AMUDARYoLIK OSIYo KUBOGI GʻOLIBI, YoSh FUTBOLChI TAQDIRLANDI

Yurtimizda yoshlarga qaratilayotgan eʼtiborning ijobiy natijalariga adabiyot, sanʼat, madanaiyat, sport, qoʻyingki, barcha sohalarda ham yaqqol guvoh boʻlayapmiz.

Shu yilning 18-mart kuni mamlakatimiz tarixida muhim sana sifatida qayd etildi. Shu kuni futbol boʻyicha 20 yoshgacha boʻlgan oʻyinchilar oʻrtasidagi Osiyo Kubogi – 2023 final bosqichida Oʻzbekiston yoshlar jamoasi iroqlik yosh futbolchilarga qarshi maydonga tushib, gʻalaba qozondi.

Mazkur oʻyinni Prezidentimiz Shavkat Mirziyoyev va boshqada davlat rasmiylari, sport sohasi masʼullari “Bunyodkor” stadionida koʻpsonli muxlislar qatorida tomosha qilishdi. Gʻalaba nashidasini yosh futbolchilarimiz davlatimiz rahbari bilan birga nishonlashdi. Taqdirlash marosimida ishtirok etgan Prezident bosh sovrin – Osiyo Kubogini jamoaga topshirdi.

Futbolda erishilgan bu gʻalaba hech bir oʻzbekistonlikni befarq qoldirmadi desak, adashmagan boʻlamiz. Xususan, amudaryoliklarga yosh futbolchilar yutugʻi Navroʻzi olam shodliklariga shodlik qoʻshdi. Ushbu gʻolib jamoa aʼzosi, 5-raqamli himoyachi Javohir Oʻtamurodov tumanimiz oʻgʻloni ekanligi esa faxrdir.

U 2004-yilda Toʻlqin ovulida tugʻilgan. Boshlangʻich sinflarni 32-sonli maktabda, keyinchalik Nukus shahridagi 27-maktabda oʻqidi. Futbolga qiziqishi tufayli muntazam mashgʻulotlarga qatnashdi. Nukus Olimpiya zahiralari sport kollejida oʻqidi. Maktab, kollej oʻquvchisi davrida futbol musobaqalarida mahoratini namoyish etib, soha mutaxassislari eʼtiborini qozongani bois 2018-yildan 2021-yilgacha “Nasaf” futbol akademiyasi tarbiyalanuvchisi boʻldi, hozirgi kunda “Nasaf” futbol klubi markaziy himoyachisi, 2022-yildan 20 yoshgacha boʻlgan futbol terma jamoasi aʼzosi. Shu kungacha oʻndan ortiq davlatlar yoshlari bilan boʻlgan bellashuvlarda qatnashib, gʻalabaga munosib hissa qoʻshdi, Xitoy yoshlari bilan boʻlgan bahsda yagona gol muallifi boʻldi.

Osiyo Kubogi oʻyinlari yakunlanganidan soʻng tumanimizga qaytgan futbolchini Nukus xalqaro aeroportida hukumat vakillari tantanali kutib olishdi.

Uning gʻalaba quvonchlarini birga baham koʻrish uchun tugʻilgan uyiga kelishi haqiqiy bayramga aylanib ketdi. Otasi, enasi, dadasi, onasi, qarindoshlari, ustozlari sinfdoshlari, qoʻni-qoʻshnilar jam boʻlib, goʻyo toʻy boʻldi. “Prezident sovgʻasi” yozuvi tushirilgan, Yurtboshimiz sovgʻa qilgan Oʻzbekistonda ishlab chirqarilgan “Jentra” avtomobili kalitini otasiga sovgʻa qilib, unga, enasini, bobo-buvisini ham mashinaga oʻtqazib qoʻyganida Javohir Oʻtamurodovga barcha havas qildi.

22-mart kuni Javohir Oʻtamurodov Yoshlar ishlari agentligi tuman boʻlimi va Bolalar-oʻsmirlar sport maktabi tomonidan ham munosib taqdirlandi. U “Navroʻz kubogi” sport musobaqalarining sektor gʻoliblari boʻlgan Toʻlqin, Xolimbeg ovullari, Beruniy, Qizilcholi mahallalari futbol jamoalari bellashuviga yigʻilgan yoshlar bilan uchrashdi. Chordara mahallasidagi sunʼiy qoplamali mini futbol maydonchasida futbolsevar yoshlarga mahorat darsi oʻtdi, birgalikda markaziy hujumchi sifatida oʻynadi.

Osiyo kubogi gʻolibiga yoshlar oʻzlarini qiziqtirgan savollar bilan murojaat qilishdi. Javohir ularga batafsil javoblar berib, ularning futboldagi faoliyatiga, oʻqish, ishlariga muvaffaqiyatlar tiladi.

Osiyo kubogi gʻolibi Javohir Oʻtamurodov bilan oʻtkazilgan uchrashuv, mahorat darsi yosh futbolchilarimizga ulkan mativatsiya berdi, oʻzlariga boʻlgan ishonchini oshirdi.

Sevara Ismoilova.