“ХАВФСИЗ ТУН” ТЕЗКОР ВА ПРОФИЛАКТИК ТАДБИРИ ЎТКАЗИЛДИ

Амударё туманида ҳудудда қонун устуворлигини, фуқаролар, жамият ва давлатнинг хавфсизлигини таъминлаш, ҳуқуқбузарликларнинг олдини олиш мақсадида “Хавфсиз тун” тезкор профилактик тадбири ташкил этилди.

Шу йил 13 сентябрь куни Президентимизнинг “Ўзбекистон Республикаси Жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида”ги Фармонида кўрсатилган вазифалар ижроси юзасидан ўтказилган ушбу тадбирда туман Ички ишлар бўлими профилактика инспекторлари, Йўл ҳаракати хавфсизлиги бўлинмаси, прокуратура, Қўриқлаш бўлими, Фавқулодда вазиятлар бўлими, Тиббиёт бирлашмаси ходимлари, фуқаролар йиғинлари раислари, ҳоким ёрдамчилари ҳамда ёшлар етакчилари иштирок этишди.

Туман ҳокимлиги биноси олдида дастлаб тегишли топшириқларни белгилаб олиш бўйича ўтказилган йиғилишда туман ҳокими Собир Хўжаметов, Қорақалпоғистон Республикаси Ички ишлар вазирлигининг иккинчи минтақавий ҳудуд минтақавий мувофиқлаштириш маркази бош инспектори Қайрат Пирниязов ҳамда туман прокурори Азиз Рўзметов, Ички ишлар бўлими бошлиғи Жамоладдин Юсупов ва бошқа масъуллар қатнашишди.

Йиғилишни туман ҳокими Собир Хўжаметов кириш сўзи билан очиб берди ва Президентимизнинг 2021 йил 29 ноябрь кунги “Ўзбекистон Республикаси Жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида”ги Фармони мазмун-моҳияти хакида қисқача тўхталди. Ушбу Фармоннинг ижросини таъминлаш мақсадида Республика миқёсида “Хавфсиз тун” тадбирлари ўтказилаётгани, барча ҳуқуқ-тартибот идораларининг жамоат хавфсизлигини таъминлаш, ҳуқуқбузарликлар профилактикаси ва жиноятчиликка қарши курашишдаги ҳамкорлиги ўз самарасини бериши алоҳида таъкидлаб ўтилди.

Йиғилишда “маҳаллалар бешлиги” ишлаш тизимини кучайтириш лозимлиги, ҳозирги кунда бу борадаги ишлар Президентимизнинг талаблари бўйича етарли даражада олиб борилмаётгани, агарда шу бешталик ҳамжиҳатликда иш олиб борса, ҳеч бир маҳаллада муаммо қолмаслиги таъкидланди.

Шундан сўнг Президент Фармони ижросини таъминлаш, тумандаги 12 та “қизил” тоифадаги маҳаллаларда вазиятни барқарорлаштириш ва “қизил” тоифадан чиқариш бўйича муҳим чора-тадбирлар белгилаб олинди.

Ушбу криминоген жиноятчилик ошган маҳаллаларда жамоат тартибини сақлаш ва жиноятчиликнинг олдини олиш мақсадида “Хавфсиз тун” тадбирига тунги бўлиштирув амалга оширилиб, тегишли топшириқлар берилди.

Тадбирга жалб қилинган ходимларга маҳаллаларга бўлинган ҳолда тунги вақтда бемақсад юрган фуқаролар билан профилактик суҳбатлар ўтказиш, ушбу фуқароларнинг шахсига ойдинлик киритиш, бемақсад юрган шахсларни ҳуқуқбузарлик ва жиноят содир этмаслик тўғрисида расман огоҳлантириш ва бошқа вазифалар топширилди.

Маълум қилинишича, жорий йилнинг 8 ойи давомида туманда 12 та маҳалла “қизил” тоифага киритилган. Ушбу тоифага 1-сектор бўйича Бештом, Гулзор, Ойбек номли маҳаллалар, 2-сектор бўйича Дўрман, Қиличбой, Ўрта қалъа овуллари, Дўстлик маҳалласи, 3-сектор бўйича Куюк кўпир овули ва Ўзбекистон маҳалласи, 4-сектор бўйича эса Беруний, Навоий номли маҳаллалар ва Тошёп овули киритилиб, уларни “сариқ” ва “яшил” тоифага киритиш бўйича “йўл харитаси” белгилаб олинган.

“Хавфсиз тун” тадбири давомида “қизил” тоифага киритилган ушбу ҳудудлардаги умумий овқатланиш шохобчалари, савдо ва маиший хизмат кўрсатиш объектлари ҳамда бошқа жамоат жойлари текширилди. Кечки вақтларда фаолият олиб борадиган кўнгилочар масканлар ва уларда ишлайдиган шахслар билан профилактик суҳбатлар ўтказилди.

Тадбирга жалб қилинган ходимлар вояга етмаганларнинг тунги вақтда ота-она назоратисиз юриши салбий ҳолатларга сабаб бўлиши, фарзандлари тарбиясини эътиборсиз қолдирган ота-оналар ҳам жавобгарликка тортилишини айтиб ўтишди. Ҳуқуқбузарликлар ва жиноятчиликнинг салбий оқибатлари, уларга нисбатан бериладиган жазо чоралари тўғрисида ҳам тушунчалар беришди.

Рейд давомида туман марказида жойлашган ташкилот ва корхона бинолари қоровуллари, қўриқловчилари ҳушёр туриш тўғрисида огоҳлантирилди. Уларга ўзгаларнинг қаровсиз қолдирилган мулклари, мулк эгасини топиш, шунингдек, мулкларни қаровсиз қолдирмаслик ҳақида фуқароларга эслатиб туриш кераклиги тўғрисида тушунтиришлар берилди.

Жиноятчилик ва ҳуқуқбузарликларнинг олдини олиш, хавфсиз муҳитни яратиш, туманни жиноятчиликдан ҳоли ҳудудга айлантириш мақсадида ҳамкорликда ўтказилган “Хавфсиз тун” тадбирида криминоген вазияти оғир маҳаллаларда муаммоларни “маҳаллабай” ва “хонадонбай” аниқлаб ҳал этиш, “ижтимоий профилактика” тизимини тўлиқ жорий этиш бўйича чора-тадбирлар белгилаб олинди. Шунингдек, ҳуқуқ-тартибот идоралари раҳбарлари ва ўринбосарлари “қизил” ва “сариқ” тоифадаги маҳаллаларга шахсан масъул этиб бириктирилди.

Туман ҳудудида тегишли ташкилотлар билан ҳамкорликда ташкил этилган “Хавфсиз тун” профилактик тадбири ўзаро ҳамкорликда ва уюшқоқлик билан ўтказилди.

Илҳом Абутов, туман ИИБ ҲПБ бошлиғи.