БЎШ ИШ ЎРИНЛАРИ ЯРМАРКАСИ ЎТКАЗИЛДИ

Ҳар бир инсоннинг ҳаётда ўзига муносиб ва иқтидори, қизиқишларига мос келадиган касбни танлаши жуда муҳим. Чунки келгусида инсон эгаллаган касбидаги фаолияти туфайли ҳаётда ўз ўринни топади, даромад топиб оиласини боқади.

Шуниси борки, кўпчилик ёшлар умумий ўрта таълим мактабларини битириб, мустақил ҳаётга қадам қўйган чоғида ҳам маълум бир соҳага меҳр қўймайди, касблар хусусида етарли билимларга эга бўлмайди. Айрим битирувчилар эса олийгоҳларга ҳужжат топширишда талабгорлар камроқ йўналишларни танлайди ва буни талаба бўлиш учун ўзига имкониятдай тушунади. Аслида мақсад талаба бўлишдан иборат эмас, балки, ҳар ким ўз иқтидорига кўра мутахассисликни пухта эгаллаб ва олган билимлари туфайли намунали фаолият юритишидир. Турли соҳаларда фидойи меҳнат қилиш туфайли ҳурмат ва шарафга эришган одамлар кўп атрофимизда. Касб нафақат даромад топиб, оила боқиш, балки инсон умрининг асосий қисми сарфланадиган фаолият ҳамдир.

Ҳаётда бирон мутахассисликни, касбни пухта эгалламаган ё эгаллаган касбига доир муносиб иш тополмаётган вақтинча ишсиз фуқаролар ҳам бор. Ана шундай тоифага кирувчи ҳамда алимент қарздорлиги мавжуд фуқароларни иш билан таъминлашга ва даромад топишларига шароит яратишга улкан эътибор қаратилмоқда.

30 май куни Мажбурий ижро бюросининг Амударё туман бўлими томонидан бўлим иш юритувидаги алимент қарзларини ундириш, ишсиз алимент тўловчи фуқароларнинг ҳамда аҳолининг ишга яроқли, иш билан банд бўлмаган қатламининг бандлигини таъминлаш мақсадида “Бўш иш ўринлари ярмаркаси” ташкил этилди.

Туман ҳокимлиги, прокуратура, Мажбурий ижро бюроси туман бўлими, Камбағалликни қисқартириш ва аҳоли бандлигига кўмаклашиш бўлими ҳамкорлигида ўтказилган ушбу тадбирда туманда фаолият юритаётган 94 та корхона ва ташкилотлар 777 та бўш иш ўринлари билан қатнашдилар.

Ярмаркада иштирок этган фуқаролар ярмаркада мазкур иш ўринлари билан яқиндан танишдилар ва корхона, ташкилотларда ишга таклиф этилаётган вакант ўринларда ишга кирганларга қандай шароитлар яратилишига ҳам қизиқдилар.

Ярмарка давомида 25 нафар иш билан банд бўлмаган, фаол иш қидираётган фуқаролар ишга жойлашдилар. 10 нафар фуқарога маслаҳат берилди, 6 нафар фуқаро ҳақ тўланадиган жамоат ишларига жалб қилинди, 9 нафар фуқаро эса касбга ўқитишга йўналтирилди.

Ишга жойлашганларнинг 6 нафари ишсиз алимент тўловчи фуқаролар, 10 нафари ёшлар, 6 нафари аёллар, 3 нафари таълимнинг турли босқичлари битирувчиларидир.

Бандлик – оила иқтисодини таъминловчи доимий даромад манбаи эканлиги барчага аён. Шу маънода олиб қарайдиган бўлсак, ўтказилган тадбирда 25 нафар фуқаронинг бандлиги таъминлангани аҳамиятини яққол ҳис қилиш мумкин.

Ойгул РАЖАБОВА.