Бекман Аллаберганов Президент Фармонига кўра давлатимизнинг юксак мукофоти билан тақдирланди
Бугун — 29 июль куни Ўзбекистон Республикаси Президентининг "Халқлар дўстлиги куни муносабати билан бир гуруҳ юртдошларимизни мукофотлаш тўғрисида"ги Фармони эълон қилинди.
Фармон билан мамлакатимизда миллатлараро дўстлик ва тотувликни, турли миллат ва элат вакиллари ўртасидаги ўзаро ҳамжиҳатлик, меҳр-оқибат муҳитини асраш, миллий маданиятлар, урф-одат ва анъаналарни ривожлантириш борасидаги катта хизматлари, Янги Ўзбекистоннинг тинчликсевар ва халқпарвар сиёсатини халқаро миқёсда кенг тарғиб этиш, шунингдек, турли соҳаларда самарали меҳнат қилиб, юртимиз иқтисодиётини юксалтиришга қўшган муносиб ҳиссаси, ёш авлодни Ватанга муҳаббат ва умуминсоний қадриятларга ҳурмат руҳида тарбиялаш йўлидаги ибратли ишлари ҳамда ижтимоий ҳаётдаги фаол иштироки учун бир гуруҳ юртдошларимиз давлатимизнинг юксак мукофотлари билан тақдирланди.
Мукофотланганлар орасида Амударё тумани нуронийлар жамоатчилик кенгаши раисининг ўринбосари Бекман Аллаберганов ҳам бор. У Президент Фармонига кўра «Дўстлик» ордени билан мукофотланди.
Бекман Аллаберганов 1947 йилда Амударё туманида туғилган. 1963-1968 йилларда Тошкент Давлат педагогика институтининг физика-математика факультетини тамомлаб, узоқ йиллар 16-сонли ва 5-сонли умумтаълим мактабларида ўқувчи-ёшларга физика-математика фанларидан сабоқ берди.
Орада бир йил ҳарбий хизмат бурчини ўтаб қайтган Бекман Аллаберганов ўзининг ташаббускорлиги, халқ ҳаётига доир муаммолар ечимини топишдаги ўзига хос фикрга эгалиги боис, туман раҳбариятининг назарига тушди. 1987-1995 йилларда Халқ депутатлари А.Темур номли овул Кенгаши ижроия қўмитаси раисининг ўринбосари, бир неча йил тадбиркор сифатида фаолият юритган Бекман Аллаберганов 1999-2003 йиллар оралиғида А.Темур номли овул маҳалла посбони сардори, 2003-2008 йилларда эса мазкур фуқаролар йиғини раиси вазифаларида сидқидилдан меҳнат қилди.
Ишлаб, йўл юриб чарчамайдиган отахон 2014-2017 йилларда “Нуроний” жамғармаси туман бўлими раиси, 2017-2020 йилларда эса Ўзбекистон фахрийларининг ижтимоий фаолиятини қўллаб-қувватлаш жамоат бирлашмаси шаклидаги “Нуроний” жамғармаси туман бўлими раиси вазифаларида ишлади. Айни пайтда эса Амударё тумани нуронийлар жамоатчилик кенгаши раисининг ўринбосари вазифасида ишлаб келмоқда.
Бекман ҳожи бобо Аллабергановни давлатимизнинг юксак мукофотига сазовор бўлгани билан табриклаб, узоқ умр, мустаҳкам саломатлик ва келгуси ишларида зафарлар ёр бўлишини тилаймиз!
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
