Хитой овул фуқаролар йиғинида Наврўз байрами бўлиб ўтди

Баҳор ва табиат уйғонишининг тимсоли, шарқона янги йилнинг бошланиши бўлган Наврўзи оламни баланд руҳ ва катта шодиёна билан нишонлаш азал-азалдан эл-юртимиз учун гўзал анъана ҳисобланади. Халқимизнинг кўп асрлик эзгу қадриятларини, унинг орзу-интилишларини ўзида мужассам этган ушбу қутлуғ айём мустақиллик йилларида мамлакатимизда яшаётган турли миллат ва элатларга мансуб барча ватандошларимиз учун умумхалқ байрамига айланди. Ушбу айём мамлакатимизда ҳар йили миллий қадрият ва урф-одатларимизга уйғун тарзда нишонланиб келинади.

Жумладан, байрам шодиёнаси Амударё туманининг ҳар бир маҳалла ва овулларида кўтаринки руҳда, юқори савияда ўтказилди. Хитой овулидаги Наврўз сайлида овул ҳудудида истиқомат қилувчи етти ёшдан етмиш ёшгача бўлган барча фаол иштирок этишди.

Наврўз сайлида Хитой овул фуқаролар йиғини раиси Давлатбой Атажанов барчани янгиланиш ва яшариш фаслида янги кун, янги йил, янги ҳаёт сифатида кириб келаётган қутлуғ байрам билан табриклади. Шунингдек, таълим фахрийси, таниқли ижодкор Турсунбой Абдуллаев овулдошларини байрам билан самимий қутлади. Уларнинг оиласига тинчлик, хотиржамлик, қут-барака тилади.

Сўзга чиққанлар юртимизда ҳукм сураётган тинчлик, дўстлик ва биродарлик туйғуларини мустаҳкамлаш, халқимиз, аввало, ёш авлодимиз қалби ва онгида Ватанимизнинг бугуни ва келажагига дахлдорлик туйғусини кучайтиришда Наврўз байрамининг аҳамияти тобора ортиб бораётганлигини таъкидлаб ўтдилар.

Маҳалланинг ҳожи отахон ва онахонлари, ёши улуғ нуронийлар, тенгдошларига ўрнак бўлаётган ёшларнинг табрик сўзларидан сўнг, байрамона концерт дастури намойиш этилди.

Мактабгача таълим ташкилоти тарбияланувчилари, умумтаълим мактаблари ўқувчилари иштирокида тайёрланган бадиий чиқишларда Наврўзи оламнинг руҳи ва фалсафасида мужассам бўлган яхшилик ва бағрикенглик, аҳиллик ва ҳамжиҳатлик, атроф-муҳитни кўз қорачиғидек асраб-авайлаш каби олижаноб ғоялар акс этди. Эл-юртимиз яшариш ва янгиланиш, меҳр-оқибат фасли сифатида эъзозлайдиган, Бирлашган Миллатлар Ташкилоти томонидан халқаро байрам деб эътироф этилган Наврўзнинг маънавий ҳаётимиздаги улкан ўрни ва таъсири хитойликларнинг юз ифодаларида ёққол намоён бўлди.

Наврўз сайлида миллий ўйинларимиз, урф-одатларимиз намойиш этилиб, фасли навбаҳорни, Наврўзни тараннум этувчи гўзал куй-қўшиқлар куйланди, рақслар ижро этилди.

Байрамда жамият ва давлат ҳаётида фаоллик ва ташаббускорлик кўрсатган, ўзининг фидокорона меҳнати билан ибратли фаолият олиб бораётган, юртимиз ривожига ўзининг муносиб ҳиссасини қўшиб келаётган, шунингдек оилавий қадриятларни мустаҳкамлашга, маънавий-ахлоқий муҳитни соғломлаштириш ишларида ўзининг ҳаётий тажрибалари билан фаол иштирок этиб келаётган меҳнат фахрийларига ҳомийлар томонидан эсдалик совғалари топширилди.

Шунингдек, байрам тадбирида ўз истеъдоди ва қобилиятларини намойиш этиб, фаол қатнашган мактаб ўқувчилари ва тарбияланувчиларга ҳам эсдалик совғалари улашилди.

Ҳар йилдагиданда ўзгача кайфият ва кўтаринки руҳда нишонланаёган Наврўз қалбларни бирлаштирди. Дарҳақиқат, юртимизга гўзаллик ва нафосат, яшариш ва янгиланиш, меҳр ва оқибат байрами – Наврўз кириб келар экан, дала ва қирларимиз, боғ ва яйловларимиз кўклам ёмғирлари – обираҳматдан баҳраманд бўлиб, бўлғуси мўл ҳосил, қут ва баракадан дарак бермоқда.

 Ҳар бир инсон ўзининг табиат фарзанди эканини янада чуқур англаётган мана шундай мунаввар айёмга эл-юртимиз билан соғ-омон етганимиз учун шукроналар айтмоқда.

Туман ҳокимлигининг Ахборот хизмати.