ЙЎЛ-ТРАНСПОРТ ҲОДИСАСИ МУҲОКАМАСИГА БАҒИШЛАНГАН ЙИҒИЛИШ ЎТКАЗИЛДИ

Ҳар ким эрталаб эзгу ниятлар билан остона ҳатлаб кўчага чиқади, ишга бориш, ҳаётий зарурати туфайли транспорт воситасидан фойдаланади. Кейинги йилларда фуқароларнинг ҳаёт фаровонлиги ортиб бораётгани деярли ҳар бир оила шахсий транспорт воситаларига эга эканлигида ҳам кўринади. Бу албатта, қувонарли ҳол. Бироқ кўчаларда автотраспорт бошқариш қоида ва меъёрларига амал қилмаслик, ҳайдовчи ва пиёдаларнинг билим-кўникмалари, қонунга итоаткорлиги, бошқа йўл ҳаракати иштирокчиларига ўзаро ҳурматининг пастлиги оқибатида йўл-транспорт ҳодисалари, кўплаб йўқотишлар содир бўлаяпти. Барчанинг кўз ўнгида юз берган автоҳалокатлар оқибатида не-не аламлар, юракни ларзага солувчи йўқотишлардан айримлар ўзига хулоса чиқармаяпти ва натижада бу каби кўнгилсиз воқеалар содир бўлишда давом этмоқда.

Жумладан, шу йилнинг 8 май куни Амударё тумани ҳудудидан ўтувчи “А-380 Ғузор-Бухоро-Нукус-Бейнеу” автомобиль йўлининг 749-750-километри оралиғида одам ўлими билан боғлиқ оғир йўл транспорт ҳодисаси юз берди. Юз берган йўл транспорт ҳодисасида “Кобальт” маркали автотранспорт воситаси юқори тезликда ҳаракатланиб келиб, ўз йўналиши бўйлаб ҳаракатланиб бораётган “КамАз” русмли автотранспорт воситасининг орқа тарафидан бориб урилган ва натижада йўл транспорт ҳодисаси юз берган.

Ушбу йўл-транспорт ҳодисаси Амударё тумани ҳокимлигининг мажлислар залида кенг жамоатчилик иштирокида муҳокама қилинди.

Йиғилишда Қорақалпоғистон Республикаси Ички ишлар вазирлиги жамоат хавфсизлиги хизмати йўл ҳаракати ҳавфсизлиги бошқармаси бошлиғининг биринчи ўринбосари, туман ҳокими ўринбосари, туман Ички ишлар бўлими ходимлари, маҳалла раислари ва хотин-қизлар фаоллари иштирок этишди.

Йиғилишда йўл ҳаракати хавфсизлиги бошқармаси бошлиғининг биринчи ўринбосари республикада рўй бераётган йўл-транспорт ҳодисалари бўйича маълумот бериб ўтди.

Шунингдек, содир бўлаётган йўл-транспорт ҳодисаларининг асосий сабаби сифатида тезликнинг оширилиши, автомобилни спиртли ичимликлар ва бошқа психотроп моддалар истеъмол қилган ҳолда бошқариш, автомобилда ҳаракатланаётган пайтда чалғиш, яъни ҳаёлнинг бузилиши, йўлларнинг таъмирталаб аҳволга келиб қолиши, транспортнинг тез-тез техник кўрикдан ўтказилмаслиги, ҳайдовчиларнинг йўл ҳаракати қоидаларига риоя қилмасликлари оқибатида келиб чиқишини таъкидлади.

Йиғилишда бундай кўнгилсиз ҳодисалар содир бўлмаслиги учун маҳаллаларда, умумтаълим мактабларда, Олий таълим муассасаларида, аҳоли гавжум жойларда тушунтириш-тарғибот тадбирлари олиб борилиши кераклиги айтиб ўтилди.

Йиғилиш давомида Қорақалпоғистон Республикаси ҳудудида рўй бераётган йўл-транспорт ҳодисалари акс этган видеоролик намойиш этилди.

Шундан сўнг, фуқароларнинг содир бўлган йўл-транспорт ҳодисаси бўйича фикр-мулоҳазалари тингланди.

Айтиш керакки, йўлга чиққан ҳар бир ҳаракат иштирокчиси ўз зиммасидаги масъулиятни чуқур ҳис қилган ҳолда белгиланган йўл ҳаракати қоидаларига тўлиқ риоя қилиб, ҳаракатланмоғи зарур. Ана шундагина йўлларимизда содир бўлиши мумкин бўлган ноҳуш воқеаларнинг олди олинади. Бунда эса нафақат ҳайдовчининг, балки пиёданинг ҳам масъулияти бирдек муҳим эканлигини унутмайлик!

Туман ҳокимлигининг Ахборот хизмати.