АМУДАРЁ ТЕЛЕВИДЕНИЕСИНИНГ ГРАНТ ЛОЙИҲАСИ ДОИРАСИДА “ОНАЛАР ЎГИТИ” ТАДБИРИ ЎТКАЗИЛДИ

Инсон дунёга келган илк кунидан бошлаб оила бағрида улғаяди. Ота-онаси, яқинлари меҳр-муҳаббати билан оламни танийди. Маҳалласи, киндик қони томган она Ватанини ҳам оиласи орқали идрок этади. Шу боис, оила қўрғонини меҳр-муҳаббат, бахт-иқбол кошонаси, дея таърифлаймиз. Оиланинг инсон учун қадр-қиммати шунчалар қадрли ва буюкки, қаерда, қандай машғулот билан машғул бўлмасин, кун давомида кўз қароғида ўзи ва яқинлари учун муқаддас гўша – оиласи сурати муҳрланиб туради ва уни бағрига чорлайверади.

Амударё туманининг гўзал Дўрман қишлоғидаги 84-сонли умумтаълим мактабида бўлиб ўтган “Оналар ўгити” тадбирида кўпни кўрган нуроний онахонлар оила салтанатининг миллий-маънавий асослари, ота-оналарнинг фарзандлари олдидаги фарўандларнинг эса ота-она олдидаги бурч ва мажбуриятлари, одамийлик, ўзаро меҳр-оқибат тамойилларини ўзида мужассам этган оила қадриятлари хусусида ва бу миллий-маънавий оила қадриятларининг тарбиявий аҳамияти тўғрисида сўз юритдилар.

Ёшлар маънавиятини юксалтириш, улар онгида Ватанга муҳаббат, миллий ва умуминсоний қадриятларга садоқат руҳини шакллантириш мақсадида Амударё телевидениесининг тадбир бўлиб ўтди. “Юксак маънавиятли ва ахлоқли ёшлар – келажак пойдевори” грант лойиҳаси доирасида “Бувижонлар мактаби” аъзолари иштирокида жорий йилнинг 6 апрель санасида бўлиб ўтган мазкур “Оналар ўгити” тадбирида Дўрман қишлоғида истиқомат қилувчи нуроний онахонлар – фахрий педагог Роҳатой Раимова, меҳнат фахрийси Санамжон Ражабова, 84-сонли мактаб директори Эркин Қурбонбоев, мазкур мактабнинг рус тили фани ўқитувчиси, қишлоқдаги ибратли оила соҳибаси Турсунгул она Матсафоевалар ҳамда 84-сонли умумтаълим мактабининг юқори синф ўқувчилари, ОАВ вакиллари иштирок этдилар.

Тадбирни мактаб директори Эркин Қурбонбоев очди ва оила қадриятлари, шунингдек, фарзандлар тарбиясида азиз онахонларимиз, мўътабар бувижонларимизнинг тутган ўрни ҳақида тўхталиб ўтди.

Шундан сўнг, “Юксак маънавиятли ва ахлоқли ёшлар – жамият пойдевори” лойиҳасининг координатори, журналист Робия Йўлдашева мазкур лойиҳанинг юксак маънавиятли ва ахлоқли ёшларни тарбиялашдаги аҳамияти ва ушбу лойиҳадан кутилаётган натижалар хусусида батафсил тушунчалар берди.

Тадбир давомида ҳожи она, фахрий педагог Роҳатой она Раҳимова ёшларга мустаҳкам оила қуришнинг жамиятга фойдаси, ўсиб келаётган ёш авлоднинг  ҳар томонлама етук ва мукаммал инсонлар бўлиб вояга етишлари учун оилада аҳамият бериш жуда муҳим бўлган жиҳатларга тўхталиб, ёшларга келгусида бу борада хатога йўл қўймасликлари бўйича зарур ўгит ва маслаҳатлар берди. Айниқса, шошилинч турмуш қуришнинг салбий оқибатлари ҳақида ҳаётий  мисоллар орқали ёшларга тушунчалар бериб, уларни ҳар қандай масалада, айниқса, оила қуришда шошилмасдан иш тутишга даъват этди.

Тадбир давомида дўрманлик нуроний онахон Санамжон буви Ражабова ўзи ҳаётда ҳамиша амал қилган тарбиявий қонун-қоидалар хусусида сўз юритиб, қизларни оилавий ҳаётга тайёрлаш бу – она Ватаннинг келажаги учун масъулият ҳисси билан яшаш эканлиги алоҳида таъкидлади.

Шундан сўнг, 84-сонли мактабнинг рус тили фани ўқитувчиси Турсунгул Матсафоева ҳам мустаҳкам оила жамият пойдевори эканлигини, оилаларда тўлақонли соғлом муҳит яратишда ота-онанинг ва фарзандларнинг бурч ва мажбуриятлари хусусида қизиқарли маъруза қилиб, ёш қизларни миллий-маънавий қадриятларга ҳурмат-эътиборли бўлишга даъват этди.

“Оналар ўгити” тадбирида ўқувчи-ёшлар ҳам фаол иштирок этдилар. Хусусан, 8-синф ўқувчиси Дурдона Зарипова “Бувижонлар мактаби” аъзоларига ўзини қизиқтирган саволлар билан мурожаат қилиб, тенгдошларини одобли-ахлоқли бўлишга, айни пайтда, оилавий ҳаётга тайёргарликнинг ўта муҳим ва илк босқичи  - билим олиш, муносиб касб-корли бўлишга чорлади.

“Оналар ўгити” тадбири қизғин баҳс-мунозараларга бой, ёшларнинг фаол иштироки билан мазмунли ўтди.

Равшан БАҲРАМОВ, Муяссар Халиллаева.