ЎЗБЕК ТИЛИ БАЙРАМИ КЕНГ НИШОНЛАНДИ
Дунёдаги қадимий ва бой тиллардан бири бўлган ўзбек тили халқимиз учун миллий ўзлик ва мустақил давлатчилик тимсоли, бебаҳо маънавий бойлик, мамлакатимизнинг сиёсий-ижтимоий, маънавий-маърифий тараққиётида ғоят муҳим ўрин эгаллаб келаётган буюк қадриятдир. Ҳозирги кунда ўзбек тили ҳаётимизнинг барча жабҳаларида фаол қўлланилмоқда.
Бугунги кунда мамлакатимизда она тилимизнинг жамиятдаги ўрни ва нуфузини ошириш бўйича кенг кўламли ишлар амалга оширилмоқда. Ҳар йили 21 октябрь – ўзбек тилига давлат тили мақоми берилган кун кенг нишонланади.
Барча меҳнат жамоаларида, таълим муассасаларида сана муносабати билан турли тадбирлар ўтказилиб, ўзбек тилининг бор латофати, жозибаси, чексиз имкониятлари тилга олинади. Бутун мамлакатимизда бўлган каби Амударё туманида ҳам ўзбек тилига давлат тили мақоми берилган кун муносиб нишонланмоқда.
19 октябрь куни Ихтисослаштирилган таълим муассасалари агентлиги тизимидаги Амударё туман ихтисослаштирилган мактабида ҳам “Она тилим – жон-у дилим” деб номланган маънавий-маърифий, мусиқий тадбир ўтказилди.
Ўзбек тилига давлат тили мақоми берилганлигининг 34 йиллигига бағишланган тадбирни муассаса директорининг маънавий-маърифий ишлар бўйича ўринбосари Муяссар Раҳматуллаева очди ва барчани ушбу қутлуғ байрам билан қизғин қутлади.
Муассаса она тили ва адабиёт фани ўқитувчилари ҳамкорлигида тайёрланган тадбирда Моҳира Собирова она тилимизнинг босиб ўтган тарихий йўли, ҳар бир инсон ҳаётида она тилининг тутган ўрни ҳақида маъруза қилди.
Тадбирда қуйи синфлар ўқувчилари орасида она тилидан диктантлар танлови ўтказилди. Ушбу танловда Тиллахон Зарифбоева биринчи, Севинч Кенжабоева иккинчи, Саидбек Мадатов учинчи ўринларни эгалладилар. Байрамона безатилган муассаса фаоллар залида ўқувчилар ижросида ўзбек тилини улуғловчи шеърлар янгради, қўшиқлар, рақслар ижро этилди.
Айниқса, ўзбек адабиётининг таниқли намояндаларидан бири Ғофур Ғуломнинг “Шум бола” асари асосида тайёрланган саҳна кўриниш ўқувчи-ёшларга ўзбек тилининг нақадар бой ва жозибали эканлигини чуқур сингдирди.
Айтиш жоизки, мустабид тузум даврида ўзбек тилини йўқотишга уринишлар кўп бўлди, она тилимиз йиллар давомида камситиб келинди. Лекин халқимиз ўз она тилини – миллий ғурурини сақлаб қолди. Миллатпарвар зиёлилар, халқимизнинг она тилимизга бўлган чексиз муҳаббати туфайли 1989 йил 21 октябрь куни қабул қилинган қонунга асосан, ўзбек тилига давлат тили мақоми берилди.
Мамлакатимиз Президентининг 2019 йил 21 октябрь куни қабул қилган “Ўзбек тилининг давлат тили сифатидаги нуфузи ва мавқеини тубдан ошириш чора-тадбирлари тўғрисида”ги Фармонига биноан 21 октябрь санаси мамлакатимизда “Ўзбек тили байрами куни” деб белгиланди.
Сана муносабати билан ўтказилаётган тадбирлар ёшлар кўнглида она тилимизга бўлган ҳурмат-эҳтиромни янада мустаҳкамлаётгани билан аҳамиятли бўлмоқда.
Ойгул РАЖАБОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
