OʻZBEK TILI BAYRAMI KENG NIShONLANDI

Dunyodagi qadimiy va boy tillardan biri boʻlgan oʻzbek tili xalqimiz uchun milliy oʻzlik va mustaqil davlatchilik timsoli, bebaho maʼnaviy boylik, mamlakatimizning siyosiy-ijtimoiy, maʼnaviy-maʼrifiy taraqqiyotida gʻoyat muhim oʻrin egallab kelayotgan buyuk qadriyatdir. Hozirgi kunda oʻzbek tili hayotimizning barcha jabhalarida faol qoʻllanilmoqda.

Bugungi kunda mamlakatimizda ona tilimizning jamiyatdagi oʻrni va nufuzini oshirish boʻyicha keng koʻlamli ishlar amalga oshirilmoqda. Har yili 21-oktyabr – oʻzbek tiliga davlat tili maqomi berilgan kun keng nishonlanadi.

Barcha mehnat jamoalarida, taʼlim muassasalarida sana munosabati bilan turli tadbirlar oʻtkazilib, oʻzbek tilining bor latofati, jozibasi, cheksiz imkoniyatlari tilga olinadi. Butun mamlakatimizda boʻlgan kabi Amudaryo tumanida ham oʻzbek tiliga davlat tili maqomi berilgan kun munosib nishonlanmoqda.

19-oktyabr kuni Ixtisoslashtirilgan taʼlim muassasalari agentligi tizimidagi Amudaryo tuman ixtisoslashtirilgan maktabida ham “Ona tilim – jon-u dilim” deb nomlangan maʼnaviy-maʼrifiy, musiqiy tadbir oʻtkazildi.

Oʻzbek tiliga davlat tili maqomi berilganligining 34-yilligiga bagʻishlangan tadbirni muassasa direktorining maʼnaviy-maʼrifiy ishlar boʻyicha oʻrinbosari Muyassar Rahmatullayeva ochdi va barchani ushbu qutlugʻ bayram bilan qizgʻin qutladi.

Muassasa ona tili va adabiyot fani oʻqituvchilari hamkorligida tayyorlangan tadbirda Mohira Sobirova ona tilimizning bosib oʻtgan tarixiy yoʻli, har bir inson hayotida ona tilining tutgan oʻrni haqida maʼruza qildi.

Tadbirda quyi sinflar oʻquvchilari orasida ona tilidan diktantlar tanlovi oʻtkazildi. Ushbu tanlovda Tillaxon Zarifboyeva birinchi, Sevinch Kenjaboyeva ikkinchi, Saidbek Madatov uchinchi oʻrinlarni egalladilar. Bayramona bezatilgan muassasa faollar zalida oʻquvchilar ijrosida oʻzbek tilini ulugʻlovchi sheʼrlar yangradi, qoʻshiqlar, raqslar ijro etildi.

Ayniqsa, oʻzbek adabiyotining taniqli namoyandalaridan biri Gʻofur Gʻulomning “Shum bola” asari asosida tayyorlangan sahna koʻrinish oʻquvchi-yoshlarga oʻzbek tilining naqadar boy va jozibali ekanligini chuqur singdirdi.

Aytish joizki, mustabid tuzum davrida oʻzbek tilini yoʻqotishga urinishlar koʻp boʻldi, ona tilimiz yillar davomida kamsitib kelindi. Lekin xalqimiz oʻz ona tilini – milliy gʻururini saqlab qoldi. Millatparvar ziyolilar, xalqimizning ona tilimizga boʻlgan cheksiz muhabbati tufayli 1989-yil 21-oktyabr kuni qabul qilingan qonunga asosan, oʻzbek tiliga davlat tili maqomi berildi.

Mamlakatimiz Prezidentining 2019-yil 21-oktyabr kuni qabul qilgan “Oʻzbek tilining davlat tili sifatidagi nufuzi va mavqeini tubdan oshirish chora-tadbirlari toʻgʻrisida”gi Farmoniga binoan 21-oktyabr sanasi mamlakatimizda “Oʻzbek tili bayrami kuni” deb belgilandi.

Sana munosabati bilan oʻtkazilayotgan tadbirlar yoshlar koʻnglida ona tilimizga boʻlgan hurmat-ehtiromni yanada mustahkamlayotgani bilan ahamiyatli boʻlmoqda.

Oygul RAJABOVA