АМУДАРЁЛИК ОСИЁ КУБОГИ ҒОЛИБИ, ЁШ ФУТБОЛЧИ ТАҚДИРЛАНДИ

Юртимизда ёшларга қаратилаётган эътиборнинг ижобий натижаларига адабиёт, санъат, маданаият, спорт, қўйингки, барча соҳаларда ҳам яққол гувоҳ бўлаяпмиз.

Шу йилнинг 18 март куни мамлакатимиз тарихида муҳим сана сифатида қайд этилди. Шу куни футбол бўйича 20 ёшгача бўлган ўйинчилар ўртасидаги Осиё Кубоги – 2023 финал босқичида Ўзбекистон ёшлар жамоаси ироқлик ёш футболчиларга қарши майдонга тушиб, ғалаба қозонди.

Мазкур ўйинни Президентимиз Шавкат Мирзиёев ва бошқада давлат расмийлари, спорт соҳаси масъуллари “Бунёдкор” стадионида кўпсонли мухлислар қаторида томоша қилишди. Ғалаба нашидасини ёш футболчиларимиз давлатимиз раҳбари билан бирга нишонлашди. Тақдирлаш маросимида иштирок этган Президент бош соврин – Осиё Кубогини жамоага топширди.

Футболда эришилган бу ғалаба ҳеч бир ўзбекистонликни бефарқ қолдирмади десак, адашмаган бўламиз. Хусусан, амударёликларга ёш футболчилар ютуғи Наврўзи олам шодликларига шодлик қўшди. Ушбу ғолиб жамоа аъзоси, 5-рақамли ҳимоячи Жавоҳир Ўтамуродов туманимиз ўғлони эканлиги эса фахрдир.

У 2004 йилда Тўлқин овулида туғилган. Бошланғич синфларни 32-сонли мактабда, кейинчалик Нукус шаҳридаги 27-мактабда ўқиди. Футболга қизиқиши туфайли мунтазам машғулотларга қатнашди. Нукус Олимпия заҳиралари спорт коллежида ўқиди. Мактаб, коллеж ўқувчиси даврида футбол мусобақаларида маҳоратини намойиш этиб, соҳа мутахассислари эътиборини қозонгани боис 2018 йилдан 2021 йилгача “Насаф” футбол академияси тарбияланувчиси бўлди, ҳозирги кунда “Насаф” футбол клуби марказий ҳимоячиси, 2022 йилдан 20 ёшгача бўлган футбол терма жамоаси аъзоси. Шу кунгача ўндан ортиқ давлатлар ёшлари билан бўлган беллашувларда қатнашиб, ғалабага муносиб ҳисса қўшди, Хитой ёшлари билан бўлган баҳсда ягона гол муаллифи бўлди.

Осиё Кубоги ўйинлари якунланганидан сўнг туманимизга қайтган футболчини Нукус халқаро аэропортида ҳукумат вакиллари тантанали кутиб олишди.

Унинг ғалаба қувончларини бирга баҳам кўриш учун туғилган уйига келиши ҳақиқий байрамга айланиб кетди. Отаси, энаси, дадаси, онаси, қариндошлари, устозлари синфдошлари, қўни-қўшнилар жам бўлиб, гўё тўй бўлди. “Президент совғаси” ёзуви туширилган, Юртбошимиз совға қилган Ўзбекистонда ишлаб чирқарилган “Жентра” автомобили калитини отасига совға қилиб, унга, энасини, бобо-бувисини ҳам машинага ўтқазиб қўйганида Жавоҳир Ўтамуродовга барча ҳавас қилди.

22 март куни Жавоҳир Ўтамуродов Ёшлар ишлари агентлиги туман бўлими ва Болалар-ўсмирлар спорт мактаби томонидан ҳам муносиб тақдирланди. У “Наврўз кубоги” спорт мусобақаларининг сектор ғолиблари бўлган Тўлқин, Холимбег овуллари, Беруний, Қизилчоли маҳаллалари футбол жамоалари беллашувига йиғилган ёшлар билан учрашди. Чордара маҳалласидаги сунъий қопламали мини футбол майдончасида футболсевар ёшларга маҳорат дарси ўтди, биргаликда марказий ҳужумчи сифатида ўйнади.

Осиё кубоги ғолибига ёшлар ўзларини қизиқтирган саволлар билан мурожаат қилишди. Жавоҳир уларга батафсил жавоблар бериб, уларнинг футболдаги фаолиятига, ўқиш, ишларига муваффақиятлар тилади.

Осиё кубоги ғолиби Жавоҳир Ўтамуродов билан ўтказилган учрашув, маҳорат дарси ёш футболчиларимизга улкан мативация берди, ўзларига бўлган ишончини оширди.

Севара Исмоилова.