“ЮРТ УЗРА ҲИЛПИРАР ВАТАН БАЙРОҒИ, МУЖАССАМДИР УНДА МУСТАҚИЛЛИК ИҚБОЛИ” ШИОРИ ОСТИДА ТАДБИР ЎТКАЗИЛДИ

Ўзбекистон Республикасининг “Давлат байроғи тўғрисида”ги Қонуни қабул қилинганга бу йил 32 йил тўлди. Юртимизнинг барча ҳудудларида ушбу сана муносабати билан тантанали тадбирлар ўтказилиб, кенг нишонланди.

17 ноябрь куни Амударё туманидаги 36-сонли мактабда ҳам ёшларни ҳарбий-ватанпарварлик руҳида тарбиялаш, улар қалбида давлат рамзларига бўлган ҳурмат-эҳтиром, фахру-ифтихор туйғуларини янада мустаҳкамлаш ҳамда Ўзбекистон Республикаси Давлат байроғи қабул қилинган кунни муносиб нишонлаш мақсадида “Юрт узра ҳилпирар Ватан байроғи, мужассамдир унда мустақиллик иқболи” шиори остида маънавий-маърифий тадбир ўтказилди.

Тадбирда тумандаги Давлат хавфсизлик хизмати чегара қўшинларига қарашли ҳарбий қисмнинг масъул ходимлари Отабек Мадолимов, Азизбек Акрамов, Шерзод Атаев ҳамда 36-сонли мактабнинг ўқитувчи ва ўқувчилари иштирок этишди.

Тадбир тантанали тарзда давлат мадҳиялари билан бошланди ва дастлаб мактаб олдида ҳарбий қисмга тегишли қурол-аслаҳалардан ташкил этилган кўргазма намойиш этилди. Шунингдек, тадбирга ташриф буюрган ҳарбий қисм хизматчилари барчани ушбу муҳим сана билан табриклаб, мустақил давлатчилигимиз рамзларидан бўлган байроғимиз ўзида Ватанимиз ўтмиши ва бугунининг муҳим қирраларини акс эттиришини, юрт байроғига нисбатан ҳурмат туйғусини юксалтириш, унинг улуғворлик касб этувчи моҳиятини англаш барчамиз учун муҳим вазифалардан бири ҳисобланишини эътироф этишди.

Таъкидланганидек, мамлакат тараққиёти ҳамда унинг барқарорлигида давлат рамзларининг алоҳида ўрни бор. Шу маънода байроғимиз давлат ва жамиятнинг ҳаёти унинг жаҳон ҳамжамиятида ўрни ва ролини кўрсатишда муҳим аҳамиятга эга бўлиб, ҳар биримиз учун фахр-ифтиҳор саналади. Бугун юртимиздаги турли байрам тантаналарида мамлакатимиз делегациялари қатнашаётган халқаро тадбирлар, нуфузли спорт мусобақаларида мамлакатимиз шарафи, халқимизнинг ғурур ва ифтихорини ёрқин акс эттирадиган омиллардан бири ҳам айнан байроғимиздир.

Тадбир мактаб ўқувчи-ёшлари иштирокидаги стол тенниси, шашка, шахмат мусобақалари билан давом эттирилди. Кўтаринки руҳ билан бошланган стол тенниси мусобақалари давомида ёшлар ўз маҳоратларини намойиш этиб, ғолиблик учун ҳаракат қилишди. Шахмат-шашка мусобақаларида иштирок этган спортчилар ҳам ўйинлар жараёнида бири-биридан заковатли эканлигини кўрсатишди.

Тадбир иштирокчилари мактабнинг бошланғич синфида ўқитувчиси Сарагул Юсупова томонидан ташкил этилган очиқ ўқув машғулотида ҳам қатнашишди ва ўқувчилар билан давлат рамзлари хусусида савол-жавоб ўтказишди. Ўқувчилар давлат байроғи Ўзбекистон Республикасининг 1991 йил 18 ноябрдаги «Ўзбекистон Республикасининг Давлат байроғи тўғрисида»ги қонуни билан тасдиқлангани, давлат рамзлари ҳар бир мамлакатнинг суверенитети ва мустақиллигини ифодаловчи муқаддас тимсоллар эканлигини, шу юртда яшовчи фуқаро сифатида улар билан фахрланишини ғурур билан сўзлаб беришди.

Мактабнинг фаоллар залида давом этган тадбирда эса тумандаги Давлат хавфсизлик хизмати чегара қўшинларига қарашли ҳарбий қисм масъуллари ҳарбий хизматчиларнинг Ватан байроғи пойида тиз чўкиб, муқаддас Она тупроғини матонат ва садоқат билан ҳимоя қилишга қасамёд қилиши бежиз эмаслигини, чунки байроқ жасорат, ғурур, фидойилик, ор-номус тимсоли эканлигини ифтихор билан таъкидлашди. Шунингдек, ўқувчи-ёшларни ҳарбийлаштирилган йўналишдаги ўқув юртларга қабул қилиш тартиби ҳақидаги батафсил маълумотлар билан таништириб ўтишди.

Тадбир якунида сана муносабати билан мактабда ташкил этилган спорт мусобақалари ғолиблари тақдирланди ва муқаддас байроғимизни жаҳон ареналарида, нуфузли спорт мусобақаларида баланд кўтариб юришларини айтиб, эзгу тилаклар билдирилди.

О.Худойберганова.