Bekman Allaberganov Prezident Farmoniga koʻra davlatimizning yuksak mukofoti bilan taqdirlandi

Bugun — 29-iyul kuni Oʻzbekiston Respublikasi Prezidentining "Xalqlar doʻstligi kuni munosabati bilan bir guruh yurtdoshlarimizni mukofotlash toʻgʻrisida"gi Farmoni eʼlon qilindi.

Farmon bilan mamlakatimizda millatlararo doʻstlik va totuvlikni, turli millat va elat vakillari oʻrtasidagi oʻzaro hamjihatlik, mehr-oqibat muhitini asrash, milliy madaniyatlar, urf-odat va anʼanalarni rivojlantirish borasidagi katta xizmatlari, Yangi Oʻzbekistonning tinchliksevar va xalqparvar siyosatini xalqaro miqyosda keng targʻib etish, shuningdek, turli sohalarda samarali mehnat qilib, yurtimiz iqtisodiyotini yuksaltirishga qoʻshgan munosib hissasi, yosh avlodni Vatanga muhabbat va umuminsoniy qadriyatlarga hurmat ruhida tarbiyalash yoʻlidagi ibratli ishlari hamda ijtimoiy hayotdagi faol ishtiroki uchun bir guruh yurtdoshlarimiz davlatimizning yuksak mukofotlari bilan taqdirlandi.

Mukofotlanganlar orasida Amudaryo tumani nuroniylar jamoatchilik kengashi raisining oʻrinbosari Bekman Allaberganov ham bor. U Prezident Farmoniga koʻra «Doʻstlik» ordeni bilan mukofotlandi.

Bekman Allaberganov 1947-yilda Amudaryo tumanida tugʻilgan. 1963-1968-yillarda Toshkent Davlat pedagogika institutining fizika-matematika fakultetini tamomlab, uzoq yillar 16-sonli va 5-sonli umumtaʼlim maktablarida oʻquvchi-yoshlarga fizika-matematika fanlaridan saboq berdi.

Orada bir yil harbiy xizmat burchini oʻtab qaytgan Bekman Allaberganov oʻzining tashabbuskorligi, xalq hayotiga doir muammolar yechimini topishdagi oʻziga xos fikrga egaligi bois, tuman rahbariyatining nazariga tushdi. 1987-1995-yillarda Xalq deputatlari A.Temur nomli ovul Kengashi ijroiya qoʻmitasi raisining oʻrinbosari, bir necha yil tadbirkor sifatida faoliyat yuritgan Bekman Allaberganov 1999-2003-yillar oraligʻida A.Temur nomli ovul mahalla posboni sardori, 2003-2008-yillarda esa mazkur fuqarolar yigʻini raisi vazifalarida sidqidildan mehnat qildi.

Ishlab, yoʻl yurib charchamaydigan otaxon 2014-2017-yillarda “Nuroniy” jamgʻarmasi tuman boʻlimi raisi, 2017-2020-yillarda esa Oʻzbekiston faxriylarining ijtimoiy faoliyatini qoʻllab-quvvatlash jamoat birlashmasi shaklidagi “Nuroniy” jamgʻarmasi tuman boʻlimi raisi vazifalarida ishladi. Ayni paytda esa Amudaryo tumani nuroniylar jamoatchilik kengashi raisining oʻrinbosari vazifasida ishlab kelmoqda.

Bekman hoji bobo Allaberganovni davlatimizning yuksak mukofotiga sazovor boʻlgani bilan tabriklab, uzoq umr, mustahkam salomatlik va kelgusi ishlarida zafarlar yor boʻlishini tilaymiz!