ва ғамхўрликдан ниҳоятда мамнун бўлган кексалар саёҳат давомида Президентимизнинг ташаббуси билан мамлакатимизда кекса авлод вакилларини ҳар томонлама қўллаб-қувватлаш борасида амалга оширилаётган ишлар хусусида суҳбатлашиб, ўз фикр-мулоҳазаларини билдиришди.

Шунингдек, уларнинг жамият, оилалар ва маҳаллаларда тинчлик-осойишталикни таъминлаш ҳамда ёш авлодни халқимизнинг кўп асрлик анъаналарини ҳурмат қилиш руҳида тарбиялашдаги ролини оширишга қаратилган кенг кўламли ислоҳотлар ўз самарасини бераётгани, буларнинг ҳаммаси юртимиздаги ривожланиш, юксалишларда ўз аксини топаётгани алоҳида таъкидланди.

Саёҳатчилар Хива шаҳридаги “Ичан қалъа” тарихий мажмуасидаги барча обидалар, музейлар билан танииб чиққач, тушлик дастурхони ёзилиб, меҳмон қилинди.

Қорақалпоғистон Республикаси “Нуронийлар” жамғармаси ва мазкур жамғарманинг туман бўлими томонидан ташкил этилган саёҳат давомида амударёлик нуронийлар мириқиб ҳордиқ чиқардилар.

Ушбу саёҳат меҳнат фахрийларида катта таассуротлар қолдириб, уларнинг маданий ва маънавий дам олишларига имкон яратди. Саёҳат якунлангандан сўнг нуроний фахрийлар бу каби эътибор ҳамда ғамхўрликдан ғоят хурсанд эканликларини билдиришиб, ташкилотчиларга миннатдорчилик изҳор этдилар.

Туман ҳокимлиги Ахборот хизмати