Депутатлар иштирокида танқидий ва таҳлилий руҳда йиғилиш бўлиб ўтди
2023 йил 17 ноябрь куни Амударё туман ҳокимлигининг катта мажлислар залида депутатлар иштирокида танқидий ва таҳлилий руҳдаги йиғилиш бўлиб ўтди.
Йиғилишда Жўқорғи Кенгеснинг қўмита раиси Шарапат Отемисов, Қорақалпоғистон Республикаси Вазирлар Кенгаши раиси ўринбосари Марям Аҳмедова, туман ҳокими Собир Хўжаметов, секторлар раҳбарлари, Жўқорғи Кенгес депутатлари, туман Кенгаши депутатлари, тумандаги мактабгача таълим ташкилотларининг раҳбарлари ҳамда тегишли ташкилот вакиллари иштирок этдилар.
Йиғилишда тумандаги мактаб ва мактабгача таълим ташкилотларининг шароити, куз-қиш мавсумига тайёргарлиги, тарбияланувчи болаларнинг давомади, ёнғин хавфсизлиги қоидаларига риоя қилинганлиги, озиқ-овқат маҳсулотларининг сифати, “Яшил макон” умуммиллий лойиҳаси доирасида кўчат экиш ишларининг бориши бўйича махсус ишчи гуруҳ томонидан олиб борилган назорат тадбирлари натижалари муҳокама қилинди.
Шунингдек, Ўзбекистон Республикаси Вазирлар Маҳкамасининг 2023 йил 2 феврал кунги “Қорақалпоғистон Республикасида аҳоли учун муносиб турмуш шароитларини яратиш ва маҳаллалар инфратузилмасини янада яхшилаш чора-тадбирлари тўғрисида”ги 52-сонли Қарор ҳамда Ўзбекистон Республикаси Президентининг 2023 йил 13 июль кунги “Қорақалпоғистон Республикаси Вазирлар Кенгаши ҳузурида маҳаллаларни қўллаб-қувватлаш жамғармасини ташкил этиш тўғрисида”ги 228-сонли Қарорларининг ижроси юзасидан ҳам махсус ишчи гуруҳнинг ҳисоботи тингланди.
Йиғилишда туман ҳокими Собир Хўжаметов бугунги куннинг долзарб масалаларидан келиб чиққан ҳолда депутатлик назоратини ўрнатиш учун депутатлардан иборат таркибда махсус ишчи гуруҳ ташкил қилинганини, ишчи гуруҳ бир неча кун давомида овул ва маҳаллаларда бўлиб, тумандаги мактабгача таълим ташкилотларида ўрганиш ишларини олиб борганини қайд этиб ўтди.
Йиғилишда ишчи гуруҳлар аъзолари ўзининг фаолияти ҳақида маълумотлар бериб, аниқланган камчиликларни бартараф қилиш бўйича фикрлар тингланди ва истиқболдаги режалар белгилаб олинди.
Айтиш жоизки, давлат ва жамият ҳаётига доир кенг кўламли ислоҳотларни амалга ошириш, халқимиз ҳуқуқ ва манфаатларини ҳимоя қилишда депутатларнинг ўрни жуда ҳам катта. Ҳудудларни комплекс ривожлантириш, аҳоли фаровонлигини ошириш, камбағалликни қисқартириш йўналишидаги ишларга ҳам депутатлар катта ҳисса қўшмоқдалар. Иқтисодий-ижтимоий соҳаларни қамраб олган кўплаб дастурлар ижроси устидан самарали депутатлик назорати ўрнатилиб, тадбиркорликни ривожлантириш, аҳолини иш билан таъминлаш каби масалаларга масъул раҳбарларнинг ҳисоботлари сессияларда тингланиб, тегишли қарорлар қабул қилинмоқда. Бу борада Қорақалпоғистон Республикаси Жўқорғи Кенгеси ҳамда халқ депутатлари туман Кенгаши депутатларнинг зиммасига улкан масъулият юкланган.
Йиғилиш давомида Фаровон маҳалла фуқаролар йиғинида тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчиси, туман Кенгаши депутати Муқаддас Бекназарова, 40-сонли мактаб директори, Қорақалпоғистон Республикаси Жўқорғи Кенгеси депутати Санобар Хўжамуродова, туман Кенгаши депутати Муяссар Раҳматуллаева, 31-сонли мактаб директори, туман Кенгаши депутати Нилуфар Давлетова, туман прокурори Азиз Рўзметов ва бошқалар сўзга чиқиб, мавжуд камчиликлар ҳақида айтиб ўтдилар.
Танқидий-таҳлилий руҳда ўтган йиғилиш якунида Жўқорғи Кенгеснинг қўмита раиси Шарапат Отемисов ва Қорақалпоғистон Республикаси Вазирлар Кенгаши раиси ўринбосари Марям Аҳмедовалар сўзга чиқиб, депутатлар ва ишчи гуруҳ аъзолари томонидан аниқланган камчиликларни бартараф қилиш, келгусида такрорланишининг олдини олиш юзасидан фикр билдирдилар.
Йиғилишда қайд қилинган масалалар юзасидан тегишли ташкилот раҳбарларига зарур кўрсатмалар берилди.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
